Partyja, stvoranaja pad kryłom Vaskrasienskaha, razvalvajecca. Syšoŭ jašče adzin ź jaje kiraŭnikoŭ
Havorka pra partyju «Demakratyčny sajuz». U jaje kiraŭnictvie zastalisia tolki Andrej Łankin, były ŭdzielnik štaba Capkały, i treciakurśnik jurfaka Pavieł Hardziajuk. Raskazvajem pra raskoł.
U palitradzie partyi byli čatyry čałavieki: Andrej Łankin, Andrej Kušniaroŭ, Pavieł Hardziajuk i Alaksandr Kazačok. Kušniaroŭ dałučyŭsia da biełaruskich dobraachvotnikaŭ i vajuje va Ukrainie. Nadiaŭna syšoŭ i Kazačok.
«U nas uvieś idejny, kaštoŭnasny kanflikt adbyŭsia nakont vajny va Ukrainie. Ja padrychtavaŭ zajavu ad partyi pra biahučuju situacyju, my sabralisia i pačali abmiarkoŭvać, jak dziejničać dalej, — raskazvaje jon. —
Nie ŭsie padtrymali zajavu: byli tyja, chto na baku Rasii, jany apraŭdvali pačatak vajny. Atrymaŭsia raskoł.
Ja prapanavaŭ pastavić našu pracu na paŭzu pa pryčynie taho, što kazać publična pra vajnu tak, jak heta jość pa fakcie, ryzykoŭna dla ŭdzielnikaŭ partyi.
Kazać niapraŭdu — heta nie adlustroŭvaje duch tych idej, jakija my zakładvali ŭ pracu. Jak akazałasia, nie ŭsie zakładvali, ale ja — tak. Maju ideju nie padtrymali.
Partyjcy adreahavali narmalna na moj sychod. Kanfliktaŭ ni z kim nie było. Uspryniali jak naturalny ŭčynak u suviazi z palityčnaj situacyjaj».
Pa słovach Kazačka, palitrada faktyčna spyniła svajo isnavańnie.
«Zastaŭsia arhkamitet i aktyŭ. Važna razumieć, što ŭ aktyvie partyi nie niekalki tysiač čałaviek, a niekalki dziasiatkaŭ», — dzielicca jon.
Na pytańnie, čamu Alaksandr uvohule pajšoŭ u partyju pad kryłom Vaskrasienskaha, jon adkazvaje, što na heta było niekalki pryčyn — možna było lehalna pracavać i razmaŭlać ź ludźmi.
«Pry hetym nie padviarhajučy siabie i ludziej ryzycy, — tłumačyć jon. — Druhoje — kantakt z uładami.
Paśla taho, jak uvieś chajp nakont situacyi ź biežancami ŭ Bruzhach prajšoŭ, ich usie kinuli. U ludziej nie było miedycynskaha absłuhoŭvańnia, charčavańnia. Tady šmat zrabiŭ Andrej Kušniaroŭ. Na adnoj z sustreč z Natallaj Kačanavaj my ŭźniali hetaje pytańnie, paśla čaho «Biełaja Ruś» uziała kantrol nad łahieram. Dachodziła da taho, što ich pamočniki adtelefanoŭvalisia nam i dakładvali ab praviedzienaj pracy. Jak možna było heta vyrašyć inšym šlacham, nie majučy znosin z uładaj?
Nie atrymałasia zusim z amnistyjaj. Rola partyi tut była techničnaja. Ułada nie razumieła i nie razumieje, jak adreahuje siłavy błok na toje, kali jany vypuściać hetych ludziej. A taksama, jak hetyja ludzi buduć siabie potym pavodzić.
U nas nie było mahčymaści pierakanać uładu, što jany buduć pavodzić siabie adekvatna. Jak my možam heta harantavać?»
Pakul Alaksandr nie źbirajecca źjazdžać. Ciapier jon dapamahaje ŭkrainskim biežancam z humanitarnaj dapamohaj.
«Andrej Kušniaroŭ pajechaŭ vajavać va Ukrainu, ja nie mahu pa fizičnaj formie, i maralnych sił na heta niama. U mianie atrymałasia zavieźci pradukty ŭ Čarnihaŭskuju vobłaść na pačatku vajny.
