U Zimbabve pačalisia prezidenckija i parłamienckija vybary. Hetyja vybary stanuć pieršymi ŭ historyi krainy, u jakich nie biare ŭdziełu były dyktatar krainy Robiert Muhabe.
Hałasavańnie pačałosia na 10985 vybarčych učastkach. U im zmohuć uziać udzieł bolš za 5,7 młn hramadzian. Vyniki pavinny być abjaŭlenyja 4 žniŭnia, paviedamlajuć infarmahienctvy.
Na najvyšejšuju dziaržaŭnuju pasadu afrykanskaj krainy pretendujuć 23 kandydaty, adnak asnoŭnaja baraćba razhorniecca pamiž 75-hadovym dziejučym prezidentam Emiersanam Mnanhahvaj, jaki ŭznačalvaje kirujučy «Afrykanski nacyjanalny sajuz Zimbabve - Patryjatyčny front» (ZANU-PF) i lideram aljansu siami apazicyjnych partyj, zhurtavanych vakoł «Ruchu za demakratyčnyja pieramieny» (RDP), 40-hadovym Nelsanam Čamisam.
Napiaredadni hałasavańnia ekśpierty adznačali, što ŭ supiernikaŭ prykładna roŭny rejtynh i nie vyklučany druhi tur.
Za miescy ŭ parłamiencie Zimbabve pazmahajucca pradstaŭniki 55 partyj.
U intervju napiaredadni vybaraŭ były dyktatar krainy Robert Muhabe niečakana padtrymaŭ kandydata ad byłoj demakratyčnaj apazicyi. Pa słovach Muhabe, najhoršy varyjant - heta kantrol nad uładaj armii. Tamu Muhabe «zyčyć pośpiechu» kiraŭniku Ruchu za demakratyčnyja pieramieny.
Zimbabve abviaściła niezaležnaść u 1980-m, i hetyja vybary stanuć pieršymi ŭ historyi krainy, u jakich Muhabe nie biare ŭdzieł. Jon byŭ adchileny ad ułady vajskoŭcami ŭ listapadzie 2017 hoda.
Nahodaj dla ich vystupu była adstaŭka Mnanhahvy z pasady pieršaha vice-prezidenta, rašeńnie ab jakoj, jak ličycca, było pryniata pad ciskam byłoj pieršaj łedzi Hrejs Muhabe, što chacieła atrymać u spadčynu ŭładu muža. Paśla taho, jak 93-hadovy kiraŭnik dziaržavy pahadziŭsia daterminova skłaści paŭnamoctvy, Mnanhahva byŭ pryviedzieny da prysiahi prezidenta, paabiacaŭšy pravieści sumlennyja vybary, adnavić davier da ŭrada respubliki ŭ krain Zachadu i damahčysia źniaćcia sankcyj, uviedzienych imi suprać Zimbabve pry jaho papiaredniku.
«This f*cking AI». Pierakładčyk Łukašenki pry prezidencie AAE vykarystaŭ niedypłamatyčnaje słova9
Kamientary