Film tydnia: «Paralelnyja maci». Novaja stužka Almadovara, jakoj 9 chvilin apładziravali u Vieniecyi

3 lutaha ŭ biełaruskich kinateatrach vychodzić novaja drama ispanca Pedra Almadovara «Paralelnyja maci». Karcinu ŭžo viedajuć u śviecie — jana była filmam-adkryćciom 78-ha Vieniecyjanskaha mižnarodnaha kinafiestyvala, i tam stužku sustreli dzieviacichvilinnaj avacyjaj.

Pra što «Paralelnyja maci»

Hałoŭnyja hieraini stužki — ispanki Dženis i Anna, jakija stali maci ŭ adzin dzień. Dženis — prafiesijnaja fatohrafka va ŭzroście za tryccać, što čakaje dzicia ad žanataha kryminalista-antrapołaha Artura.

U pałacie špitala, dzie Dženis źbirajecca naradžać dzicia, jana sustrakaje jašče adnu budučuju maci, Annu. Heta dziaŭčyna-padletak, jakaja zaciažarała pry davoli składanych abstavinach. Abiedźvie žančyny naradžajuć dačok u adzin i toj ža dzień i dapamahajuć adna adnoj padčas pierachodu ŭ status maci. Dalej losy žančyn pieraplatajucca.

Paralelna z matyvam maciarynstva — darečy, lubimym Almadovaram — režysior uzdymaje jašče i temu vajny. Dženis, žycharka Madryda, zachoplenaja adnoj metaj — raskryć u jaje rodnaj vioscy masavaje pachavańnie achviar hramadzianskaj vajny, dzie lažać pareštki jaje pradzieda i jaho paplečnikaŭ, čyju pamiać nichto nikoli nie ŭšanoŭvaŭ naležnym čynam.

Dženis choča heta vypravić, bo niekali jana dała abiacańnie svajoj babuli dastojna pachavać pradzieda, jaje baćku. Babula, što i vyraściła Dženis, apošni raz bačyła tatu va ŭzroście svaich dziesiaci hadoŭ, kali jaho zabrali z domu fałanhisty — pradstaŭniki hałoŭnaj partyi pry tatalitarnym režymie Franka.

Krus i Almadovar

Krytyki asabliva adznačajuć ihru Pieniełopy Krus, što vykanała hałoŭnuju rolu — Dženis (darečy, nazvali jaje ŭ honar śpiavački Dženis Džoplin).

Na kinafiestyvali ŭ Vieniecyi pracu Krus adznačyli ŭznaharodaj za najlepšuju žanočuju rolu.

Pieniełopa — daŭniaja muza Almadovara. U ich sumiesnym pasłužnym śpisie vosiem filmaŭ, dzie Krus syhrała hałoŭnyja roli, a Almadovar vystupiŭ u jakaści režysiora. Usio pačałosia sa stužki «Žyvaja płoć» u 1997 hodzie. Krus śviedčyć, što jana i Almadovar amal adrazu pasiabravali, a za bolš čym 20 hadoŭ uvohule stali amal siamjoj.

U niadaŭnim intervju aktrysa raspaviała pra asablivaści hienijalnaha ispanca. Naprykład, Krus kaža, što Almadovar vielmi lubić smačnuju ježu, i roznyja stravy časta zajmajuć važnyja miescy ŭ jaho filmach. U stužcy 2006 hoda «Viartańnie» takoj stravaj byŭ desiert fłan, a ŭ vypadku z «Paralelnymi maci» heta amlet.

Rejtynhi na suśvietnych resursach

IMDB - 7,1/10,

Rotten Tomatoes - 97%.

Vosiem filmaŭ i mini-sieryjałaŭ pra tyranaŭ i dyktatury, jakija varta pahladzieć

Kino na viečar: top-5 navinak ad Netflix, jakija vyjšli na hetym tydn

• 1
• 0
• 0
• 0
• 0
• 0