Bolšaść biełaruskich top-čynoŭnikaŭ paśla adstaŭki pracujuć u Rasii abo na rasijskija kampanii

Tak uładkoŭvajucca nie tolki kamitetčyki. Eks-ministr zamiežnych spravaŭ Siarhiej Martynaŭ staŭ kiraŭnikom pradstaŭnictva «RussNiefť» u Biełarusi. Cikava, što niekali hetuju pasadu zajmaŭ były kiraŭnik Mahiloŭskaha abłvykankama Michaił Dražyn. Chto jašče prajšoŭ takoj ściežkaj — ź biełaruskich čynoŭnikaŭ u rasijski biznes?

1. Urał Łatypaŭ i Ivan Antanovič

Adrazu dva papiaredniki Martynava na pasadzie kiraŭnika MZS (Biełarusi, a nie Rasii) paśla adstaŭki dla PMŽ abrali Maskvu. Ivan Antanovič zajmaŭsia ŭ rasijskaj stalicy navukovaj i piedahahičnaj pracaj.

Što da Urała Łatypava, to ŭ Biełarusi za Łukašenkam z KDB jon pierasieŭ na top­-pasady ministra zamiežnych spravaŭ, kiraŭnika Administracyi prezidenta, Rady biaśpieki. Paśla adstaŭki jon try hady adpracavaŭ staršynioj kansultacyjnaj rady kampanii «Łukojł Biełaruś». Ad 2008 pierajšoŭ u kampaniju «MTZ «Rubin», adnaho z najbujniejšych deviełapieraŭ rasijskaj stalicy. Raniej tamsama pracavaŭ były premjer Uładzimir Jarmošyn. Praŭda, na staryja hady Jarmošyn viarnuŭsia ŭ Minsk.

2. Ivan Ciciankoŭ

Pieršy kiraŭnik spravaŭ prezidenta Ivan Ciciankoŭ najbolš zapomniŭsia svaim rezanansnym učynkam padčas refierendumu 1995, kali parvaŭ bieł­čyrvona­bieły ściah. Z časam Ciciankoŭ zašmat padmiaŭ pad siabie. Kiraŭnik krainy navat abvinavaciŭ svajho akanoma, što jon «zarvaŭsia». Paśla adstaŭki Ciciankoŭ pracavaŭ u rasijskaj kampanii «Itera», a paśla adkryŭ ułasny budaŭničy biznes. U Maskvie. Kažuć, što sioleta Ciciankova bačyli ŭžo ŭ Minsku.

3. Uładzimir Navumaŭ

A voś byłoha ministra ŭnutranych spravaŭ Uładzimira Navumava paśla adstaŭki nichto ŭ Biełarusi nie naziraŭ. Chacia ŭ adzinym intervju paśla adjezdu z krainy eks-čynoŭnik pryznavaŭsia, što volna pryjazdžaje ŭ Minsk. Navumava adstavili ŭ čas hučnaj baraćby MUS i KDB. Kali razyhryvałasia «sprava palaŭničych», za kraty trapili niekatoryja namieśniki Navumava.

Ciapier Navumaŭ nibyta pracuje ŭ blizkaj da Pucina kampanii «Rastechnałohii» daradcam kiraŭnika. «NN» telefanavała ŭ kampaniju, kab znajści Navumava. Vietlivyja sakratarki doŭha šukali takoje proźvišča, ale nie znajšli.

4. Viktar Rachmańko

Pasadu načalnika Biełaruskaj čyhunki Viktar Rachmańko straciŭ u 2001, kali trapiŭ pad karupcyjnuju spravu, jakaja skončyłasia turmoj. Da kanca terminu čynoŭnik nie dasiadzieŭ, a pa vyzvaleńni nakiravaŭsia ŭ Maskvu. Tam jaho talenty znajšli prymianieńnie u «Hazpramie». Ciapier Rachmańko ŭznačalvaje Departamient inviestycyj i budaŭnictva kampanii.

5. Leanid Jeryn i Uładzimir Mackievič

U Maskvie ŭładkavalisia adrazu dva byłyja staršyni KDB. Leanid Jeryn pracuje daradcam načalnika «Rasijskaj čyhunki». Pracu daradcy znajšoŭ sabie i Uładzimir Mackievič. Jon dapamahaje kiraŭniku kampanii «Savkamfłot».

• 0
• 0
• 0
• 0
• 0
• 0