«Kala 80% kupcoŭ — z Rasii». Što kolki kaštuje na aŭtarynku ŭ Malinaŭcy i čaho čakać dalej
Navin na rynku beuški ŭ apošni čas niamała: ad deficytu ŭ sałonach dyleraŭ da častych vizitaŭ rasijan, ad abiacańniaŭ admianić rachunak-daviedki da strachaŭ pierad budučym padaražańniem. Čym siońnia žyvie hałoŭnaja placoŭka stalicy pa prodažy patrymanych aŭto? I — hałoŭnaje — jak źbirajecca vyžyvać zaŭtra? Piša Onliner.
«Pryvatnikaŭ tut niama»
Aŭtarynak u Malinaŭcy padzieleny pamiž jurydyčnymi asobami, jakija nazyvajuć siabie aŭtachaŭsami, aŭtakomisami, a chto i aŭtasałonam. Zamiest zvykłych karobak šourumaŭ pa kutach tulacca niahiehłyja budki z šyldami. Zaŭsiodnikaŭ heta nie biantežyć, bo hałoŭnaje na aŭtarynku — mašyna.
— 15 rubloŭ na tydzień — i možna pradavać, — ahučvaje košt arendy mužčyna, kruciačy ŭ rukach kluč z numaram.
Kamisijaj «aŭtasałony» nie abmiažoŭvajucca. U pieraliku pasłuh — vykup bitych i technična niaspraŭnych mašyn, terminovy vykup, aŭtakredytavańnie i aŭtalizinh, pryhon pad zakaz ź Jeŭropy i Amieryki.
— Kali daražej, šukajcie na centralnaj placoŭcy, — daje kirunak jašče adzin mužčyna. — Tut samy chadavy tavar — ad 3 da 5 hadoŭ. Sprava ad budynka AŭtaMOŁA «Kalco» — zakutok, dzie handlujuć vychadcy z Afhanistana, jakija zanialisia aŭtabiznesam. Da ich iduć za «biudžetnikami», starejšymi za 10 hadoŭ i koštam da 10 tysiač dalaraŭ. A pryvatnikaŭ tut niama, pradajuć tolki jurasoby.
«Voźmiem i juani»
— Tydzień maksimum, — koratka kidaje pradaviec na pytańnie, kolki budzie pradavacca bieły BMW Ch1 2018 h. v. koštam pad 32 tysiačy dalaraŭ. — Lepš adrazu z hrašyma prychodzić. Učora hetaja placoŭka była zastaŭlenaja mašynami, a siońnia bačycie — ničoha niama.
Učastak sapraŭdy pustuje. Vakoł — z tysiaču mašyn usich adcieńniaŭ šeraha, košty zasmučajuć. Nu ci ŭsialajuć upeŭnienaść — u zaležnaści ad taŭščyni kašalka.
Samaja darahaja prapanova, jakuju ŭdałosia znajści, — Audi Q8 S-Line 2019 h. v. Poŭny pryvad, aŭtamat, aryhinalny prabieh, z Hiermanii, u idealnym stanie. Košt — 96450 u.a.
Ledź tańniejšy — BMW X5 G05 2019 h. v., jaki hatovyja addać za 86750 u.a.
U BMW X2 2020 h. za 34500 u.a. — «idealny stan, maksimalnaja kamplektacyja». Pa słovach pradaŭca, mašyna «nulavaja, śviežapryhnanaja z Francyi, vykarystoŭvałasia dla test-drajvaŭ u dylera, prabieh — 13 tys. km».
Košty va ŭmoŭnych adzinkach i biełaruskich rublach, raźlik — pa kursie Nacbanka na dzień apłaty. Chacia kudy bolš słušna było b ukazvać rasijskija rubli. Pa słovach pradaŭcoŭ, asnoŭnyja ździełki tut ździajśniajuć hramadzianie susiedniaj krainy: kala 80% pakupnikoŭ — z Rasii. Najlepšy čas dla pryjezdžych — budni, tamu ŭ sieradu ludziej na rynku kudy bolš, čym pa niadzielach.
