Jak patracić 2 miljony dziaržaŭnych rubloŭ, kab ničoha nie było
Kiraŭnictva spravami prezidenta daručyła dziaržaŭnamu vajskovamu pradpryjemstvu «Ahat» stvaryć sistemu elektronnaha ŭliku kanfiskavanych tavaraŭ za 5 miljonaŭ rubloŭ. Tyja zrabili tolki padrychtoŭčyja pracy, uziali za heta 846 tysiač rubloŭ, patracili jašče 1,1 miljona rubloŭ svaich hrošaj, a napisańnie samoj kampjutarnaj prahramy pierakinuli na pryvatnaha subpadradčyka. Toj uziaŭ 100 tysiač rubloŭ, ale prahramu taksama nie zrabiŭ. U vyniku praz čatyry hady prahramy niama, i epapieju pa jaje stvareńni pačynajuć nanoŭ.
U Biełarusi hadami pracuje sistema prodažu kanfiskataŭ — heta tysiačy i tysiačy samych roznych rečaŭ, ad mašyn da nasieńnia, jakija stanoviacca ŭłasnaściu dziaržavy pa rašeńni sudoŭ.
Realizacyjaj zajmajecca Kiraŭnictva spraŭ prezidenta, kramy jość pa usioj krainie.
Niahledziačy na vielizarnyja abjomy, usia rabota pa ŭliku dahetul viadziecca miechanična. Nad tym, kab jaje aŭtamatyzavać, Kiraŭnictva spraŭ prezidenta zadumałasia jašče ŭ 2015-m. A karystacca stvoranaj prahramaj musiŭ Departamient humanitarnaj dziejnaści.
U prezidenckim ukazie №63 ad 19 lutaha 2016 napisali, što hienieralnym raspracoŭščykam sistemy «Kanfiskat» staŭ dziaržaŭny chołdynh «Ahat», padparadkavany Dziaržvajenpramu. Sistema musiła zapracavać ad pačatku 2018 hoda.
Letam 2016 hoda Departamient humanitarnaj dziejnaści zaklučyŭ damovu z «Ahatam» na 5 miljonaŭ rubloŭ. Za paŭtara hoda treba było napisać kampjutarnuju prahramu, ale niešta pajšło nie tak.
Mimachodź hetaja historyja zhadvałasia padčas letašniaj inśpiekcyi Łukašenkam uradavaj suviazi.
«Voś u nas niadaŭna Kiraŭnictva spraŭ zamoviła ŭ adnoj našaj firmy zrabić cełuju sistemu. Hrošy ŭziali. Hod nie zrabili, dva, try. Pravalili! Kiraŭnictva spraŭ ciapier kryŭduje i mnie dakładvaje, što heta tyja vinavatyja, nie zrabili. A ty dzie byŭ? Ty hrošy płaciŭ, ty zamoviŭ tavar. Pryjšoŭ čas, tavaru niama, hrošy vykarystaŭ. Voś jon vinavaty i ty vinavaty! Navošta vy bieraciesia za toje, što nie možacie? A ŭzialisia — rabicie. I jany mahli heta zrabić, ale dumali, što heta sydzie z ruk», — skazaŭ Łukašenka Šejmanu.
«Naša Niva» daviedałasia akaličnaści hetaj historyi i paćvierdziła, što hnieŭ Łukašenki datyčyć mienavita epapiei miž Kiraŭnictvam spraŭ i «Ahatam» praź sistemu «Kanfiskat».
U kantrakcie byli prapisany kankretnyja etapy vykanańnia, niekatoryja davoli banalnyja: «analiz prahramna-techničnaha zabieśpiačeńnia», «analiz pradmietnaj vobłaści», «zakup i ŭstanoŭka abstalavańnia (kampjutaraŭ — Red.)» i hetak dalej. Samaje ciažkaje, naturalna, stvareńnie samoj sistemy.
