Zachad, Ukraina, Kreml, Łukašenka? Chto moža stajać za zabojstvam Darji Duhinaj?

Śledčy kamitet Rasii zajaviŭ, što «vybuch aŭto, u vyniku jakoha zahinuła dačka Alaksandra Duhina, byŭ zahadzia spłanavany i nosić zakazny charaktar». Aficyjnaja pradstaŭnica MZS Rasii Maryja Zacharava zajaviła, što kali viersiju pra ŭkrainski śled u zabojstvie Darji Duhinaj paćvierdziać «kampietentnyja orhany», to havorku treba vieści pra «palityku dziaržteraryzmu Kijeva». A blizki paplečnik Duhina Jahor Chałmahoraŭ ličyć, što Darju Duhinu zabili adnačasova libierały, amierykancy i «istoty ź ES».

Pavialičyć

U svaju čarhu, daradca kiraŭnika Ofisa prezidenta Ukrainy Michaił Padalak rašuča asprečyŭ lubuju datyčnaść Kijeva da hetaha terakta: 

«Padkreślivaju, što Ukraina, biezumoŭna, da hetaha nie maje dačynieńnia, tamu što my nie kryminalnaja dziaržava, jakoj źjaŭlajecca Rasijskaja Fiederacyja, i tym bolš nie terarystyčnaja dziaržava». 

Jon taksama dadaŭ, što hetaje zabojstva śviedčyć pra baraćbu za ŭładu i ŭpłyŭ roznych hrupovak unutry Rasii.

Pavialičyć

Pra toje, što hetaja situacyja sapraŭdy moža być nastupstvam unutranaj baraćby ŭ łahiery adeptaŭ «ruskaha śvietu», i nie tolki z Rasii, źviartajuć uvahu mnohija inšyja kamientatary. Padborku aryhinalnych viersij taho, kamu moh pierajści darohu Alaksandr Duhin, sabraŭ u svaim telehram-kanale žurnalist i błohier Siarhiej Charytonaŭ.

Tak, uličvajučy toje, što, pa śviedčańniach ludziej, jakija razam ź siamjoj Duhinych u subotu prymali ŭdzieł u fiestyvali «Tradycyja», mašyna Land Cruiser Prado, jakaja vybuchnuła paśla fiestyvalu, naležyć samomu Duhinu, ale ŭ apošni momant zamiest jaho ŭ mašynu sieła dačka, Charytonavu vielmi abhruntavanaj padajecca viersija, jakuju siońnia vykazaŭ ukrainski błohier i hramadski dziejač Barysłaŭ Biareza:

vybuch, jaki adbyŭsia, — heta sproba pradstaŭnikoŭ rasijskaj «partyi vajny» prybrać samoha Duhina jak kankurenta za ŭvahu Pucina. Ale, jak heta niaredka byvaje ŭ rasijan, usio pajšło nie pa płanie.

Pry hetym Charytonaŭ źviartaje ŭvahu na toje, što apošnim časam razhortvałasia vielmi prykmietnaja miedyjnaja kampanija pa «źlivie» Duhina, u adnosinach jakoha z Pucinym prabieh chaładok z-za prynižeńnia rasijskaj armii va Ukrainie.

Charytonaŭ piša, što ŭvieś apošni tydzień u miedyja i telehram-kanałach kalakramloŭskich «jeŭrazijcaŭ» viałasia maštabnaja kampanija pa «dyskredytacyi» Duhina (zrazumieła, pa rasijskich paniaćciach). U čym tolki nie abvinavačvali kankurenty kolišniaha pucinskaha favaryta: u supracoŭnictvie z «Azovam», «viarboŭščykami ŭkrainskich nacystaŭ», «banderaŭcami», «ultrapravymi ekstremistami»… I pry hetym adkryta zaklikali Duhina admovicca ad luboj aktyŭnaści ŭ publičnaj palitycy.

Pry hetym cikava, što da kampanii ckavańnia Duhina niezadoŭha da subotniaha vybuchu padklučyŭsia i łukašenkaŭski ideołah Alaksiej Dziermant, jakoha ŭ kołach paśladoŭnikaŭ «ruskaha śvietu» niaredka nazyvajuć «biełaruskim Duhinym».

Pavialičyć

Na heta źviarnuŭ uvahu i aŭtar adnaho z adyjoznych resursaŭ pad nazvaj «Bulba priestołov'». Jon adznačyŭ, što ataki na Duhina pačalisia z 15 žniŭnia dopisami na resursach z «sietački čyrvonych jeŭrazijcaŭ, u jakich najciaśniejšyja suviazi z Łukašenkam». Jak piša ruskamirac,

«heta płatnaja sietačka, jakaja nikomu nie patrebnaja. Ščyrych mierkavańniaŭ u ich niama. A tut tydzień močać Duhina, i ja dumaju, da čaho. Ciapier zrazumieła».

