«Zamučyli pravierkami». Pradprymalniki spynili pracu ŭ 13 haradach krainy
Siońnia ŭ znak pratestu suprać rehulavańnia cen nie adkryli svaje kramy pradprymalniki minimum u 13 haradach krainy, paviedamlaje Motolko.help. Siarod ich Minsk, Hrodna, Baranavičy. Sa słoŭ pradprymalnikaŭ, asnoŭnaja pryčyna, čamu jany siońnia nie adkrylisia — niemahčymaść pracavać zhodna z novaj pastanovaj ab rehulavańni koštaŭ.
Na rynku «Univiersalny» z ranicy byli začynienyja ŭsie ralety. Pradprymalniki taptalisia pobač sa svaimi paviljonami, ale nichto ich navat nie adčyniaŭ, paviedamlaje Intex-press.by.
— Nie budziem handlavać da vychadnych dakładna, — patłumačyła adna žančyna-pradprymalnik. — A sens ciapier pracavać, tolki sabie ŭ stratu! Pry takim cenaŭtvareńni zapłaciš padatki, arendu, zarobak pradaŭcu, za miesca na rynku — i ŭsio, pojdzieš u minus.
Adzin mužčyna tłumačyć, što ŭviedzienyja abmiežavańni na nadbaŭku nie vyšej za 30% robiać ich biznes nie vyhadnym.
— Zapłaci 10% na padatki, 10% na arendu — i ničoha sabie nie zastajecca, — dadaje dziaŭčyna. — Z dapuščalnymi nadbaŭkami hetymi taksama niezrazumieła. Na dziciačy abutak jana 30%, na darosły 50%, a zakupka na abutak adnolkavaja, voś i atrymlivajecca, što budziem pracavać sabie ŭ stratu.
— Zamučyli ciapier pravierkami! — uzdychaje adzin pradprymalnik. — Patrabujuć dakumienty na tavar ledź nie sa dnia adkryćcia majho biznesu, a dzie ich ciapier ŭziać, ja ž nie zachoŭvaju ich dziesiacihodździami.
Paviedamlajecca taksama, što nie pracujuć pradprymalniki ŭ Lidzie, Maładziečnie, Mahilovie, Viciebsku i Homieli.
Siońnia pa ŭsim horadzie začynienyja handlovyja paviljony pradstaŭnikoŭ pradprymalnictva. Jany abviaścili, što staviać svaju dziejnaść na paŭzu da tych časoŭ, pakul nie atrymajuć vyraznaha tłumačeńnia, jak dalej prymianiać miechanizm cenaŭtvareńnia, paviedamiła miascovaje vydańnie «Naš kraj».
Na minułym tydni pastanovaj urada było ŭviedziena rehulavańnie cen jak na ajčynnyja, tak i na impartnyja tavary. Adnak 27 kastryčnika Saŭmin skarektavaŭ asobnyja normy pastanovy № 713. U pryvatnaści ŭdakładnieny paradak praviadzieńnia pieraacenki i daacenki reštkaŭ spažyvieckich tavaraŭ imparciorami i subjektami aptovaha i roźničnaha handlu. Ustalavany paradak adniasieńnia vydatkaŭ imparcioraŭ i subjektaŭ aptovaha i roźničnaha handlu pa fasoŭcy spažyvieckich tavaraŭ.
Akramia taho, kankretyzavany asobnyja tavarnyja pazicyi, u dačynieńni da jakich ažyćciaŭlajecca dziaržaŭnaje rehulavańnie cen.
Što zapisana aficyjnaj pryčynaj śmierci adzinaha syna Jarmošynaj?9
Kamientary