Viadoŭca «Aroł i reška», baksior, zorka Playboy. Chto ź viadomych ukraincaŭ udzielničaje ŭ abaronie krainy
Vajna abjadnała narod Ukrainy pierad adnoj metaj: adstajać volu dla siabie i krainy. Siarod tych, chto zaraz na pieradavoj, chapaje viadomych ludziej — śpievaki, televiadučyja, spartoŭcy (navat tyja, chto raniej prytrymlivaŭsia prarasijskich pohladaŭ). Raskazvajem pra ich.
Andrej Chłyŭniuk (hurt «Bumboks»)
Foty: znaj.ua, life.nv.ua.
Niekali Chłyŭniuk i jaho kalektyŭ stvaryli saŭndtrek «Vachcioram» da rasijska-ŭkrainskaha filma «Čyrvony žemčuh kachańnia». Taja pieśnia ich prasłaviła i za miežami Ukrainy, ale ciapier u śpievaka zusim inšaje žyćcio. Užo praz paru dzion paśla pačatku vajny muzykant ustupiŭ u terabaronu Kijeva i atrymaŭ zbroju.
Niekalki dzion tamu Chłyŭniuk zapisaŭ videazvarot da rasijskich akupantaŭ.
«Vas tut čakajuć u kožnaj chacie, u kožnym vaknie, kožnaja navat samaja stomlenaja stareńkaja babula vas budzie bić čarpakom, łapataj vas budzie staracca zabić, vy zrazumieli? Vas spalać za toje, što vy robicie siońnia. Vy bambicie moj horad, moj Kijeŭ», — vykazaŭsia śpiavak.
Śviatasłaŭ Vakarčuk («Okiean Jelzi»)
Śpiavak, jakomu nie patrebna pradstaŭleńnie. Na muzycy jaho hurta vyrasła cełaje pakaleńnie nie tolki ŭkraincaŭ, ale i biełarusaŭ.
Vakarčuk nie rabiŭ hučnych zajavaŭ nakont svajho žadańnia iści na pieradavuju, ale ž niadaŭna stała viadoma, što Śviatasłaŭ uvajšoŭ u skład lvoŭskaj terabarony. Pra heta napisaŭ u svaim telehram-kanale kiraŭnik Lvoŭskaj abłasnoj administracyi Maksim Kazicki. Jon adznačyŭ, što Vakarčuk źjaŭlajecca aficeram zapasu.
U kancy lutaha Vakarčuk źviarnuŭsia praź instahram da biełarusaŭ:
«Šmat hadoŭ my sustrakalisia z vami na našych kancertach. Ja bačyŭ vašy ščyryja ŭśmieški, niepadrobnuju luboŭ. Ja pamiataju, jak dziasiatki tysiač ludziej śpiavali razam z nami «Ja nie zdamsia biez boju». Asabliva žudasna zaraz razumieć, što dva dyktatary ŭciahvajuć u vajnu suprać Ukrainy i biełarusaŭ».
Śpiavak dapamahaje Radzimie nie tolki sa zbrojaj u rukach. U pačatku sakavika Vakarčuk naviedaŭ vajenny špital u horadzie Dniepr, kab padtrymać ukrainskich bajcoŭ.
Alaksandra Zaryckaja («KAZKA»)
Vy možacie pamiatać Zaryckuju pa samabytnaj pieśni «Płakała» (pabačyć videaklip možna tut). Zaraz, kali Radzima ŭ niebiaśpiecy, Alaksandra nie siadzić biez spravy — dziaŭčyna razam z mamaj zapisałasia ŭ vałanciorki. Jana źbirajecca dapamahać Ukrainie, čym moža, i kaža, što vielmi chutka navučyłasia z mamaj plaści maskirovačnyja sietki.
Śpiavačka zapisała ŭ instahramie videazvarot, dzie padzialiłasia chvalavańniem za abaroncaŭ:
«Ja kožnuju chvilinu turbujusia za našych chłopcaŭ, jakija stajać na pieradavoj. Ja navat nie mahu ŭjavić, jak im zaraz ciažka. Chaču, kab vy viedali, što my zaraz vielmi ŭ vas vierym, i my vierym u našu krainu. My vierym, što nas čakaje budučynia, što nas čakaje vielmi kłasnaja budučynia».
Vasil Łamačenka
Usie tytuły, jakija Łamačenka paśpieŭ sabrać u boksie, i pieraličyć ciažka. Samyja važnyja hučać tak: alimpijski čempijon 2008 i 2012 hadoŭ, čempijon śvietu 2009 i 2011 hadoŭ, čempijon Jeŭropy 2008 hoda.
Ciapier Łamačenka budzie abaraniać ad zachopnikaŭ svoj rodny horad — Biełharad-Dniastroŭski, što ŭ Adesskaj vobłaści. Vasil ustupiŭ u miascovuju terabaronu. Učynak Łamačenki šmat kaho ździviŭ: raniej ličyłasia, što baksior prytrymlivajecca prarasijskich pohladaŭ.
