Jak niekatorym udajecca vyžyć u avijakatastrofach, u jakich hinuć amal usie?

Pra akaličnaści vyžyvańnia ŭ avijakatastrofach, u jakich zahinuła bolšaść pasažyraŭ, piša The Wall Street Journal (WSJ). 

Zadnija miescy ratujuć žyćcio. Ale nie zaŭsiody

25 śniežnia minułaha hoda samalot avijakampanii Azerbaijan Airlines, jaki lacieŭ praz zachodniuju častku Kazachstana, paciarpieŭ katastrofu, chutčej za ŭsio, u vyniku ŭdaru rasijskimi supraćpavietranymi rakietami. Zahinuli 38 čałaviek, adnak 29 pasažyraŭ zastalisia žyvymi, vybraŭšysia z-pad abłomkaŭ.

Śledčyja apublikavali papiarednija vysnovy, zhodna ź jakimi samalot na praciahu bolš za hadzinu zmahaŭsia za zachavańnie chutkaści i vyšyni paśla ŭdaru rakiet, pierš čym urešcie paciarpieŭ katastrofu.

Asablivaść hetaha vypadku ŭ tym, što ŭsie, chto vyžyŭ, siadzieli ŭ chvastavoj častcy samalota.

Praź niekalki dzion adbyłasia jašče adna trahiedyja: 29 śniežnia ŭ Paŭdniovaj Karei raźbiŭsia Boeing 737-800 avijakampanii Jeju Air. Z 181 čałavieka na borcie zahinuli 179. Vyžyli dvoje bortpravadnikoŭ, jakija znachodzilisia — znoŭ ža — u zadniaj častcy samalota.

Tłumačeńnie tut prostaje. Kali padčas padzieńnia samalot sutykajecca ź ziamloj nosam, pasažyry, jakija znachodziacca ŭ piaredniaj častcy, prymajuć na siabie asnoŭny ŭdar. Adpaviedna, pasažyry ŭ chvastavoj častcy majuć bolšyja šancy na vyžyvańnie.

Adnak znachodžańnie na zadnich siadzieńniach aŭtamatyčna nie pavyšaje šancaŭ na vyžyvańnie. Samalot moža sutyknucca ź ziamloj roznymi sposabami — udar nosam, pryziamleńnie na žyvot abo ŭdar chvastom. Suadnosna, faktar miesca tut maje adnosnaje značeńnie.

Piać faktaraŭ, jakija bolš istotnyja

Ekśpierty nazyvajuć piać asnoŭnych faktaraŭ, jakija ŭ bolšaj stupieni, čym miesca ŭ samalocie, upłyvajuć na šancy vyžyvańnia.

Cełasnaść samalota. Učastak samalota, u jakim znachodzicca pasažyr ci člen ekipaža, pavinien zastavacca fizična cełym. Kali fiuzielaž abo kabina ŭ hetaj zonie razburajucca ci rvucca, šancy na vyžyvańnie rezka źnižajucca.

Srodki biaśpieki. Niapravilna prymacavanyja rečy stanoviacca niebiaśpiečnymi snaradami, a słaba zaciahnuty remień dazvalaje ciełu z bolšaj siłaj kinucca napierad. 

Siły pierahruzki (G-siły). G-siły — heta siły, jakija ŭździejničajuć na cieła pry paskareńni abo zapavoleńni. Naprykład, 1G — zvyčajnaje pryciahnieńnie siły ciažaru, jakoje my adčuvajem kožny dzień. 2G — udvaja macniejšaje pryciahnieńnie. Daśledavańni pakazvajuć, što kali samalot pry ŭdary padviarhajecca nahruzcy nie bolš za 9G, pasažyry majuć realnyja šancy vyžyć.

Umovy ŭnutry samalota. Dym, połymia i abłomki ŭnutry kabiny mohuć stać vyrašalnymi faktarami. Navat kali pieršasny ŭdar vyžyvalny, taksičnyja pary abo imhniennyja pažary stvarajuć śmiarotnuju niebiaśpieku.

Faktary paśla katastrofy. Chutkaść evakuacyi — nakolki chutka vyžyłyja mohuć znajści pracujučyja vychady ci biaśpiečny šlach ad połymia — časta vyznačaje, chto zastaniecca ŭ žyvych u pieršyja chviliny paśla sutyknieńnia.

Jość taksama šerah dadatkovych faktaraŭ, jakija mohuć adyhrać vyrašalnuju rolu: faza palotu, typ samalota i, kaniešnie, čałaviečy faktar. Naprykład, katastrofy padčas uźlotu ci pasadki statystyčna bolš niebiaśpiečnyja, čym padčas palotu. 

Aproč usich nazvanych faktaraŭ, časam vyrašalnuju rolu adyhryvaje ŭdača — zaŭvažaje WSJ. U šerahu vypadkaŭ vyžyłym udavałasia paźbiehnuć hibieli dziakujučy vypadkovym akaličnaściam, takim jak zapavoleńnie va ŭźniknieńni pažaru abo toje, jak ich cieła raźmiaščałasia padčas udaru. 

• 2
• 0
• 1
• 0
• 2
• 2
• 0
• 0