Rasijskija vajennapałonnyja raskazali, jak adbyvajecca kontrnastup — vačyma rasijan
Pieršyja bai ŭ vialikim nastupie Ukrainy, skiravanym na viartańnie ziamiel na poŭdni i ŭschodzie krainy, majuć vynikam pastajanny prytok ruskich pałonnych. Wall Street Journal parazmaŭlaŭ z tryma pałonnymi, jakija raskazali, jak ukrainski nastup usprymajecca ŭ rasijskaj armii.
Rasijskaj piachocie na pieradavych pazicyjach daručana strymlivać ataki ŭkraincaŭ u akopach i lasnych masivach. Jana niasie asabliva ciažkija straty. Tak kažuć ludzi, jakija zmahajucca z abodvuch bakoŭ.
Niekalki źniavolenych acharaktaryzavali maralny stan rasijskaha boku jak upadnicki.
Pa słovach vajskoŭca-kantraktnika Anatola, ludzi ŭ jaho padraździaleńni amal nie razmaŭlali adzin z adnym, kali čakali nastupu ŭkraincaŭ.
«Usie maŭčali, dumali pra svajo, hadajučy, ź jakoha boku jany pryjduć, — skazaŭ jon. — Nam było vielmi strašna. Nichto nie choča pamirać. My spadziavalisia, što kontrnastupleńnia nie adbudziecca».
Doma, u Hornym Ałtai, Anatol pracavaŭ budaŭnikom. Jon pajšoŭ vajavać va Ukrainie, bo tak zrabili siabry i znajomyja. «Prapahanda havaryła, što Ukraina drennaja, tut ludzi nacysty i hetak dalej. My čuli heta paŭsiul». Na vajnie jon byŭ kiroŭcam, ramantavaŭ mašyny i pierapraŭlaŭ apierataraŭ dronaŭ, ale miesiac tamu jaho adpravili na pieradavuju niedaloka ad pasiołka Vialikaja Navasiołka.
Na minułym tydni, pa jaho słovach, dva dni ŭsio było cicha. Ale zatym pačaŭsia mocny šturm.
Ukraincy ŭvarvalisia ŭ lesapałasu i zakidali tranšeju ručnymi hranatami. Piać inšych mužčyn pobač z Anatolem, u tym liku jaho dobry siabar Hieorhij, byli zabityja. «Ja vylez z akopa i pačaŭ kryčać: «Zdajusia, zdajusia!» — raskazvaje Anatol.
Siarod źniavolenych u Kramatorsku byli prafiesijanały, pryzyŭniki i najmity. Niekatoryja — z etničnych mienšaściaŭ Sibiry, inšyja — z Sankt-Pieciarburha abo Uładzivastoka. Mnohija nasili rvanuju bajavuju formu. Niekatoryja byli pieraviazanyja.
Anton, bajec rasijskaj vajenizavanaj hrupoŭki Storm Z, u sakaviku atrymaŭ askiepkavyja ranieńni hałavy i kaniečnaściaŭ. Ranieńnie hałavy było asabliva ciažkim, praz što jon pačaŭ zaikacca. Doktar skazaŭ, što jon nieprydatny dla praciahu bajavych dziejańniaŭ va Ukrainie, ale kamandzir zahadaŭ Antonu i inšym paranienym viarnucca na front.
Sa słoŭ Antona, bajcam Storm Z — zvyčajna heta źniavolenyja, zavierbavanyja z rasijskich turmaŭ, — nielha adstupać pad stracham rasstrełu.
Były sałdat, jaki siadzieŭ u turmie za handal narkotykami, Anton padpisaŭsia na paŭhoda bajavych dziejańniaŭ va Ukrainie za abiacańnie pamiłavańnia. Ale kamandziry stavilisia da žyćcia sałdat jak da čahości adnarazovaha, jak kaža mužčyna. Pa jaho słovach, jon pačaŭ razumieć, što ŭ hetaj vajnie «jany nie na baku tych, chto maje racyju».
Jašče adzin pałonny — pryzyŭnik Dźmitryj — skazaŭ, što jaho adpravili na daniecki front paśla minimalnaj padrychtoŭki stralby ŭ palavych umovach i akazańnia pieršaj dapamohi.
Jaho hołas dryžyć, kali jon apisvaje, jak trapiŭ pad škvalny ahoń — z tankaŭ, minamiotaŭ, artyleryi.
«Ja nie viedaŭ, što rabić, byŭ u strachu, panikavaŭ, — kaža Dźmitryj. Jon i jaho tavaryš vyjšli z akopa z padniatymi rukami. Kali ŭkraincy pakłali ich na ziamlu i źviazali ruki, z akopa vyskačyŭ jašče adzin rasiejec i kinuŭ hranaty, paraniŭšy niekalkich ukraincaŭ, pierš čym jaho zabili.
Dźmitryj spadziajecca, što jaho nie adpraviać nazad u Rasiju paśla abmienu pałonnymi. «Z ulikam taho, jak ciapier pracujuć našy struktury ŭ Rasii, kali ŭ mianie budzie mahčymaść, ja admoŭlusia ad abmienu», — kaža jon.
Usie zhadanyja pałonnyja sałdaty zdalisia dobraachvotna, što ŭ Rasii ličycca złačynstvam. Z hetaj nahody WSJ admysłova nie nazyvaje ich proźviščy.
Čytajcie jašče:
Ukrainskaje Minabarony havoryć pra ciažkuju situacyju na ŭschodzie
Kontrnastup: ukraincy ŭžo vyzvalili vosiem nasielenych punktaŭ — Minabarony
Kamientary