Alaksandr Usik
Jašče adzin viadomy ŭkrainski baksior, čempijon śvietu ŭ źvierchciažkaj vahie. Niekali Usik uchilaŭsia ad adkazu na pytańnie «Čyj Krym?», padtrymlivaŭ suviaź z pravasłaŭnaj carkvoj Maskoŭskaha patryjarchata. Jaho asabliva krytykavali za ŭdzieł u stužcy «Vitaju, brat! Chrystos uvaskros» — sumiesnym prajekcie adnaho z rasijskich manastyroŭ i Kijeva-Piačerskaj łaŭry pra «vieru i siabroŭstva» rasijskich i ŭkrainskich spartoŭcaŭ.
Ale ž z pačatkam vajny ŭsio źmianiłasia. Alaksandr zapisaŭsia ŭ terabaronu Kijeva, dzie žyvie apošnija hady, a taksama vypuściŭ niekalki jarkich videazvarotaŭ. Jon zaklikaje ŭkraincaŭ abjadnacca ŭ hety ciažki čas, nazyvaje svoj narod samym mahutnym u śviecie i kaža, što hanarycca być ukraincam.
Kola Sierha
Za miežami Ukrainy Sierhu viedajuć u asnoŭnym jak viadučaha teleprajekta pra padarožžy «Aroł i reška». Aproč hetaha Kola — muzykant i paet, maje svoj hurt.
24 lutaha, u dzień napadu Rasii na Ukrainu, Sierha źbiraŭsia sustrakacca sa studentami VNU ŭ Mikałajevie, a ŭviečary ładzić vialiki kancert. Ciapier u televiadučaha zusim inšaje žyćcio: jon dałučyŭsia da vajennych, što abaraniajuć Adesu.
Dziakujučy «Arłu i rešcy» Sierhu viedajuć u Rasii, tamu jon sprabuje dahrukacca da rasijan praz svaje zvaroty. Jak i šmat inšych ukrainskich zorak, Kola zaklikaje rasijan vystupić suprać ułady:
«Fraza «my prostyja ludzi, ničoha nie možam zrabić u Rasii, nam nie dajuć vybaru» kaža tolki pra toje, što ŭ vas jość vybar. U nas niama vybaru. Tamu my abaraniajem svoj dom ad ahresara, jaki ŭ šmat razoŭ jaho pieraŭzychodzić. A ŭ vas vybar jość. I vy robicie svoj z-za strachu. I vybirajecie tuju praŭdu, jakaja apraŭdvaje vašu bajaźlivaść».
Daša Astafjeva
Adna z tych, kaho zusim nie čakaješ pabačyć u takim śpisie. Ukrainskaja madel, śpiavačka i zorka Playboy Daša Astafjeva sprabuje padtrymać ukrainskuju armiju jak moža, dla čaho i zapisałasia ŭ vałanciorki.
Zorka dapamahaje rabić ježu dla vajennych: u siecivie možna znajści zdymki, na jakich jana čyścić bulbu i narazaje ahurki razam ź inšymi žančynami. U storys Astafjeva nazyvaje heta «dniom surka», ale pry hetym vykazvaje zachapleńnie arhanizacyjaj pracy vałanciorak.
Taksama Daša dapamahaje razhružać humanitarnuju dapamohu i padrychtoŭvać jaje dla pieradačy tym, kamu humanitarka patrebnaja. A kab padtrymać ukrainskuju armiju finansava, Astafjeva navat zrabiła svaju ŭłasnuju kalekcyju NFT, usie srodki ad prodažy jakoj pojduć na karyść vajennych.
Paša Li
Paru dzion tamu hetaha akciora, jaki pajšoŭ u terabaronu, nie stała — chłopiec zahinuŭ pad abstrełami rasijskaj armii ŭ Irpieni.
33-hadovy Paša Li zdymaŭsia ŭ stužkach «Štolnia», «Tini niezabutich priedkiv», «Zustrič odnokłaśnikiv», pracavaŭ na dublažy filmaŭ.
Voś apošniaje, što jon napisaŭ u svaim instahramie:
«Za apošnija 48 hadzin jość mahčymaść sieści i fota kinuć pra toje, jak nas bambiać, a my ŭśmichajemsia, bo spravimsia, i ŭsio budzie Ukraina. My pracujem!».
«Zaŭtra 8 Sakavika, a ŭ mianie pierad vačyma žančyny, jakija raźvitvajucca z mužami». Śpiavačka Hanna Šarkunova emacyjna napisała pra vajnu
Hitler, Stalin i šmat kryvi. Voś jak napad na Ukrainu bačać karykaturysty
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni14
Kamientary