Fond Navalnaha rassakreciŭ rezidencyju Pucina z «sałonam pryhažości»
Paplečniki Alaksieja Navalnaha 15 krasavika apublikavali śviežaje rasśledavańnie ab nieruchomaści Uładzimira Pucina.
Kali samy papularny film Fondu baraćby z karupcyjaj (FBK), jaki vyjšaŭ u studzieni, byŭ pryśviečany pałacu ŭ Hielendžyku, jaki farmalna nie naležyć Uładzimiru Pucinu, to ŭ novym rasśledavańni pryvodziacca padrabiaznaści ab aficyjnaj rezidencyi prezidenta RF na Vałdai. Tekstavaja viersija rasśledavańnia była apublikavanaja ŭ błohu Alaksieja Navalnaha, jaki znachodzicca ŭ kałonii, piša newsru.com.
U publikacyi adznačajecca, što ŭ Pucina, akramia Kramla, jość try aficyjnyja rezidencyi: «Bačaroŭ Ručaj» (Sočy), «Nova-Aharova» (Maskoŭskaja vobłaść) i «Vałdaj» (Naŭharodskaja vobłaść). Pry hetym apošniaja rezidencyja časta zhadvajecca ŭ ŚMI, ale aficyjnych zdymkaŭ ź jaje niama. Adnak u FBK zmahli sabrać niamała infarmacyi ab hetym kompleksie.
Z dakumientaŭ vynikaje, što rezidencyja raźmieščana na dvuch učastkach. Tak, učastak 150 hiektaraŭ naležyć Rasijskaj Fiederacyi i znachodzicca ŭ biesterminovym karystańni ŭ Fiederalnaj Słužby achovy (FSA). Na hetaj ziamli raźmieščany techničnyja budynki, uklučajučy składy, haražy i anhary, a taksama nievialikija haściavyja domiki. U toj ža čas druhi ŭčastak płoščaj 100 hiektaraŭ, na jakim znachodziacca asnoŭnyja abjekty rezidencyi, dziaržavie nie naležyć — im vałodaje biznesmien i blizki siabar Uładzimira Pucina Juryj Kavalčuk, jaki zdaje ziemli i pabudovy ŭ arendu ŭpraŭleńniu spravami prezidenta (USP).
«Jak u jaho naohuł apynułasia hetaja ziamla, čamu pucinskuju rezidencyju pabudavali na pryvatnaj terytoryi? Dy prosta tamu, što ŭ apošnija miesiacy jašče pieršaha svajho prezidenckaha terminu, u 2003 hodzie, Pucin zadumaŭsia pra budučyniu. Adža dobra zachavać dačku. Voś jon i vyrašyŭ pakinuć hetuju sabie. Na siabie nie aformiš — tamu aformiŭ na siabra», — ličać u FBK.
Pavodle danych paplečnikaŭ Navalnaha, Kavalčuk vałodaje abjektam praz kampaniju «Prajm», amal usie dachody jakoj prypadajuć na arendnyja płaciažy ad USP. Tak, u 2019 hodzie firma Kavalčuka zarabiła 312 młn rubloŭ, a hodam raniej — 304 młn rubloŭ. Dachody kampanii za apošnija 10 hadoŭ skłali 2,7 młrd rubloŭ.
Što ž tyčycca pabudoŭ na terytoryi rezidencyi, to ŭ rasśledavańni zhadvajecca paraŭnalna ścipły hałoŭny dom vyšynioj čatyry pavierchi i płoščaj 3,5 tys. kvadratnych mietraŭ.
Na terytoryi taksama jość kitajski paviljon, jaki vykarystoŭvajecca ŭ jakaści haściavoha domika. Jaho budavała taja ž firma «Kreda», što ciapier adkazvaje za budoŭlu pałaca pad Hielendžykom. U śpisie pabudoŭ taksama jość łaźni, altanki, restaran i piŭny restaran, chatki i dziciačaja placoŭka. Taksama ŭ rezidencyi jość Uładzimirskaja carkva.
«Zdavałasia b, nu rezidencyja i rezidencyja. Što «Nova-Aharova», što sočynskaja, što hetaja — usio adno i toje ž. Dziarždača. Ale «Vałdaj» chavajuć nie prosta tak. Bo tut, u 350 mietrach ad asnoŭnaha doma staiŭsia hałoŭny vałdajski sakret Pucina, chram jaho askiezy.
Dom, u dva razy bolšy za samu rezidencyju. Amal 7000 kvadratnych mietraŭ. 3 pavierchi, ź jakich dva pad ziamloj. <…> Heta SPA-kompleks, jaki taksama aranduje USP. Asabisty sałon pryhažości i dohladu siabie dla Uładzimira Uładzimiraviča Pucina», — havorycca ŭ publikacyi.
U hetym budynku raźmieščany kryjakamiera dla amaładžalnych pracedur, fłoat-basiejn dla źniaćcia stresu, kabiniety kaśmietołaha i stamatołaha, masažnyja vanny, zvyčajny 25-mietrovy basiejn, chamam i saŭna. Asobna ŭ FBK źviarnuli ŭvahu na raźmieščany ŭ budynku masažny błok, dzie siarod inšaha jość podyum dla tajskaha masažu. «Masažnaje kresła, jakoje aśviatlaje śpiecyjalnaja infračyrvonaja lampa (tolki heta adno kresła kaštuje bolš za paŭmiljona rubloŭ). Nu a ŭ siaredzinie pakoja — łožak, zaštorany ciulevym bałdachinam. <…> Na adnoj ścianie kieramičnaje pano z archidejami, a na druhoj — pano ź mienš hučnaj nazvaj «zihuli», — adznačajecca ŭ tekstavaj viersii rasśledavańnia.
U budynku spa-centra taksama jość spalnia, sierviravalny pakoj, 500-mietrovaja haścioŭnia z akvaryumam, dapamožnaje pamiaškańnie dla jakoha maje płošču 13 kvadratnych mietraŭ. U padvale raźmieščany techničnyja pamiaškańni i pakoi piersanału, uklučajučy dapamožnaje pamiaškańnie dla hrazielačeńnia (padobny pakoj mieŭsia na płanie pałaca ŭ Hielendžyku) i pakoj śpiecsuviazi.
Usiaho USP aranduje na terytoryi amal 80 budynkaŭ. Pry hetym padrabiaznaści ab umovach arendy nieviadomyja, a ŭ dakumientach Rasrejestru nazirajecca błytanina. Z materyjałaŭ 2009 hoda, raźmieščanych na partale dziaržzakupak, možna daviedacca, što na terytoryi rezidencyi, akramia zhadanych pabudoŭ, jość stajnia, placoŭka dla holfa, placoŭka dla mini-holfa, vip-restaran z kinazałam, boŭlinham, biljardnaj i mini-kazino (ab pakoi dla kazino raspaviadałasia i ŭ rasśledavańni pra pałac na ŭźbiarežžy Čornaha mora).
U FBK dadali, što na praciahu 20 hadoŭ z boku FSA za abjekt adkazvaŭ Valeryj Pikaleŭ, jaki niadaŭna byŭ pryznačany vice-hubiernataram Sankt-Pieciarburha.
Čytajcie taksama: Fond Navalnaha vypuściŭ rasśledavańnie pra «pałac Pucina». Jon abyšoŭsia ŭ $1,35 miljarda
Tur patłumačyŭ, što Łukašenka mieŭ na ŭvazie, kažučy pra pryznačeńnie dyrektaraŭ u pryvatnyja kampanii7
Kamientary