«Ahat» daŭ rady tolki samamu prostamu: «pravioŭ abśledavańnie» za 353 tysiač rubloŭ, «pastaviŭ abstalavańnie» za 456 tysiač (jašče ŭ 2016 hodzie zakupiŭ kampjutary, jany ŭžo daŭno sastareli).
Nu i jašče pa drobiazi, ahułam asvoiŭšy 846 tysiač biudžetnych rubloŭ.
Ale jak stajali spravy z napisańniem samoj prahramy? A nijak.
Nibyta na realizacyju dvuch prahramnych etapaŭ «Ahat» nakiravaŭ i 1,11 miljona rubloŭ ułasnych srodkaŭ — heta adlustravana ŭ dakumientacyi.
Nakolki viadoma «Našaj Nivie», nivodnaha akta vykananych rabot ci navat techničnych prajektaŭ pa hetych etapach vyšejšym arhanizacyjam nie pradastaŭlałasia. Niezrazumieła, što ŭ realnaści zroblena za hetyja hrošy.
A ŭžo padychodziŭ dziaržaŭny dedłajn…
Naprykancy 2016-ha ŭ «Ahacie», peŭna, zrazumieli, što sami raspracavać ničoha nie zmohuć, i addali častku zadač pryvatnaj firmie «Kampit Technoładžys» (Compit Technologies), suma kantrakta była 995 tysiač rubloŭ.
Kampanija za niekalki miesiacaŭ pavinna była zrabić toje, što nie moža «Ahat», ale… taksama nie zdoleła, zaciahvajučy realizacyju.
Zabiahajučy napierad, skažam, što adkaznyja asoby hetaj kampanii na pytańnie, čamu ničoha nie atrymałasia, nijak nie adkazali «Našaj Nivie», spasłaŭšysia na damovu ab kanfidencyjnaści.
Praŭda, i ŭsiu abiacanuju sumu «Kampit Technoładžys» nie atrymała, a tolki kala 100 tysiač, zhodna z płanam vypłat pa fakcie vykanańnia.
Miž tym čas išoŭ, i Departamient humanitarnaj dziejnaści pačaŭ svarycca z «Ahatam» i patrabavać spłaty niaŭstojki za nievykanańnie rabot. Havorka viałasia pra sumy 3,49 miljona rubloŭ i 1,54 miljona rubloŭ.
Sud kožny raz pryznavaŭ «Ahat» vinavatym, ale źmianšaŭ vypłaty prykładna ŭ 100 razoŭ. Vidać, kab nie stavić na kaleni pradpryjemstva, jakomu hetaja zamova na 5 miljonaŭ, naadvarot, miełasia dapamahčy ŭmacavacca.
U svaju čarhu, pa nieviadomych pryčynach, kiraŭnictva «Ahata» nie padavała ŭ sud na «Kampit Technoładžys» i nie pryciahvała kampaniju sumiesnym adkazčykam pa svaich sudach, pałochajučy zamiest taho naličeńniem niaŭstojki. Na śniežań 2018 hoda niaŭstojka vyrasła ŭžo da 1 442 917 rubloŭ — takija listy słaŭ kiraŭnik «Ahata», hienierał Hienadź Kazakoŭ, jaki z vajskovych suviazistaŭ vyras da top-mieniedžara.
Pradčuvajučy kiepskuju raźviazku, «Kampit Technoładžys» praviała fint: rearhanizavałasia, stvaryła novuju jurydyčnuju asobu «Kampit Ekśpiert», jakoj i pieradała abaviazki pa kantrakcie z «Ahatam».
Łohika, peŭna, była ŭ tym, što ŭ «Kampit Ekśpierta» nie było nijakaj majomaści, i ŭ vypadku sudu jaje b prosta zbankrucili. A «Kampit Technoładžys» cichieńka pačaŭ likvidoŭvacca.
U toj ža čas kiraŭnik «Ahata» Hienadź Kazakoŭ sprabavaŭ adsunuć dedłajny. Pieršy raz nie vyjšła — na liście Dziaržvajenprama Łukašenka napisaŭ rezalucyju: «Čym vy dumali raniej?» Atrymałasia z druhoj sproby praz pasiarednictva Saŭmin: «Čamu nie vykanany ŭkaz №63? Raspracavać z ulikam strohaj ekanomii biudžetnych srodkaŭ da 7 listapada 2019», — napisaŭ Łukašenka.
