Nadaje enierhii lepš za kafiein, na 24 hadziny

Dla miljonaŭ ludziej ranica pačynajecca z kubka kavy — a moža, i dvuch. Hety napoj zdajecca mahičnym eliksiram, jaki daje siły, prymušaje pračnucca i zaradžaje enierhijaj na ŭvieś dzień. Ale voś biada: kali vy spadziajeciesia, što kava budzie vašym niastomnym spadarožnikam na praciahu pracoŭnaha dnia, chutčej za ŭsio, vy budziecie rasčaravanyja. Kava zdolnaja dać tolki karotkaterminovy zarad badzioraści.

Jak piša Daily Mail, brytanskija navukoŭcy znajšli bolš doŭhaterminovy i biaśpiečny sposab padtrymać naš mozh u tonusie.

Ich daśledavańnie pakazała, što fizičnaja aktyŭnaść nie tolki ŭmacoŭvaje cieła, ale i značna palapšaje pracu mozha, asabliva pamiać — jak karotkaterminovuju, tak i doŭhaterminovuju. Akazvajecca, ranišniaja fizičnaja nahruzka abo chutkaja treniroŭka ŭ abiedzienny pierapynak mohuć uzbadzioryć značna bolš za kubačak kavy.

U daśledavańni, vyniki jakoha apublikavanyja ŭ časopisie International Journal of Behavioral Nutrition and Physical Activity, uziali ŭdzieł 76 čałaviek va ŭzroście ad 50 da 83 hadoŭ. Udzielnikam prymacavali trekiery dla manitorynhu snu i fizičnaj aktyŭnaści, a taksama pravodzili štodzionnyja kahnityŭnyja testy, aceńvajučy ŭvahu, pamiać, reakcyju i vyrašeńnie zadač.

Dla bolš dakładnaha analizu navukoŭcy vykarystoŭvali ałharytm mašynnaha navučańnia, jaki analizavaŭ źviestki pra fizičnuju aktyŭnaść udzielnikaŭ (umieranyja i intensiŭnyja nahruzki, lohkaja aktyŭnaść i siadziačy ład žyćcia), a taksama infarmacyju pra son (jaho praciahłaść i fazy).

Navukoŭcy vyśvietlili, što ŭsiaho 30 chvilin umieranaj ci intensiŭnaj fizičnaj aktyŭnaści zdolnyja palepšyć jak doŭhaterminovuju, tak i karotkaterminovuju pamiać.

Jak tłumačać aŭtary, kali my ruchajemsia, naša cieła pačynaje vypracoŭvać bolš enierhii, a endarfiny i noradrenalin, jakija pry hetym vyzvalajucca, pavyšajuć uzrovień badzioraści, palapšajuć nastroj i robiać nas bolš enierhičnymi i ŭvažlivymi.

Daśledčyki adznačyli, što niejrafizijałahičnyja efiekty ad praktykavańniaŭ, takija jak pavyšeńnie enierhii abo palapšeńnie kancentracyi, zvyčajna karotkaterminovyja — jany doŭžacca ŭsiaho niekalki hadzin. Adnak pavodzinnyja i niejrapsichałahičnyja efiekty (naprykład, palapšeńnie nastroju i pamiaci) mohuć zachoŭvacca našmat daŭžej.

Pavialičyć

Niekatoryja atrymanyja danyja zaśviedčyli, što dobry nastroj, jaki źjaŭlajecca paśla fizičnaj aktyŭnaści, moža zachoŭvacca da 24 hadzin, a pakazčyki, źviazanyja z zachavańniem pamiaci, zastajucca pavyšanymi da 48 hadzin paśla ŭmieranaj ci intensiŭnaj fizičnaj aktyŭnaści.

Jak adznačajuć aŭtary, z-za svajho ŭździejańnia na viehietatyŭnuju niervovuju sistemu rehularnaje ŭžyvańnie 4 kubačkaŭ kavy, što ekvivalentna 400 milihramam kafieinu, moža padvierhnuć zdarovych ludziej ryzycy hipiertanii i inšych sardečna-sasudzistych zachvorvańniaŭ. Taksama dobra viadoma, što zanadta vialikaja kolkaść kafieinu moža vyklikać pačućcie tryvohi i niervoznaści. U toj ža čas daśledavańni nieadnarazova demanstravali, što fizičnyja praktykavańni palapšajuć nastroj i źnižajuć tryvohu.

Skaračeńnie spažyvańnia kavy i inšych napojaŭ, jakija ŭtrymlivajuć kafiein, moža być ciažkim pracesam i navat vyklikać simptomy admieny, uklučajučy młosnaść, stomlenaść, zaniapad sił, razdražnialnaść, drenny nastroj i «tuman u hałavie». A voś chadźba ŭ chutkim tempie ci inšaja ŭmieranaja fizičnaja aktyŭnaść efiektyŭna dapamahajuć pieramahčy hetyja simptomy.

• 21
• 2
• 0
• 5
• 1
• 2
• 0
• 1