Čas, kali sonca nie hladzić u naša akonca: jak nie ŭpaści ŭ depresiju i zastacca badziorym

U toj čas jak žychary Lisabona smakujuć kavu pad zimovym soncam, žychary Rejkjavika chodziać pa vulicy amal u pryciemkach.

Tak vyhladajuć realii kožnaha śniežnia. Žychary Isłandyi atrymlivajuć u siarednim usiaho 12 hadzin soniečnaha śviatła za ceły miesiac. Heta mienš, čym Lisabon atrymlivaje za try dni, tam sonca ŭ śniežni śviecić 142 hadziny.

Nam našmat bližej da Rejkjavika, čym da Lisabona. U Minsku ŭ śniežni ŭ siarednim byvaje tolki kala 27 hadzin soniečnaha śviatła, navat u Bieraści — tolki 31 hadzina.

Voś čamu važna pasłuchać, što kažuć daktary pra niedachop sonca 

Uzrastaje ryzyka chraničnych zachvorvańniaŭ, śmiarotnaść vyšejšaja

«Mnohija ludzi ŭ zimovy pieryjad pracujuć u pamiaškańniach, čaściej karystajučysia štučnym aśviatleńniem, čym pramym soniečnym śviatłom», — kaža endakrynołah doktarka Lina Zabulenie ŭ intervju LRT.lt.

Varta pamiatać, što nie ŭsialakaje śviatło adnolkava karysnaje. Štučnyja krynicy śviatła, asabliva tyja, što vyłučajuć «błakitnaje śviatło», mohuć niehatyŭna ŭpłyvać na jakaść snu, harmanalny bałans i repraduktyŭnaje zdaroŭje.

Soniečnaje śviatło — heta jak dyryžor simfonii pryrody, jaki rehuluje rytmy našych harmonaŭ, nastroju i snu. Kali dyryžora niama, nadychodzić chaos.

Asnoŭnaja prablema, źviazanaja ź niedachopam soniečnaha śviatła — heta strata naturalnaj krynicy vitaminu D.

Kala 5% darosłaha nasielnictva ZŠA pakutuje ad siezonnaha afiektyŭnaha razładu, źviazanaha mienavita ź niedachopam soniečnaha śviatła.

Siarod simptomaŭ — pavyšany apietyt, nabirańnie vahi, praźmiernaja sanlivaść, stomlenaść, źnižanaja pradukcyjnaść, manija adkładańnia i sacyjalnaja izalacyja.

«U bolš vysokich hieahrafičnych šyrotach, dzie ŭździejańnie soniečnaha śviatła źnižajecca, nie tolki ŭzrastaje ryzyka chraničnych zachvorvańniaŭ, ale i śmiarotnaść vyšejšaja», — adznačaje doktarka Zabulenie. 

Try parady ad doktara. Adna ź ich nietypovaja

Ludzi z vysokim uzroŭniem vitaminu D zazvyčaj majuć lepšy imunitet, macniejšyja kostki, nižejšy arteryjalny cisk, lepšyja razumovyja funkcyi, zdaraviejšy son i lepšy nastroj. Usio heta dziakujučy dastatkovaj kolkaści sierataninu.

Ale atrymać dastatkova vitaminu D uzimku byvaje składana.

Hety niedachop možna kampiensavać naturalnymi sposabami — vypivajučy piać šklanak małaka abo źjadajučy piać žaŭtkoŭ štodnia. Heta pieršaja parada. Adnak takaja kolkaść moža pryvieści da rostu chalesterynu ŭ kryvi.

Druhaja — prymać preparaty vitaminu D. Ehle Hraženie, siamiejnaja doktarka kliniki «Kardealite» ŭ Koŭnie, u suviazi z hetym udakładniaje: «Najlepš zasvojvajecca vadkaja forma [vitaminu D] u kapsułach. Adnak dla tych, chto maje prablemy z zasvajeńniem, rekamiendujecca prymać vitamin u raspylenaj abo lipasamalnaj formie».

Treci sposab krychu nietypovy, ale apošnim časam jon nabiraje papularnaść: terapija čyrvonym śviatłom.

«Lampy z čyrvonym śviatłom karysnyja ŭ chałodny, ciomny siezon», — tłumačyć doktar Hraženie. «Jany stymulujuć bijałahičnyja pracesy, źnižajuć zapaleńnie, palapšajuć rehienieracyju kletak, pavyšajuć vypracoŭku kałahienu i palapšajuć nastroj».

Darečy, daśledavańni pakazvajuć, što naturalnaje dzionnaje śviatło, navat biez pramych soniečnych pramianioŭ, stanoŭča ŭpłyvaje na nastroj i zdaroŭje. Tamu nie hrebujcie špacyrami na śviežym pavietry ŭ pachmurnyja dni — jany našmat lepšyja, čym siadzieńnie ŭ čatyroch ścienach.

• 7
• 0
• 0
• 1
• 0
• 0
• 0
• 1