Vidać, novaja prałanhacyja damovy nie asabliva vyratoŭvała «Ahat», tamu ad niavykrutki i z «ulikam maštabnaści prajekta» pradpryjemstva paviedamiła Departamientu humanitarnaj dziejnaści, što 5 miljonaŭ nasamreč im mała, dla skančeńnia patrebna… 20 miljonaŭ!
Kiraŭnik spraŭ prezidenta Šejman, napeŭna, ad takoha ašaleŭ.
Potym u hnieŭnym liście premjer-ministru Siarhieju Rumasu jon pisaŭ, što, kab paśpieć zdać prahramu, jany źmienšyli patrabavańni da «Ahata» «pa kolkaści infarmacyjnych resursaŭ i sistem na 40%, da abjektaŭ infarmatyzacyi na 31%, da funkcyj i patrabavańniaŭ da ich realizacyi — na 24% i 17% adpaviedna, da arhanizacyj karystalnikaŭ (klijenckich miescaŭ) — na 18%».
«Ale niahledziačy na skaračeńnie abjomu rabot, «Ahat» prainfarmavaŭ Kiraŭnictva spraŭ prezidenta ab mierkavanym pavieličeńni koštu raspracoŭki sistemy z 5 da 20,2 miljona rubloŭ. Śpiecyjalnaja ekśpiertnaja hrupa zrabiła ekśpiertyzu i vyniesła rašeńnie, što zavyšeńnie cany nieabhruntavanaje», —
Šejman prasiŭ Rumasa paŭpłyvać na Dziaržvajenpram i «Ahat», kab damova była vykananaja, bo «niekanstruktyŭnaja pazicyja «Ahata» stavić pad pahrozu vykanańnie daručeńnia prezidenta».
I razam z hetym zaŭvažaŭ, što «razhlad pytańnia pracoŭnaj hrupaj nie źjaŭlajecca pieraškodaj dla pracy nad prahramaj». Napeŭna, i ŭ hety čas rabota nie viałasia?
Ciarpieńnie Šejmana skončyłasia letam 2019 hoda, kali jon znoŭ dakłaŭ Rumasu, što «Ahat» zryvaje «Kanfiskat».
Nibyta, na hetaj nocie Łukašenka nakłaŭ rezalucyju skončyć damovu i spahnać niaŭstojku.
U vieraśni 2019 hoda Ekanamičny sud Minska razhladaŭ pazoŭ Kiraŭnictva spraŭ da «Ahata» na sumu 4 800 522 rubloŭ, ź jakich zadavoliŭ 50 tysiač, u śniežni — zadavoliŭ 5 tysiač rubloŭ z 449 tysiač.
Takim čynam, upustuju zmarnavanyja dva miljony i amal čatyry hady pieraradzilisia ŭ vyhladzie novaha tendara Departamienta humanitarnaj dziejnaści, jaki ŭžo vyjhrała kampanija «Todes» — jana hatovaja raspracavać i ŭkaranić prahramu za 3,9 miljona rubloŭ, a nie za 20 miljonaŭ, jak prasiŭ «Ahat».
Ci jość vinavatyja? Naturalna, takich niama. Nakolki viadoma «Našaj Nivie», siłavyja i kantralujučyja orhany hetaj historyjaj pakul nie cikaviacca.
A čym skončyłasia historyja z kampanijaj-padradčykam?
Jašče ŭ kancy 2018 hoda «Ahat» u asobie jaje dyrektara Hienadzia Kazakova daravała «Kampit Ekśpiertu» 1,3 miljona rubloŭ niaŭstojki, «kab zachavać dobryja adnosiny».
***
Tekst padrychtavany z vykarystańniem materyjałaŭ, ananimna dasłanych u telehram-kanał HARBACEVIČ.
Kamientary