Pakinuli dla rasijan i ciažarnych? Čamu niemahčyma znajści kitajskuju vakcynu
Alaksandr Łukašenka zajaviŭ, što ni Pfajzier, ni Madernu, ni inšyja zachodnija vakcyny ad karanavirusa ŭ našu krainu zavozić nie buduć. U biełarusaŭ zastalisia varyjanty pryščapicca albo «Sputnikam V» ci «Sputnikam łajt» albo kitajskaj vakcynaj VeroCell. Apošniuju znajści dosyć ciažka na praciahu apošnich paru tydniaŭ. Raźbirajemsia, u čym pryčyny.
«Chacieŭ pryščapicca kitajskaj vakcynaj VeroCell, ale ŭ majoj minskaj 25-j paliklinicy niekalki tydniaŭ tamu jaje nie akazałasia. Tady mnie kazali, što vakcyna zastałasia tolki dla tych, kamu patrebna druhaja doza. Pryjšłosia pryščapicca rasijskim «Sputnikam», — raskazaŭ Pavieł ź Minska. — U svajakoŭ z Oršy padobnaja historyja.
Tam jany pryščapilisia kitajskaj vakcynaj, a kali pryjšli praź niekalki tydniaŭ pa druhuju dozu, im adkazali, što vakcyny niama, treba čakać miesiac, pakul pryjdzie novaja partyja».
Anałahičnuju historyju raskazaŭ i čytač ź Minska. Pa jaho słovach, kitajskaja vakcyna zastałasia tolki ŭ adnym minskim špitali.
«Prapanujuć pryščeplivacca «Sputnikam», — kanstatavaŭ jon.
Z anałahičnaj situacyjaj sutykajucca mnohija biełarusy. Tak, žurnalisty Onliner siońnia prajechalisia pa punktach vakcynacyi ŭ Minsku i nie znajšli ni ŭ adnym kitajskaj vakcyny. U niekatorych punktach na dźviarach visiać abjavy «Kitajskaj vakcyny niama».
Da hetaha pra adsutnaść kitajskaj vakcyny pisaŭ i partał dev.by. Prahramist z rasijskim hramadzianstvam sprabavaŭ atrymać pryščepku ad karanavirusa. Pa jaho słovach, zastaŭsia tolki «Sputnik» za 140 rubloŭ, a kitajskaj VeroCell za 250 rubloŭ niama.
Kolki doz kitajskaj vakcyny patrapiła ŭ Biełaruś?
Pryščaplać biełarusaŭ kitajskaj vakcynaj VeroCell pačali z sakavika biahučaha hoda. Jak paviedamlała Ministerstva achovy zdaroŭja Biełarusi, 15 sakavika ŭ krainu pastupiła 100 tysiač doz vakcyny. Joj spačatku pryščaplali miedykaŭ.
18 maja Biełaruś atrymała jašče 300 tysiač doz vakcyny biaspłatna ŭ miežach humanitarnaj dapamohi. A ŭžo 9 vieraśnia — 1,5 miljona doz, ź jakich 500 tysiač byli biaspłatnymi.
Aficyjna: «Prablem z kitajskaj vakcynaj niama, jana nakiravana ciažarnym»
Siońnia ministr achovy zdaroŭja Dźmitry Pinievič zajaviŭ, što ciapier u abarocie ŭ Biełarusi znachodzicca 800 tysiač doz roznych vakcyn. Praŭda, kolki ź ich kitajskich, nieviadoma.
«Na hetym tydni čakajecca pastupleńnie jašče adnoj partyi (vierahodna, havorka pra vakcynu «Sputnik V» — zaŭv. «NN»), a na nastupnaj — vialikaj partyi kitajskaj vakcyny, — adznačyŭ ministr. — Što tyčycca kitajskaj vakcyny, to jana ŭ bolšaj stupieni nakiravanaja na vakcynacyju ciažarnych i kormiačych maci. Jana jość i nakiravanaja ŭ rehijony. Prablem z kitajskaj vakcynaj niama».
Kolki doz vakcyny prylacić u nastupnaj partyi, ministr nie ŭdakładniŭ.
Miž tym, sapraŭdy, u instrukcyi da rasijskaj vakcyny napisana, što ciažarnych žančyn joj vakcynavać nielha. Dla imunizacyi budučych mam rekamiendavana VeroCell.
Hałoŭny doktar 21-j centralnaj rajonnaj palikliniki Zavodskaha rajona Natalla Myśliŭčyk raskazała ahienctvu «Minsk-Naviny», što ŭ Minsku VeroCell buduć užyvać vyklučna dla vakcynacyi ciažarnych.
«U stalicy hety preparat pastupić va ŭstanovy achovy zdaroŭja vyklučna dla vakcynacyi ciažarnych, bo inšyja antykaranavirusnyja vakcyny, dazvolenyja da ŭžyvańnia ŭ Biełarusi, im nie padychodziać», — adznačyła jana.
Kolki ŭ Biełarusi ciažarnych? Pa źviestkach na 23 kastryčnika, u krainie było pryščeplena 400 ciažarnych. Heta skłała 2,5% ad patrebnaj kolkaści, adznačaŭ hałoŭny sanitarny doktar Biełarusi Alaksandr Tarasienka. To-bok, usiaho płanujuć pryščapić 16 tysiač ciažarnych. Dyk što z astatnimi dozami?
Pakidajuć pryščepku dla rasijan?
Miž tym aktyŭna raspaŭsiudžvajucca čutki, što častku kitajskaj vakcyny prychavali dla rasijan. Čamu? Reč u tym, što ŭ Rasii vykarystoŭvajecca tolki dva typy vakcyn — «Sputnik V» i EpiVacCorona.
Ale dla pajezdak u Kitaj patrebna mienavita kitajskaja vakcyna VeroCell. Pry čym niavažna, dzie jana zroblenaja. Pradstaŭniki pasolstva KNR u Maskvie paćvierdzili «Našaj Nivie» hetuju infarmacyju.
«Vizavy servisny centr krain Azii paviedamlaje: Kitaj sapraŭdy pryznaŭ vakcynacyju kitajskim preparatam u luboj krainie. Adnak baki abaviazany pradstavić aficyjny siertyfikat ab vakcynacyi kitajskaj vakcynaj. Kali zacikaŭlenaja asoba pryščeplena ŭ Respublicy Biełaruś kitajskaj vakcynaj, to jana pavinna źviarnucca ŭ Ministerstva achovy zdaroŭja Biełarusi pa aficyjnaje paśviedčańnie ab vakcynacyi kitajskaj vakcynaj.
Taksama nieabchodna nataryjalna zavieryć pierakład na kitajskuju movu ŭ pasolstvie Kitaja ŭ Biełarusi dla vykarystańnia jaho ŭ jakaści aficyjnaha paśviedčańnia dla akazańnia dapamohi ŭ padačy zajavy na vizu», — idzie havorka ŭ adkazie ad pasolstva.
Vidavočna, što adnym z prostych vychadaŭ dla rasijan, što źbirajucca ŭ Kitaj, — pryščapicca ŭ Biełarusi i atrymać patrebny siertyfikat. Tym bolš, jak my pisali vyšej, košt pryščepki dla zamiežnikaŭ — 250 rubloŭ. Aficyjna infarmacyi pra masavyja tury vakcynacyi ŭ Biełaruś pakul niama.
Miž tym navat za minuły pandemijny hod rasijanie naviedali Kitaj 306 tysiač razoŭ. U 2019-m kolkaść pajezdak dasiahała 2,6 miljona.
Kamientary