Niekatoryja zaprašajuć aŭtapadborščykaŭ. Na rynku zhadvajuć, jak hrupa rasijan zapłaciła śpiecyjalistu pa padbory, jakoha pryviezła z saboj, 100 tysiač rasijskich rubloŭ, ci 1,5 tysiačy dołaraŭ u ekvivalencie.
— Adkaznaści nijakaj, a takija kaśmičnyja hrošy, — sa ździŭleńniem kamientujuć pradaŭcy. — U nas ahlad mašyny kaštuje 60 biełaruskich rubloŭ, ekśpiert na dzień — da 240, pad kluč — 450. Bolšaść ździełak ździajśniajuć ź pierakupami — prostyja rasijanie nie lubiać napružvacca i pierahaniać aŭtamabil samastojna. Ale byvaje, što pryjazdžajuć siamjoj na adnoj mašynie, a źjazdžajuć na troch.
Havoračy pra valutu, jakoj tut rady, hrupa mužčyn (pa vyhladzie — supracoŭniki «aŭtasałona») adnadušnaja:
— Lepš vieźci dalary, a nie rasijskija rubli, kurs valut u Biełarusi vyšejšy. U Rasii 62 da 1, u nas — 70 da 1. Voś i ličycie. Na mašynie koštam 20 tysiač dalaraŭ možna stracić kala 1,5 tysiačy, kali abmieńvać hrošy ŭ Biełarusi, a nie ŭ Rasii, abo raspłačvacca nie toj valutaj. Voźmiem i juani, ale pieraličym pa kursie na dzień prodažu.
Usie havorać pra siońniašni dzień. Što budzie zaŭtra, nie biarecca prahnazavać nichto. Aptymistyčnyja ŭ adnym:
— Vy kuplajcie, my novyja pryviaziom. Našymi pasłuhami karystajucca navat aŭtasałony, jakija niadaŭna pradavali novyja mašyny.
Šmatdzietnyja siemji jak stymuł aŭtaprodažu
Jašče adzin biełaruski sakret, dziakujučy jakomu transpartnyja srodki ź Jeŭropy i Amieryki takija pryvabnyja, — ukaz №140. Dakumient na 50 pracentaŭ źnižaje mytnyja pošliny i padatki, jakija padlahajuć vypłacie pry ŭvozie ŭ krainu aŭtatranspartu, dla invalidaŭ I i II hrup, a taksama baćkoŭ sa šmatdzietnych siemjaŭ. Umova — mašyna ŭvozicca dla asabistaha karystańnia, ale chto praviaraje niuansy?
— Usia technika, što ŭvozicca ŭ krainu, razmytnivajecca na invalidaŭ i šmatdzietnych, — dzielicca sakretam zaŭsiodnik aŭtarynka. — I maci, i baćka raz na hod mohuć zavieźci pa mašynie. A kali raptam pradali i vyrašyli pryhnać novuju — ci ich vina, što nie padyšła?
Mierkavańnie: Bolšaść aŭtacentraŭ całkam pieraklučycca na beušku
Situacyju nakont prodažu mašyn z prabieham prakamientavaŭ ekśpiert u aŭtabiźniesie, hiendyrektara TAA «Aktyŭlizinh» Siarhiej Michnievič:
— Siońnia pryvabnaść patrymanych mašyn jak nikoli aktualnaja ŭ Rasii i Biełarusi — krainach, jakija z-za sankcyj daviedalisia, što takoje deficyt novych aŭtamabilaŭ. Kali b nie prablemy ź pieravodam hrošaj za miažu, abjom uvozu beuški vyras by ŭžo ciapier.
Malinaŭka — bačnaja častka aŭtarynka pa prodažy mašyn z prabieham, siońnia hetaja śfiera pajšła ŭ internet. Popyt raście, ale śviežych aŭtamabilaŭ ź Jeŭropy siońnia mienš, čym da pandemii, — aŭtazavody jašče nie zapracavali na poŭnuju siłu, tamu termin ekspłuatacyi techniki jeŭrapiejcami pavialičvajecca.