Pavialičyć

I zadaje pytańnie adnosna zamoŭcy: «Biełaruskaja DRH? Łukašenku jakraz terminova treba dakazać svaju karysnaść Zachadu. Jaki ličyć Duhina hałoŭnym ideołaham Kramla. A tut za tydzień Duhina biez najmienšaj pravakacyi pačynaje luta vypisvać ź jeŭrazijcaŭ utulnaja łukašenkaŭskaja sietačka, praź jakuju jon ruchaje svaje intaresy ŭ RF… Kali viersija słušnaja, to KDB RB abo natchnialnik, druhasny padradčyk, abo niepasredny vykanaŭca».

Charytonaŭ, bieručy hetuju viersiju pad uvahu, z usimi zaściarohami adnosna śpiecyfiki resursu, raźvivaje hetuju hipotezu dalej. Mahčyma, pavodle jaho, Łukašenka zrazumieŭ, što jon — całkam niesubjektny palityk, jaki stanie nastupnaj mišeńniu rasijskaj armii paśla jaje haniebnaha paražeńnia va Ukrainie. Bo za jaho nichto zastupacca nie budzie. I vyrašyŭ, jak heta časta byvaje, «pajści na apiaredžańnie» (jak, naprykład, było ź jaho «apieradžalnym udaram pa Ukrainie») i pazbavicca ad samaha aŭtarytetnaha rasijskaha ideołaha, jaki chvareŭ na idejaju ŭklučeńnia Biełarusi ŭ skład novaj jeŭrazijskaj zvyšdziaržavy pad kiraŭnictvam Kramla? A dačka Duhina prosta apynułasia nie ŭ tym miescy nie ŭ toj čas.

Zrešty, sami prychilniki Łukašenki, viadoma, zvykła kivajuć na Zachad. Ekzatyčnuju viersiju zabojstva Duhinaj prapanuje adzin z najbolš adyjoznych režymnych prapahandystaŭ Ryhor Azaronak. Jon ličyć, što vybuch u mašynie dački Alaksandra Duhina — heta «aryhinalnaja pomsta» francuzskaha fiłosafa i publicysta Biernara-Anry Levi, jaki nibyta pakryŭdziŭsia na Duhina z-za publičnych debataŭ 2019 hoda ŭ Amsterdamie.

Pavialičyć

Ale, viadoma, u padobnych vypadkach najpierš treba stavić pytańnie — kamu hetaje zabojstva vyhadnaje? I najbolšym bieniefiecyjaram, chutčej za ŭsio, moža stać Kreml. Ekśpiert z Ukrainskaha instytuta budučyni Ihar Tyškievič ličyć, što

chto b za hetym zabojstvam ni stajaŭ, samo jano vielmi vyhadnaje pieradusim rasijskaj prapahandzie.

Prytym što sam Duhin daŭno ŭžo vypadaŭ z topavaj ideałahičnaj abojmy, jaho ŭpłyŭ nie byŭ takim, jak niekali. Tamu «krytyčnaha ŭdaru pa atačeńni Pucina niama, ale jość «prykmietny kiejs». I vobraz baćki-Duhina budzie aktyŭna raskručvacca ŚMI».

Sam fakt terakta nie tolki nie budzie ŭładami i prapahandaj admaŭlacca, ale naadvarot, stanie dla ich narožnym kamieniem. I navat nie tak dla źniešniaj, jak dla ŭnutranaj aŭdytoryi. Tyškievič ličyć:

«1. Kiejs Duhina dazvalaje zrušyć uvahu z temy Kryma. Štodzionnaja praca SPA (jak i paražeńnie celaŭ na paŭvostravie) adychodziać u cień. Klučavaja tema — terakt.

2. Pa časie heta supadaje i źjaŭlajecca dobrym prapahandysckim «razahrevam» pierad sudziliščam nad azoŭcami. Tym bolš, što abaroncaŭ Ukrainy jakraz i buduć pradstaŭlać terarystami.

3. Hety kiejs zdymaje temu paražeńnia cyvilnych abjektaŭ i achviar siarod mirnych žycharoŭ. Jakraz na fonie spynieńnia frontu i mahčymych masavych rakietnych udaraŭ pa ŭkrainskaj terytoryi.

4. Raskrutka temy terakta dazvalaje mabilizavać hramadstva na fonie strachu. I pry dalejšym jaje raźvićci (nastupnych kiejsach) aktyvizavać rekrutynh PVK abo pravieści častkovuju mabilizacyju.

I, narešcie, pasprabavać padać kiejs Duhina ŭ jakaści adnaho z klučavych pa dyskredytacyi Ukrainy svaim «advakatam» ź liku jeŭrapiejskich palitykaŭ».

Tamu, kanstatuje analityk:

«Z punktu hledžańnia rasijskaj prapahandy toje, što adbyłosia, daje mahčymaść vyjści z cełaha šerahu ideałahičnych, infarmacyjnych i palityčnych tupikoŭ. Heta vielmi ŭžo vyhadna».

Čytajcie taksama:

Padalak: Kijeŭ nie maje dačynieńnia da śmierci Darji Duhinaj

Dačku Duhina ŭzarvali, zakłaŭšy vybuchovaje prystasavańnie pad dno mašyny

«Duhin mieŭ jechać na hetaj mašynie, ale sieŭ u inšuju». Uzarvali dačku ideołaha rasijskaha impieryjalizmu Duhina

• 60
• 0
• 17
• 7
• 6
• 8
• 18
• 0