Raman z fejkavym Bredam Pitam kaštavaŭ žančynie €830 tysiač. Jana navat raźviałasia z realnym mužam

Historyja 53-hadovaj dyzajnierki interjeraŭ Hanny była pradstaŭlena na francuzskim telekanale TF1, dzie jana raspaviała, jak stała achviaraj ludziej, jakija vydavali siabie za akciora. Machlary vykarystoŭvali fejkavyja akaŭnty ŭ sacsietkach i technałohiju štučnaha intelektu, kab pravieści składanuju afioru.

Usio pačałosia ŭ lutym 2023 hoda, kali Hanna była zamužam za zamožnym pradprymalnikam. Jana atrymała paviedamleńnie ad čałavieka, jaki vydavaŭ siabie za Džejn Etu Pit, maci akciora. Žančyna napisała, što Hanna — «taja samaja žančyna», jakaja patrebna jaje synu. Na nastupny dzień ź joj źviazaŭsia čałaviek, jaki vydavaŭ siabie za Breda Pita, što vyklikała ŭ žančyny tryvohu.

«Budučy čałaviekam, jaki mała raźbirajecca ŭ sacsietkach, ja nie zusim razumieła, što adbyvajecca», — uspaminaje Hanna. Fejkavy Pit zajaviŭ, što choča adpravić joj raskošnyja padarunki, ale nie moža apłacić mytnyja zbory, bo jaho bankaŭskija rachunki zamarožany praz razvod z Andželinaj Džoli. Heta prymusiła Hannu pieravieści šachrajam 9 000 jeŭra.

«Jak durnica, ja zapłaciła… Štoraz, kali ja sumniavałasia, jon umudraŭsia raźviejać maje padazreńni», — raspaviadaje jana. Paśla hetaha zapyty na hrošy pačaścilisia. Fejkavy akcior paviedamiŭ, što chvory na rak nyrak, i dasłaŭ Hańnie niekalki zhienieravanych štučnym intelektam fotazdymkaŭ na balničnym łožku.

Paźniej Hanna raźviałasia z mužam i atrymała 775 000 jeŭra, ale ŭsie hetyja hrošy taksama dastalisia machlaram. «Ja kazała sabie, što, mahčyma, ratuju čałavieku žyćcio», — tłumačyć žančyna, jakaja sama pieražyła rak i znachodzicca ŭ remisii.

Dačka Hanny na praciahu hoda sprabavała viarnuć maci da realnaści, ale taja była zanadta zachoplenaja. Kali ŭ červieni 2024 hoda sapraŭdny Bred Pit i Ines de Ramon abviaścili pra svaje adnosiny, Hanna narešcie spyniła kantakty z machlarami i źviarnułasia ŭ palicyju. Ciapier viadziecca rasśledavańnie.

Heta historyja vyklikała chvalu naśmiešak u sacsietkach. Futbolny kłub «Tułuza» pažartavaŭ u X (Twitter): «Pryvitańnie, Hanna, Bred skazaŭ, što budzie na stadyjonie ŭ sieradu. A ty?» Paźniej kłub vydaliŭ dopis i vybačyŭsia. Netflix France rekłamavaŭ «čatyry filmy z Bredam Pitam», padkreślivajučy, što ŭsio «biaspłatna i sumlenna».

Adnak byli i tyja, chto padtrymaŭ žančynu. «My havorym pra žančynu za 50, jakuju padmanuli pry dapamozie «hłybokich fejkaŭ» i ŠI. Vašy baćki ci babuli taksama mahli b nie raspaznać padman», — napisaŭ adzin z karystalnikaŭ X.

Sama Hanna kaža, što nie była «varjatkaj ci idyjotkaj». «Mianie prosta padmanuli, i ja heta pryznaju. Ale ja nie adna takaja», — padkreślivaje jana.

Pradstaŭnik akciora nazvaŭ situacyju žachlivaj. «Machlary karystajucca mocnaj suviaźziu fanataŭ sa znakamitaściami», — zajaviŭ jon vydańniu Entertainment Weekly. Jon taksama paraiŭ nie adkazvać na paviedamleńni ŭ internecie ad «akcioraŭ, jakija nie pradstaŭleny ŭ sacsietkach».

• 0
• 0
• 0
• 1
• 0
• 1
• 0
• 0