— U Rasii z novych mašyn, jakija vyrablajucca łakalna, siońnia pradajucca ŭ asnoŭnym Geely, Haval i Lada, aŭtamabilaŭ z prabieham nie chapaje, a ŭziać ich niama adkul: mnohija krainy aścierahajucca druhasnych sankcyj i abmiažoŭvajuć kantakty z rasijanami. Užyvanaja technika naŭrad ci pojdzie ŭ RF z Karei, Japonii ci Zachodniaj Jeŭropy, moža sarvacca paralelny ŭvoz, jaki sprabujuć naładzić praz Hruziju i Kazachstan.
Biełaruski kanał pastaŭki aŭtamabilaŭ z prabieham u našu krainu i ŭ Rasiju — samy prosty i tanny, jon pakul pracuje i imkniecca da pavieličeńnia mahutnaści. Čakany rost popytu padnimie košty, tamu na pytańnie, ci varta kuplać mašynu siońnia, adkažu śćviardžalna — zaŭtra jaje moža nie być ni pa jakim košcie.
— Liču, aŭtarynki ŭ Malinaŭcy i Ždanovičach — atavizm, padobnyja placoŭki daŭno syšli z krain Jeŭropy. Nie vyklučana, što na ich dziejnaść paŭpłyvaje niadaŭna apublikavany ŭkaz, jaki mianiaje praviły prodažu patrymanych aŭtamabilaŭ (pačnie dziejničać praz paŭhoda). Dakumient zabaraniaje ździełki kupli-prodažu z dapamohaj rachunku-daviedki i raźlik pamiž jurydyčnymi asobami, IP i fizičnymi asobami za najaŭnyja hrošy. Pierakupaŭ mohuć zamiaścić aŭtacentry i aŭtasałony. Vierahodna, mahčymaść pradavać novyja mašyny źniknie, jany pieraklučacca na aŭto z prabieham.
Siońnia patrymanych TS praz šourumy pradajecca bolš, čym novych — uvoz techniki ad jeŭrapiejskaha vytvorcy ažyćciaŭlajuć dylery BMW, Volkswagen i Audi, a heta nie bolš za paŭtary sotni mašyn na miesiac. Kali nie atrymajecca naładzić pastaŭki novych aŭtamabilaŭ choć ź jakich krain, bolšaść aŭtacentraŭ moža całkam pieraklučycca na beušku.
Isnuje i alternatyŭnaje mierkavańnie, jakoje vykazaŭ śpiecyjalist pa aŭtapadbory: «Kab abyści zabarony, pierakupy mohuć afarmlać damovy biez ukazańnia proźvišča pakupnika — novaha ŭładalnika ŭpišuć potym, kali jaho znojduć.
Jany ŭ lubym vypadku buduć šukać ščyliny abo šery biźnies zmušana abielicca (ale nie da kanca). Varyjantaŭ i tut niamała.
Pierakup moža adkryć IP, «viešać» aŭtamabili na siabie, ale pa papierach pradavać ich z zanižeńniem koštu, kab płacić mienš padatku (jon naličvajecca z roźnicy). Heta značyć, nazvanuju ŭ dahavory sumu buduć pieravodzić bieznajaŭnym płaciažom, a astatniaje — hatoŭkaj. Ni vykup, ni kamisijonka nie vymruć — zanadta vialiki popyt na beušku va ŭmovach deficytu novych mašyn na našym i rasijskim rynkach».
Biełarusy znoŭ mohuć uvozić elektramabili biez spłaty mytu, ale jość niuasy
Zastaniecca mienš manieŭraŭ dla padmanu pry prodažy. Što źmienić anansavanaja baza historyi patrymanych aŭto
Niekatoryja mašyny ŭ ES kaštujuć u 2-3 razy tańniej. Paraŭnali ceny na patrymanyja aŭto ŭ Biełarusi i Jeŭrasajuzie
Što zapisana aficyjnaj pryčynaj śmierci adzinaha syna Jarmošynaj?9
Kamientary