U Viciebsku pamierła 58-hadovaja žančyna ź pnieŭmanijaj. Svajaki: U jaje byŭ karanavirus. Minzdaroŭja: Covid-19 nie było
18 sakavika ŭ Viciebsku pamierła 58-hadovaja Taćciana Chuziejeva. Žančynu špitalizavali z zapaleńniem lohkich.
Hetuju infarmacyju kanału «Harbatsevich» paćvierdzili viciebskija miedyki.
Svajaki kažuć, što Chuziejevaj zrabili i test na karanavirus — jon byŭ stanoŭčy.
Ale aficyjnaj pryčynaj śmierci ŭ paśviedčańni paznačany nie karanavirus.
«Taćciana nikudy nie jeździła, jana zvyčajnaja piensijanierka. Była doma, chadziła ŭ kramu, usio jak zvyčajna, — raspaviała «Našaj Nivie» niaviestka pamierłaj. — Niekalki dzion tamu joj stała kiepska. Paru razoŭ vyklikali i doktara dadomu, i chutkuju dapamohu. Ale tolki praź piać ci šeść dzion jaje špitalizavali ŭžo ź pnieŭmanijaj», — raspaviała surazmoŭca.
— Paźniej nam skazali, što analizy pakazali najaŭnaść karanavirusa: ci jaho vyjavili pry pastupleńni Taćciany ŭ balnicu, ci paśla ŭskryćcia, dakładna ja nie viedaju».
Testy zahadali zdać i svajakam pamierłaj. Ciapier jany ŭ chatnim karancinie, čakajuć vynikaŭ. Kažuć, prykmietaŭ zachvorvańnia ŭ ich pakul niama.
«U Taćciany byli i spadarožnyja prablemy sa zdaroŭjem: vysoki cisk, cukroŭka. Aficyjnaj pryčynaj śmierci, kaniečnie, napisali nie karanavirus. Ale voś taki fakt», — kaža niaviestka.
Pa niepaćvierdžanaj infarmacyi, Chuziejeva jašče niekalki dzion chadziła ŭ palikliniku na ŭkoły. Ciapier rabotnikaŭ palikliniki i balnicy, jakija kantaktavali ź joj, taksama adpravili zdavać testy.
20 sakavika žančynu pachavali.
Niaviestka kaža, što Taćcianu Chuziejevu chavali ŭ zakrytaj trunie, apracavanaj srodkami dezyinfiekcyi. Pachavańnie było zakrytym, prysutničali tolki blizkija členy siamji.
Padčas padrychtoŭki publikacyi my nieadnarazova telefanavali ŭ pres-słužbu Ministerstva achovy zdaroŭja, ale nichto nie zdymaŭ trubku.
Pavodle aficyjnych źviestak Minzdaroŭja, pa stanie na 18 sakavika karanavirus u Biełarusi byŭ vyjaŭleny ŭ 69 čałaviek, tolki ŭ 12 ź ich nazirajucca kliničnyja prykmiety infiekcyi, jašče ŭ 42 pacyjentaŭ virus paćvierdžany testami, ale prykmietaŭ infiekcyi niama. 15 pacyjentaŭ užo vypisany z vyzdaraŭleńniem.
Dapoŭniena:
«Dyjahnazaŭ u jaje šmat, ale hetaha [karanavirusa] niama», — adkazała «Našaj Nivie» paśla publikacyi pres-sakratarka Ministerstva achovy zdaroŭja Julija Baradun.
Na sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?7
Kamientary