Praz vajnu ŭ Śvietłahorsku zakryłasia pradpryjemstva, jakoje nazyvali ekanamičnym cudam rehijonu. Jaho majomaść raspradaduć za daŭhi
Majomaść Śvietłahorskaha pradpryjemstva, jakoje jašče niadaŭna nazyvali «ekanamičnym cudam» rehijonu, źbirajucca raspradavać za daŭhi. Śvietłahorski zavod zvaračnych elektrodaŭ nie pracuje ŭžo bolš za paŭhoda i pavinien viarnuć banku «Dabrabyt» amal 6,2 młn rubloŭ, paviedamlaje vydańnie «Ranak».
Ekanamičny sud Homielskaj vobłaści na minułym tydni pryniaŭ rašeńnie spahnać z TAA «Śvietłahorski zavod zvaračnych elektrodaŭ» na karyść Banka «Dabrabyt» 6,19 młn rubloŭ zapazyčanaści pa kredytnaj damovie ad 12 maja 2021 hoda i 61 900 rubloŭ dziaržpošliny. Pakolki kredyt vydavaŭsia pad zakład majomaści zavoda, sud pastanaviŭ arhanizavać rasprodaž prynaležnaj zavodu nieruchomaści, zavodskaha abstalavańnia i stankoŭ, a taksama transpartu.
Z małatka pojduć cechi, składy, čatyry hruzavyja ciahačy DAF 2012 hoda vypusku, pryčepy da ich, technałahičnyja linii, stanki, piečy, termatuneli i inšaje abstalavańnie dla vytvorčaści elektrodaŭ.
Rašeńnie moža być abskardžana na praciahu piatnaccaci dzion.
Napiaredadni vajny Śvietłahorski zavod zvaračnych elektrodaŭ byŭ najbujniejšym u Biełarusi i adnym z bujniejšych u SND vytvorcaŭ zvaračnych elektrodaŭ. Pradpryjemstva adznačyli na rajonnaj i abłasnoj Doškach honaru, jano było bujniejšym eksparcioram u Rasijskuju Fiederacyju.
Pa stanie na červień 2019 hoda, na pradpryjemstvie pracavali 465 čałaviek. Ludzi atrymlivali stabilny, vyšejšy za siaredni pa rehijonie zarobak.
Vytvorčaść elektrodaŭ u Śvietłahorsku była adkryta ŭ 2005 hodzie pradpryjemstvam «Biełaja Ruś» śvietłahorskaha biznesmiena Piatra Kuźmianka.
U 2010 hodzie było stvorana TAA «Śvietłahorski zavod zvaračnych elektrodaŭ». U skład zasnavalnikaŭ uvajšło Vińnickaje publičnaje akcyjaniernaje tavarystva «PłazmaTek» — heta bujny vytvorca zvaračnych elektrodaŭ, lidar na rynku SND.
Ukrainski akcyjanier inviestavaŭ u pradpryjemstva ŭ Śvietłahorsku kala $1 młn, jany pajšli na nabyćcio novaj vytvorčaj linii pa vypusku elektrodaŭ.
U 2013 hodzie TAA «SZSE» ŭpieršyniu pryznali lepšym pradpryjemstvam-eksparcioram Homielskaj vobłaści.
Amal adrazu paśla pačatku vajny va Ukrainie ŭkrainski menedžmient Śvietłahorskaha zavoda pakinuŭ Biełaruś.
Nieŭzabavie pradpryjemstva pajšło na prastoj, a 23 sakavika na sajcie SZSE ad imia kiraŭnictva hrupy kampanij «PłazmaTek» była apublikavana zajava ab tym, što dziejnaść Śvietłahorskaha zavoda zvaračnych elektrodaŭ spyniena.
Adnačasova na sajcie «PłazmaTek» zjaviłasia paviedamleńnie i ab spynieńni dziejnaści kampanii ŭ Rasijskaj Fiederacyi.
Chakieist Baskaŭ, vajenkam Kryvanosaŭ, miedyk Rumo. Łukašenka nazvaŭ svaich davieranych asobaŭ1
Kamientary