Bolšaść z nas nie ŭjaŭlaje sabie dnia biez kubka kavy, i šmat chto raspačynaje ź jaje ranicu. Ale ci možna pić kavu na pusty straŭnik? Adkaz na hetaje pytańnie nie taki vidavočny, jak moža zdavacca.
Siarod napojaŭ, jakija my pjom čaściej za ŭsio, kava sastupaje chiba tolki vadzie. Papularnaści kavy nie pieraškadžajuć ni miascovyja tradycyi, ni asabistyja kulinarnyja pieravahi, jakija šmat u kaho byvajuć roznyja, piša onet.pl.
Ale ci nie škodna, kali my raspačynajem dzień tolki z kavy na pusty straŭnik? Heta zaležyć ad šmatlikich faktaraŭ. Pierš za ŭsio, isnuje nie tak šmat dokazaŭ, što takoje pićcio kavy škodzić zdaroŭju, ale ŭ niekatorych vypadkach jana sapraŭdy moža akazacca nie najlepšym vybaram.
Daśledavańni pakazvajuć, što kava moža spryjać pavyšanaj vypracoŭcy straŭnikavaj kisłaty. Tamu šmat ludziej ličać, što kava razdražniaje straŭnik, paharšaje simptomy kišačnych razładaŭ, vyklikaje piakotku i młosnaść. Kažuć, što hetyja simptomy paharšajucca, kali kava traplaje ŭ pusty straŭnik, ale ž niama dokazaŭ, što kava mocna źviazanaja z paharšeńniem stravavańnia, u tym liku kali jaje pjuć našča.
Inšy arhumient suprać takoha pićcia kavy — toje, što jana nibyta moža pavialičyć uzrovień harmonu stresu, kartyzołu. Hety harmon, jaki vyrablajuć nadnyračniki, dapamahaje rehulavać mietabalizm, kryviany cisk i ŭzrovień cukru ŭ kryvi, ale ž jaho pavyšany ŭzrovień moža škodzić zdaroŭju.
Kava sapraŭdy spryjaje vypracoŭcy kartyzołu. Ranicaj, kali my jaje zvyčajna pjom, u nas u kryvi i tak pikavy ŭzrovień hetaha harmonu, tamu niekatoryja ludzi i ličać, što lubimy napoj budzie spryjać tamu, kab kartyzołu było ŭ kryvi niebiaśpiečna šmat. Ale navukoŭcy kažuć, što ludzi, jakija rehularna pjuć kavu, redka majuć ad jaje pavyšany kartyzoł ci ŭvohule nie adčuvajuć niejkich źmienaŭ. Jość danyja, što niehatyŭnyja nastupstvy zanadta vysokaha ŭzroŭniu kartyzołu nie źviazanyja ź pićciom kavy.
Reč tut u inšym. Kali vy pjacie ranicaj kavu, kab lepiej pračnucca, to heta nie maje sensu, bo ŭ vas u kryvi i tak šmat kartyzołu, jaki daje adčuvańnie badzioraści. Tamu lepiej źviarnucca da kavy paźniej, kab vy sapraŭdy adčuli siabie bolš poŭnym enierhii.
Ci moža kava naškodzić?
Niezaležna ad taho, jeli vy pierad pićciom kavy ci nie, jaje ŭžyvańnie moža vyklikać niekalki drennych nastupstvaŭ. U vas moža raźvicca zaležnaść ad kafieinu, tym bolš što niekatoryja ludzi da jaho asabliva ŭraźlivyja. Kali vy budziecie pić zanadta šmat kavy, vy možacie adčuvać tryvohu, u vas moža paskorycca puls i navat raźvicca paničnaja ataka.
U niekatorych ludziej ad kavy moža zabaleć hałava, taksama ad jaje časam pavyšajecca kryviany cisk. Narešcie, kali pić na pusty straŭnik kavu z małakom ci ź niejkim raślinnym dadatkam, heta moža spryjać vialikamu rostu ŭzroŭniu cukru ŭ kryvi.
Tamu bolšaść ekśpiertaŭ rajać nie zabyvać pra zdarovy sens i nie pieravyšać rekamiendavanyja dozy spažyvańnia kafieinu (pamiatajcie, što jon taksama źmiaščajecca i ŭ harbacie). Rekamiendujecca ŭžyvać nie bolš za 400 milihramaŭ kafieinu ci 4-5 kubkaŭ kavy štodzień, a taksama nie pić kavu pierad snom. Ciažarnym žančynam i tym, chto kormić dzicia hrudźmi, varta i ŭvohule pić nie bolš za 1-2 kubki kavy ŭ dzień abo zusim ad jaje admovicca, bo kafiein lohka traplaje da budučaha dziciaci praz płacentu. Najbolš karysna pić zavarnuju kavu ci espresa, raspuščalnaja kava bolš škodnaja.
Kamientary
mnie b vašyja, jak havorycca, prablemy. skažycie lepš, jak nie abpalić vusny, kali pješ haračuju kavu ź mietaličnaha kubka, jak na fota?