Pracuju ja kiraŭnikom IT-kampanii. U palityčnaj śfiery sprabuju zajmacca niejkimi prajektami, ale pakul publična pra ich raskazać nie mahu. Uličvajučy moj nie vielmi ŭdały dośvied z «Demakratyčnym sajuzam», u mianie ŭ kamandzie ciapier bolš ludziej, jakija nacyjanalna aryjentavanyja. Apynucca ŭ niejkim prajekcie, dzie ludzi buduć tapić za vialiki «ruski mir», nie chočacca, mnie ŭžo nie cikava».
Taksama my źviarnulisia pa kamientaryj da kiraŭnika arhkamiteta partyi Andreja Łankina.
Jon kaža, što pazicyja partyi na pačatku vajny była apublikavana ŭ telehram-kanale i ŭ Instahramie (siarod inšaha tam prapanujecca zajavić uładam, što Biełaruś nie budzie ŭvodzić vojski, i spynić vykarystańnie našaj terytoryi rasijskaj armijaj).
«Razam z Alaksandram skład arhkamiteta pakinuli jašče dva čałavieki, adnak zajaŭ nichto ź ich nie zabiraŭ. Na praciahu miesiaca jašče piać čałaviek skazali, što chočuć uziać pierapynak u publičnaj pracy praź niebiaśpiečnaje stanovišča vakoł i pabyć šarahovymi siabrami partyi.
My heta razumiejem: va ŭsich svaje siemji, pra jakija treba kłapacicca.
Try čałavieki, jakija vyjšli z arhkamiteta 24 lutaha, vykazali bolš radykalnuju pazicyju nakont vajennaha kanfliktu va Ukrainie, što supiarečyła pazicyi bolšaści «Demakratyčnaha sajuza».
Pacikavilisia ŭ Andreja Łankina, jak jon stavicca da taho, što były jaho paplečnik Kušniaroŭ ciapier vajuje ŭ pałku Kalinoŭskaha va Ukrainie.
«Heta jaho vybar. Ja pavažaju, ale padtrymać nie mahu. Jak i pieravažnaja bolšaść biełarusaŭ, ja ciapier ščyra chvalujusia za situacyju na našaj miažy.
Jak napisaŭ Alaksandr Kazačok na kanale «Mirnyja ludzi»: «Demsajuz» abjadnoŭvaje pad svaim dacham roznyja mierkavańni i roznyja pohlady. Mnohija biełarusy ciapier rozumam z Rasijaj, a sercam z Ukrainaj. Rozumam asensoŭvajuć składanaść situacyi, asabliva dla Biełarusi, a sercam chvalujucca pra hramadzian Ukrainy, jakija ciapier vymušanyja prymać nastupstvy rašeńniaŭ svaich palityčnych lidaraŭ», — ličyć jon.
Andrej dadaŭ, što ŭ składzie arhkamiteta partyi zastalisia tyja, chto «maje žadańnie i mahčymaść svarać novuju biełaruskuju palityku».
«Arhkamitet pradstaŭlaje nie rusafobaŭ ci ruskamircaŭ, nie jabaciek ci zmaharoŭ, nie ŭkraincaŭ ci palakaŭ, a biełarusaŭ — hramadzian Biełarusi, tych, chto ŭ hety składany čas znajšoŭ u sabie mužnaść hadavać i vychoŭvać svaich dziaciej na svajoj ziamli.
Ciapier bolšuju častku času my nadajem pajezdkam pa rehijonach, sustrečam z našym aktyvam i mižpartyjnym kantaktam. Tak, tolki za apošni miesiac my ździejśnili pracoŭnyja pajezdki ŭ Słuck, Niaśviž, Oršu, Hrodna i maje rodnyja Baranavičy», — skazaŭ Andrej Łankin.
Čytajcie taksama:
Pracavaŭ u Vaskrasienskaha, ciapier vajuje za Ukrainu. Prahramist z Homiela prajšoŭ nieardynarnuju evalucyju. «Tut ja na svaim miescy, mnie spakojna»
Pucin znajšoŭ vinavatych u źbiadnieńni Rasii
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu55
Kamientary