Кірстэн Нойшафер стала першай жанчынай, якая перамагла ў кругасветнай гонцы Golden Globe Race
Шкіпер Кірстэн Нойшафер з Паўднёвай Афрыкі стала першай жанчынай у свеце, якая выйграла Golden Globe Race 2022 — адзіночную кругасветную гонку на яхтах. У чацвер вечарам яна фінішавала пасля таго, як правяла больш за 235 дзён у моры без заходу ў парты, піша Бі-бі-сі.
Наступны за Кірстэн удзельнік, індыйскі шкіпер Абхілаш Томі, у момант яе фінішу знаходзіўся ад яе ў 100 марскіх мілях (больш за 185 км). Гэта зусім няшмат для гонкі ў больш чым 30 тысяч марскіх міль, канкурэнцыя была вельмі высокай.
Кірстэн шмат гадоў займаецца яхтынгам і пераганяла судны па самых розных маршрутах, у тым ліку ў адзіночку. Яна хадзіла пад ветразем у Антарктыду разам са здымачнымі групамі дакументальнага кіно. Яшчэ яна падарожнічае на ровары: у 22 гады Кірстэн праехала амаль 15 тысяч кіламетраў за адзін год.
Раней жанчыны ўдзельнічалі ў падобных гонках, але не выйгравалі іх. На фінішы Кірстэн сустракала Кэтрын Шабо — першая жанчына-марачка, якая здзейсніла адзіночную безупынную кругасветку без старонняй дапамогі. Гэта адбылося ў 1997 годзе.
Golden Globe Race праводзілася ўсяго тройчы — у 1968, 2018 і 2022 гадах. Па ўмовах апошніх двух рэгат, удзельнікі не маглі выкарыстоўваць сучасную спадарожнікавую навігацыю. Яны следавалі астранавігацыі для вызначэння свайго становішча і пракладкі курса.
Ва ўдзельнікаў ёсць аварыйны буй, але выкарыстоўваць яго можна толькі ў экстраным выпадку. Даступная толькі самая простая радыёстанцыя для атрымання агульнай інфармацыі аб надвор'і. Раз на тыдзень удзельнікі стэлефаноўваюцца з арганізатарамі па спадарожнікавым тэлефоне.
У гэтай рэгаце выкарыстоўваюцца незвычайныя рэтра-лодкі. Тып яхты ўдзельніка павінен быць сканструяваны да 1988 года, мець не менш за 20 штук аднаго тыпу (яхта не павінна быць спецыяльна пабудаваная «пад гонку») і мець даўжыню корпуса не больш за 36 футаў (11 метраў).
Яхту Кірстэн Нойшафер — Minnehaha — пабудавалі ў 1988 годзе і ўзмацнілі перад пачаткам рэгаты. Сур'ёзных паломак за ўвесь маршрут не здарылася.
У гонцы ўдзельнічаюць дасведчаныя яхтсмены — яны павінны прайсці не менш за 12 тыс. марскіх міль у розных катэгорыях. Нават так удзельнікі падвяргаюць сябе сур'ёзнай рызыцы: значная частка гонкі праходзіць па шыротах з суровымі і непрадказальнымі ўмовамі.
11 з 16 удзельнікаў рэгаты сёлета сышлі з дыстанцыі да фінішу. Да сярэдзіны красавіка за перамогу змагаліся толькі трое шкіпераў, уключаючы Кірстэн. Яна ўдзельнічала і ў адной з выратавальных аперацый гэтай гонкі.
Вы маглі бачыць рэгату Golden Globe Race ў двух фільмах з аднолькавымі назвамі — «Гонка стагоддзя». Адзін з іх зняты ў Савецкім Саюзе ў 1986 годзе, другі — у Вялікабрытаніі ў 2018.
Абодва фільмы распавядаюць пра лёс удзельніка гонкі 1968 года Дональда Кроўхерста, які фальсіфікаваў звесткі аб сваім месцазнаходжанні падчас гонкі і знік без вестак у моры. У гонцы 1968 года да фінішу дайшоў толькі адзін чалавек — сэр Роберт Нокс-Джонстан — ён жа стаў пераможцам.
Падчас тэлефанавання з арганізатарамі ў кастрычніку Кірстэн казала пра тое, што атрымлівае асалоду ад самоты на борце пасля ціску, які на яе аказвала ўвага публікі і журналістаў.
На пытанне, ці не хапае ёй чаго-небудзь, яна адказала: «Так, марожанага». Напярэдадні фінішу каманда Кірстэн апублікавала ў яе інстаграме фатаграфію халадзільніка, поўнага марожанага з подпісам: «Спадзяваемся, гэтага будзе дастаткова, каб правесці выхадныя з Кірстэн».
«Вялікі абсалютна чалавек». Коля Лукашэнка расказаў, што для яго бацька і ў чым ягоная апазіцыйнасць32
Каментары