«Тых, хто адседзеўся, быў не адзін дзясятак». Паўлічэнка выказаўся пра Сахашчыка і сілавікоў, якія не выйшлі на разгон пратэстаў
Дзмітрый Паўлічэнка, былы камандзір вайсковай часці 3214, а цяпер старшыня Беларускай асацыяцыі ветэранаў спецназа МУС «Чэсць», даў каментар Азаронку пра зніклых палітыкаў і пратэсты ў 2020-м.
Пра 1990-я гады і вайскоўцаў пад «Пагоняй»
Паўлічэнка распавёў, што ў 1990-я ён быў ініцыятарам таго, каб пры аб'яўленні падзякі ваеннаслужачым тыя адказвалі: «Служу прэзідэнту і Айчыне». Ён тлумачыць гэта тым, што да рэферэндуму 1996 года існаваў падзел паміж вайскоўцамі.
Некаторыя насілі эмблему з «Пагоняй». Тыя, хто падтрымліваў Лукашэнку, насілі «савецкую эмблему з зорачкай». Таму, каб падкрэсліць, што яны служаць новай уладзе, быў уведзены такі адказ.
Паўлічэнка згадвае, што ў той час яны атрымлівалі зусім малы заробак. У іх не было ніякіх сацыяльных пакетаў, магчымасці атрымаць жыллё.
«У нас не было выхадных. У нас было па чатыры-пяць выездаў на дзень на рэкет, вымаганне, разбой, забойствы, вызваленне закладнікаў. Дзякуючы гэтым людзям мы тады выстаялі і перамаглі злачыннасць на тэрыторыі Беларусі. Гэта не была лёгкая вайна. Былі параненыя і загінулыя. Мы заплацілі дарагую цану».
Пра падзеі 2020-га
Паўлічэнка згадаў, што ў часе пратэстаў у 2020-м годзе асабіста пайшоў у натоўп. «Адна рэч — гаварыць з трыбуны, а іншая — асабістым прыкладам паказаць. Мы з ветэранамі пайшлі і выконвалі разам з АМАПам, спецыяльным атрадам хуткага рэагавання, брыгадаю спецыяльнага прызначэння тыя задачы, што патрабавалі абставіны».
«Я заўсёды жорстка і прынцыпова стаяў на пазіцыях абароны нашай дзяржаўнасці, прэзідэнцкай улады, абароны правоў і свабоды нашага народа. Любой цаной выканаць задачу па абароне правапарадку і грамадзян»,
— падкрэслівае Паўлічэнка, калі Азаронак у яго пытаецца, чаму яго так не любіць апазіцыя.
Пра сілавікоў, якія не выйшлі разганяць пратэсты
Паўлічэнка выказаўся пра тых людзей, якіх Лукашэнка пазбавіў воінскіх званняў. Найперш — пра Сахашчыка.
«Я з табою сябраваў. Мы з табою падымалі — ты сваю брыгаду, а я сваю. Чаго ж ты прадаўся за пяць злотых? І ўсе астатнія — гэта людзі-здраднікі. Вас Радзіма вучыла бясплатна, апранала, абувала, плаціла вам заробак, давала кватэры. Чаго ж вам мала? І вы адплацілі такою здрадаю».
Горш за здраду, на думку Паўлічэнкі, тыя, хто ў жніўні 2020-га адседзеў у адпачынку ці ўзяў бальнічны, чакаючы, чым усё скончыцца.
«Ёсць дастойны праціўнік, ёсць свае баявыя сябры, а ёсць прамежкавае звяно, якое ні вашым ні нашым. Гэта яшчэ горш за здраду. Тыя, хто адседзеўся, чакаў, хто ў гэтай сітуацыі выжыве. Такіх, на жаль, быў не адзін дзясятак».
Ён лічыць, што такіх людзей трэба «знаходзіць, выкарчоўваць і ставіць на месца».
Пра зніклых палітыкаў
Выказаўся Паўлічэнка таксама наконт палітычных забойстваў канца 1990-х — пачатку 2000-х, у якіх яго падазраюць.
«У свой час мы вельмі жорстка наводзілі парадак у краіне. Гэта шмат каму не падабалася. І прыдумалі шмат легендаў і казак пра нейкіх зніклых. Ну вось колькі іх шукаюць? Хіба што ўжо ўсю Беларусь перарылі, перашукалі, кожнага беларуса спыталі. Ну і дзе яны?» — пытае ён.
У канцы размовы Паўлічэнка запэўніў, што сілавікі ніколі не падвядуць Лукашэнку. «Трохі крыві, трохі болю і трохі поту. А ў выніку служым прэзідэнту і Айчыне», — упэўнены ён.
Чытайце яшчэ:
На мітынгу за Лукашэнку выступіў Паўлічэнка і расказаў пра «банды Ціханоўскай» ВІДЭА
«Яны стралялі ў спіну»: дачка Захаранкі сустрэлася з экс-байцом спецназу Юрыем Гараўскім
Калі Канапацкая стала цалкам падкантрольная Лукашэнку?16
Каментары