Jak zahaniajuć u BRSM. Vučni minskaj škoły zapisali skandalnaje VIDEA

Ciažka ŭjavić, što zapis zrobleny ŭ jeŭrapiejskaj krainie XXI stahodździa. Možna było b padumać, što idzie zapis u hitleriuhiend ci stalinski kamsamoł. Ale heta Biełaruś — zapis byŭ zrobleny adnym z vučniaŭ minskaj škoły z-pad party. Razborliva čuvać, jak dzieciam pahražajuć, bo «administracyi škoły patrebnaja stopracentnaja statystyka, a inačaj moža być adličeńnie z kłasa». Videa akazałasia ŭ rasparadžeńni sajta Svaboda.org.

«Zrabili, zabyli, zatknulisia i siadzicie cichieńka — nichto vas čapać nie budzie», — kryčyć, imavierna, zavuč. Kali dzieci kažuć, što ŭ BRSM im paraili nie ŭstupać baćki, nastaŭniki pačynajuć cisnuć na toje, što hety bilet moža paŭpłyvać na pastupleńnie, heta prosta «prośba» škoły, kab nie padvodzić svaju ŭstanovu, i navat hramadzianski abaviazak, ad jakoha nielha admovicca, bo «što heta za antysavietčyna niejkaja i antybiełaruščyna».

«Vy što, nie padtrymlivajecie palityku prezydenta?» — kryčyć na dziaciej pedahoh. U vyniku dzieciam kažuć, što jany ŭžo daŭno farmalna ŭ BRSMie, ich tolki sfatahrafujuć, ale ani składak, aničoha płacić nie treba. «Prosta tupa sfatahrafavacca treba». A potym im addaduć bileciki — i ŭsio, a mohuć navat i nie addavać, kali dzieci nie zachočuć zabirać. Prosta farmalnaść, bo ŭsie daŭno ŭžo ŭ śpisach BRSM, a na składki nastaŭnicy buduć vydatkoŭvać hrošy sa svajoj kišeni.

Asnoŭnyja cytaty:

— Ja jašče raz tabie paŭtaraju — čysło… Heta tolki mahčyma, kali ty vyklučaješsia z kłasa, razumieješ? Tady tolki my možam kazać pra heta!

— Ja ničoha nie razumieju. 14 hadoŭ užo uśviadomleny vybar svoj robicie i ŭsio pavinny razumieć, što kali skazała radzima, to kamsamoł adkazaŭ: «Jość!». My pavinny heta zrabić. Kali vy navučency našaj himnazii — i za jaje honar pavinny stajać. A ŭ vas usio śmiech niejki…

— My siadzim na naradach navyciažku — nam heta patrebna?

— Radzimie treba! Jość takaja cana — abaraniać radzimu!

— Značyć, kamu treba? Ja b usio patłumačyła vam, dzieci. Albo vy hramadzianie Respubliki Biełaruś, albo vy svoj patryjatyčny abaviazak pavinny vykonvać ci nie? Ja što, pavinna pa ŭsich artykułach, pa ŭsich pravierkach pavinna pajści z-za vas? Chaj skažuć: što ž za vychavaŭčaja praca ŭ N-j himnazii? Pastavić jany mohuć, prosta tupa zrabić hetuju ličbu. Chočacie vy — nie chočacie, zabrali hety bilet, uziali ŭ zuby, pakłali doma na paličku i siadzicie, zatkniciesia! Usio! Ja ŭžo z vami jak z darosłymi ludźmi kažu. Antysavietčyna niejkaja, antybiełaruščyna niejkaja. Vy nie padtrymlivajecie palityku prezidenta našaha, tak?

— Hańba! Pa ŭsich pakazčykach pieršyja miescy na ŭsich alimpijadach, na ŭsich konkursach, na tabie! BRSM hety zadrypany nie možam zrabić. Dy što ž heta za adnosiny takija! Dzieci, padumajcie, kali łaska! Zrabili, zabylisia, zatknulisia i siadzicie cichieńka — nichto vas čapać nie budzie. Uznosy sa svajoj kišeni dastaniem — ja, Hanna Mikałajeŭna — i zapłacim hetyja siabroŭskija ŭznosy.

— Jašče raz paŭtaraju: užo usio roŭna ŭsio zroblena. Nam prosta ciapier faktyčna treba hetyja bilety ŭbačyć, u rukach ich patrymać, kab vy ŭ ich raśpisalisia. Nie chočacie — nie biarycie hetyja bilety!

— U ciabie 10,5 bałaŭ atestat, naprykład, i ŭ Pupkina jakoha-niebudź z Hrodna taksama 10,5. Ale jon napiša ŭ zajavie «člen BRSM», a ty — nie. I skažuć tady: «valicie, šanoŭny, i dalej u svaim Minsku pražyvajcie, a my voźmiem dziadźku z Hrodna i z BRSM-am zatoje». Čałavieka, jaki sfarmiravany patryjatyčna. Čałavieka, jaki sfarmiravany patryjatyčna. Hramadzianin jaki. Pazicyju svaju pryniaŭ.

— Chłopcy, ja trochi nie razumieju ciapier, pierad vami staić namieśnik dyrektara pa vychavaŭčaj pracy vašaj himnazii. Jana staić, raśpinajecca, ja nie razumieju, u čym vaša prablema? Vy chočacie ciapier usie razam pajści da Aleny Viktaraŭny schadzić na aŭdyjencyju. Ja spadziajusia, tam śmiaški vašyja ŭsie projduć i vašy voś takija vodhuki…

— Vam atestat, nie daj boh, z takim voś pavodzinami sapsavać, jak dva palcy — heta ja vam kažu. Kali, nie daj boh, ja jašče raz padobny ton pačuju ad kožnaha z vas. Pierad vami staić žančyna ŭ pieršuju čarhu.

• 0
• 0
• 0
• 0
• 0
• 0
• 0
• 0