Licej BDU i KDB ładziać sumiesny konkurs. U tym liku pra Fieliksa Dziaržynskaha
Licej BDU razam z KDB pravodzić kulturna-patryjatyčny konkurs «Pieršyja siarod roŭnych», infarmacyja pra heta źjaviłasia na sajcie navučalnaj ustanovy. Udzielničać u im mohuć vykładčyki i liceisty. Svaje talenty im prapanujuć prajavić u šaści naminacyjach. U adnoj ź ich, naprykład, kankursantaŭ prosiać namalavać komiks ab žyćciovym šlachu i dziaržaŭnaj dziejnaści Fieliksa Dziaržynskaha, piša «Zierkała».
Konkurs pravodzicca z 1 kastryčnika pa 10 śniežnia 2022 hoda. Akramia «patryjatyčnaha vychavańnia moładzi», u jaho mety ŭvachodzić:
— papularyzacyja histaryčnaj spadčyny vybitnaha ŭradženca biełaruskaj ziamli, zasnavalnika VČK-KDB Fieliksa Dziaržynskaha z dapamohaj hrafičnych ramanaŭ (komiksaŭ);
— pryciahnieńnie ŭvahi moładzi da hieraičnaha podźvihu čekistaŭ-hierojaŭ Savieckaha Sajuza srodkami videarolikaŭ u farmacie karotkich videa;
— stvareńnie sučasnych litaraturnych, muzyčnych i chareahrafičnych tvoraŭ, u jakich na vysokim mastackim uzroŭni pakazany stanoŭčy vobraz supracoŭnika orhanaŭ dziaržaŭnaj biaśpieki, najbolš abjektyŭna adlustravana dziejnaść KDB;
— raspracoŭka z vykarystańniem IT-technałohij prahramnych praduktaŭ, jakija b spryjali raźvićciu cikavaści da prafiesii supracoŭnika KDB.
Konkurs pravodzicca ŭ šaści naminacyjach. Siarod ich «hrafičny raman (komiks)», «virusnaje videa», «litaratura», «muzyka», «chareahrafija», «dydžytał-rašeńnie».
Voś, naprykład, što majecca na ŭvazie pra «hrafičny raman (komiks)». U Pałažeńni ab praviadzieńni konkursu napisana, što tyja, chto choča ŭ im udzielničać, pavinny padrychtavać malavanuju historyju (komiks), jakaja b ilustravała žyćciovy šlach i dziaržaŭnuju dziejnaść Fieliksa Dziaržynskaha. U pracy treba pakazać «vydatnuju rolu Dziaržynskaha jak zasnavalnika śpiecsłužby, vykłaści samyja jarkija momanty jaho žyćcia, cytaty i abudzić cikavaść da dalejšaha vyvučeńnia jaho histaryčnaj spadčyny». Na ŭsio pra ŭsio ŭ kankursantaŭ jość ad 5 da 20 staronak farmatu A4. Pracu možna zrabić ad ruki, z dapamohaj kampjutarnaj prahramy abo sumiaściŭšy toje i inšaje.
Vyniki konkursu padviaduć da kanca hoda. Uznaharodžvać pieramožcaŭ buduć 20 śniežnia padčas mierapryjemstvaŭ, pryśviečanych 105-hodździu orhanaŭ dziaržaŭnaj biaśpieki. Pryz dla pieramožcy ŭ kožnaj naminacyi — dypłom i 2500 rubloŭ.
Tur patłumačyŭ, što Łukašenka mieŭ na ŭvazie, kažučy pra pryznačeńnie dyrektaraŭ u pryvatnyja kampanii2
Kamientary