Siamja ź Minska raskazała, što dva ich svajaki lažać z karanavirusam u ciažkim stanie

Siamja narakaje, što mužčyna byŭ špitalizavany ź pnieŭmanijaj 17-ha, ale karanavirus im paćvierdzili tolki 27-ha, paviedamlaje radyjo «Svaboda». Abo jon zaraziŭsia ŭ balnicy, abo pieršy analiz, niahledziačy na najaŭnaść pnieŭmanii, daŭ pamyłkovy vynik.

«Ciapier tata ŭ infiekcyjnym špitali ŭ krajnie ciažkim stanie na štučnaj vientylacyi lohkich», — kaža dziaŭčyna N.

Sama jana znachodzicca ŭ 4-m minskim špitali jak kantakt pieršaha ŭzroŭniu razam ź inšymi svajakami.

Chvoramu mienčuku 60 hadoŭ. Dačka raspaviadaje, što ŭ jaho byŭ narmalny stan zdaroŭja, biez chraničnych zachvorvańniaŭ, jon nie pje i nie kuryć.

Niadaŭna jon prastyŭ, dzion piać nie chadziŭ na pracu, prosta adležvaŭsia, a paśla znoŭ pajšoŭ na pracu, bo ŭsio było dobra.

Ale 12 sakavika jon iznoŭ adčuŭ siabie kiepska. Tempieratura nie spadała, siamja vyklikała doktara.

«Doktar pryjechaŭ, skazaŭ bolš pić vadkaści i źbivać tempieraturu paracetamołam. Doktar, darečy, byŭ biez bachił svaich, my jamu prapanavali pakiety na nohi, i jon pahadziŭsia, — kaža dačka. — Baćku lepš nie rabiłasia, tempieratura ŭvieś čas 38».

17 sakavika, kaža dziaŭčyna, baćku vyklikali chutkuju i advieźli ŭ 3-ci špital.

«Jamu zrabili analizy, i zdymak pakazaŭ pnieŭmaniju, i jaho pakłali ŭ pulmanałohiju. Na karanavirus taksama tady brali analiz, i jon byŭ admoŭny, — raskazvaje jana. — Na nastupny dzień tempieratura apuściłasia da 37, ale praz dva dni znoŭ padniałasia. Kali my razmaŭlali ŭ toj viečar, jon dychaŭ tak, nibyta tolki prabieh kros. I pačaŭ kašlać, choć doktar raniej kazaŭ, što ŭ lohkich ničoha niama».

Dalej stanovišča baćki tolki horšała, kaža dziaŭčyna.

«U paniadziełak 23 sakavika maci pryjechała ŭ špital i pačała damahacca, kab ź im niešta rabili. Kazała: «Ja baču, što my zdavali jaho ŭ lepšym stanie, a ciapier jahonaje stanovišča našmat horšaje». Tam pačali mitusicca, chacieli adpravić jaho na renthien, ale tak i nie davieźli, a adrazu adpravili ŭ reanimacyju, bo jamu było vielmi kiepska. Tam dali kisłarodnuju padušku padychać», — raskazvaje jana.

Užo ŭviečary, kaža dziaŭčyna, baćka byŭ na aparacie štučnaj vientylacyi lohkich. U jaho taksama ŭziali analiz na karanavirus.

«U piatnicu 27 sakavika nam paćvierdzili, što ŭ jaho karanavirus», — raskazvaje dziaŭčyna. 

U piatnicu 27 sakavika ŭviečary dachaty im pazvanili z «rajonnaj sansłužby».

«Skazali, kab my źbiralisia ŭ špital, udakładnili, chto z nami žyvie. Mama maja adrakłasia špitalizacyi, bo z nami žyvie jašče tatava mama, joj 93 hady, i jana ŭ lažačym stanie, dahladać za joj niama kamu. U mamy ŭziali padpisku, što jana nie budzie vychodzić dva tydni z doma. U subotu z našaj zvyčajnaj palikliniki pryjechali i ŭziali analizy ŭ mamy i ŭ babuli, — kaža dziaŭčyna. — A mianie i majho maładoha čałavieka pryvieźli ŭ 4-y špital, zrabili kardyjahramu, bijachimiju kryvi, test na karanavirus i fluarahrafiju».

Paćvierdžany analiz na karanavirus maje i ciotka dziaŭčyny — rodnaja siastra mužčyny, jaki ciapier u reanimacyi. Pierad špitalizacyjaj jaje dačka dała intervju kanału «Narodny reparcior». Jana śćviardžaje, što jaje mama taksama trapiła ŭ reanimacyju z karanavirusam, ale jaje stan lepšy.

«U jaje cukrovy dyjabiet, i ŭ jaje zdaryłasia mazhavaja niedastatkovaść, niejki zboj u razumovaj dziejnaści. Vyklikali chutkuju, pryvieźli ŭ 3-ci špital, pastavili branchit i adpravili dachaty, — kaža dziaŭčyna. — Jaje stanovišča pahoršała mocna. A ŭ piatnicu pryjšoŭ jaje stanoŭčy analiz na karanavirus. Jaje zabrali ŭ hetym kupale i ŭsiu jaje siamju — dačku z mužam i dziciom i druhuju dačku z dvuma dziećmi taksama adpravili ŭ špitali na karancin».

N. raspaviadaje, što ŭ noč, kali ich pryvieźli ŭ špital, pierad imi byli špitalizavanyja 64 čałavieki. Na nastupnuju ranicu ŭvieś ichny pavierch byŭ zapoŭnieny, tamu jaje stryječnuju siastru ź dziećmi pakłali na inšym paviersie. Usio heta — kantakty pieršaha ŭzroŭniu.

U jaki momant baćka zachvareŭ na karanavirus, siamja nie viedaje.

«Pieršy analiz na karanavirus byŭ admoŭny, — razvažaje dziaŭčyna. — Z druhoha boku, kali jon byŭ adziny, kaho pieravieźli z 3-ha špitala ŭ infiekcyjny, atrymlivajecca, što zarazny byŭ mienavita jon».

Jana nie vyklučaje, što asłableny paśla pieršaj chvaroby, baćka moh padchapić karanavirus niedzie ŭ horadzie.

Atrymać kamientar u Ministerstvie achovy zdaroŭja pakul nie ŭdałosia.

• 0
• 0
• 0
• 0
• 0
• 0