Драматычная ЖКГ-гісторыя здарылася ў рыбака з Івацэвічаў. Той засяліў на тыдзень шчупакоў у ванну ў кватэры — увесь гэты час сям’я хадзіла мыцца да суседзяў. А потым жонка пабачыла жыроўку і жахнулася ад таго, што рыбка атрымалася залатой.
Мужчына, якога завуць Аляксеем Гулевічам, займаецца кладкай пліткі, а ў вольны ад працы час захапляецца рыбалкай. Жонцы «рыбафана», як сябе называе мужчына, яго хобі вельмі не падабаецца.
За сямейнай драмай напрыканцы студзеня ў тыктоку назірала некалькі мільёнаў чалавек. Пасля чарговай рыбалкі Аляксей засяліў у ванну ў кватэры трох шчупакоў. Калі вы думаеце, што такое суседства не ўзрадавала яго жонку, дык не памыляецеся. Шчыра кажучы, рыбы — гэта не самыя зручныя кватаранты, бо з-за іх жонцы прыйшлося прасіцца да суседзяў памыцца.
Муж тым часам радаваўся, што адзін са шчупакоў выплюнуў жыўца і колькасць рыбы павялічылася. Аднойчы ранкам жанчына прачнулася праз грукат: відавочна, шчупакі вырашылі зладзіць несанкцыянаваную акцыю пратэсту і скінулі ў ваду ўсе шампуні і гелі для душа. Не спадабалася ёй пабачыць і чарвякоў на дне ванны, таму што муж рашыў пакарміць гадаванцаў.
— Знішчыць, інакш я знішчу цябе, — папярэджвала фаната рыбалкі жонка.
Жонка Аляксея спрабавала і сарваць чарговую рыбалку, наліўшы вады ў боты (складана асуджаць чалавека, якога выселіла з уласнай ванны рыба).
На пяты дзень у жанчыны пачалі заканчвацца нервовыя клеткі і яна выселіла шчупакоў з ванны ў рыбалоўную скрыню — а мужа адправіла спаць на канапу.
— Вы думалі ўсё? Пакуль жонкі няма, я іх уваскрэсіў, − выхваляецца рыбалоў на наступным відэа. — Не трэба бегаць у падвал, мяняць ваду жыўцам. Заўтра на рыбалку.
Зразумела, што з рыбалкі Аляксей прынёс новых хвастатых кватарантаў. У якасці помсты жонка запісала відэа, на якім смажыць рыбу на патэльні.
— Па шчупаковым загадзе, па маім жаданні, рыбы ў хаце больш няма, ванна цалкам у маім распараджэнні.
На 14 лютага Аляксей падарыў жонцы апрацоўчую дошку з надпісам «Жонка рыбака павінна ўмець капаць чарвякоў, маўчаць, захапляцца ўловам», што вызвала яе шчырае абурэнне.
— Ты кайфуеш, а я табе нешта павінна. Дык вось, я не ўмею капаць, маўчаць, захапляцца. Я дзяўчынка і хачу кветачкі.
Кульмінацыя канфлікту наступіла, калі ЖЭС разаслаў жыроўкі. Аказалася, што шчупакі «памыліся» на 40 кубоў вады. Для параўнання: звычайна сям'я траціць усяго 5 кубоў.
— Залатая рыбка нейкая атрымліваецца! — абураецца жанчына і абяцае, што пасля працы муж ёй адкажа за кожны куб і дадае. − Ні ў руках, ні ў слоіку, ні ў скрыні, ні ў якую шчыліну ў нашу хату рыба больш не патрапіць.
Агулам за камуналку сям'і трэба заплаціць амаль 140 рублёў.
«Вялікі абсалютна чалавек». Коля Лукашэнка расказаў, што для яго бацька і ў чым ягоная апазіцыйнасць32
Каментары
Як гэта некаторыя сац.сеткі пускаюць у этэр такія матэрыялы з адрубленымі галавамі? А некаторыя вэб-старонкі яшчэ і памнажаюць ім прагляды!