«Pamierci za Łukašenku». Chto taki Mikita Račyłoŭski, novy tvar prapahandy
Jašče niadaŭna jon ź ciažkaściu začapiŭsia za płatnaje miesca na nieprestyžnaj śpiecyjalnaści. Ciapier jaho prezientujuć jak «moładzievaha lidara» na šou dziaržaŭnych telekanałaŭ.
Mikita Račyłoŭski — 26-hadovaja «zorka» biełaruskaj prapahandy. Kali jašče dva hady tamu pra jaho isnavali tolki adzinkavyja zhadki, to siońnia jon časty hość na šmatlikich tok-šou na biełaruskim telebačańni.
Tam jon plažyć «nacyjanał-zdradnikaŭ» i zaklikaje nie supracoŭničać z tymi, chto «pradaŭ radzimu ŭ 2020-m».
Chto jon taki?
Račyłoŭski naradziŭsia i žyŭ u Baraŭlanach, pasiołku pad Minskam. Jahonyja baćki — prostyja rabočyja, naprykład, baćka niejki čas pracavaŭ kiroŭcam mašyny chutkaj dapamohi.
Paśla škoły chłopiec advučyŭsia ŭ Minskim dziaržaŭnym miechanika-technałahičnym kaledžy na povara i pracavaŭ kucharam u minskaj stałoŭcy. Sam siabie nazyvaŭ «miaśnikom».
U 2018-m Račyłoŭski pastupiŭ u Biełaruski dziaržaŭny piedahahičny ŭniviersitet imia Maksima Tanka na śpiecyjalnaść «Historyja i suśvietnaja mastackaja kultura». Pastupiŭ Račyłoŭski na płatnaje — heta značyć, što CT jon zdaŭ zusim-zusim słabieńka, bo prachadny bał tam na biaspłatnaje składaŭ usiaho 258, a na płatnaje — 140, to-bok prymali navat tych, chto randomna rasstaviŭ ptuški ŭ testach.
Ź nienaviśnika «raški» ŭ prapahandysta
«Pierad pastupleńniem u Biełaruski dziaržaŭny piedahahičny ŭniviersitet Mikita jeździŭ u Italiju, — raskazaŭ «Našaj Nivie» jaho były adnakurśnik. — Jon padarožničaŭ tam na mašynie i pieršy hod vučoby ŭsie vušy prakryčaŭ svaim znajomym z univiersiteta pra toje, jakaja adstałaja Rasija. A na ruce ŭ jaho na ŭsiu daŭžyniu nabitaja tatuiroŭka Salvadora Dali».
Sapraŭdy, zhodna z bazaj «Kibierpartyzanaŭ», chłopiec vyjazdžaŭ u ES bolš za 20 razoŭ.
Pry kancy pieršaha kursa svoj pieršy navukovy artykuł jon napisaŭ pra siaredniaviečnuju kulturu Zachodniaj Jeŭropy i navat zaniaŭ 2 miesca siarod studentaŭ.
Biełaruščyny jon nie lubiŭ.
«Paśla vyjaznoj pastanoŭki biełaruskamoŭnaha śpiektakla, pamiataju, jon mocna aburaŭsia: «Navošta naviazvać kałhasnuju movu, jakuju nichto nie razumieje? My starasłavianskuju taksama vučym, ale razmaŭlać na joj nichto nie zmušaje!» — zhadvaje adnakurśnik.
Vučyŭsia jon nijak.
«Na ispytach usio kataŭ sa šporaŭ abo ŭ adnahrupnikaŭ. Usie ekzamieny z šakaładkaj, zaŭsiody. Zachodziŭ samy apošni. Nie viedaŭ elemientarnych histaryčnych dataŭ i padziej, ale mieŭ 9-10 pa ŭsich pradmietach. Na ekzamienie pa krajaznaŭstvie, pamiataju, ledź nie płakaŭ, bo špory nie znajšoŭ, choć ispyt byŭ vielmi lohki», — zhadvaje adnakurśnik.
Paśla pieršaha kursa Račyłoŭski pajechaŭ na Bajkał, a zimoj pa abmienie ŭ Kazachstan. I paśla pačaŭ być aktyŭny dzie tolki možna.
«Na pieršym kursie ŭ jaho nie było źnižki na vučobu. A kali jon na druhim-trecim kursie staŭ aktyvistam, to za jaho staŭ «prasić» dekanat. A na 4-m kursie — užo rektarat. I, atrymaŭšy dypłom, pajšoŭ pastupać u mahistraturu. Na ekzamienach usie zvyčajna išli ŭ ałfavitnym paradku, a Mikita — samy apošni».
Na patoku jahonaja mianuška była «Fejk», bo kali jon u 2020 hodzie zavioŭ novyja sacsietki, to adrazu ŭ apisańni napisaŭ, što heta adzinyja sapraŭdnyja akaŭnty i ŭ jaho byccam šmat fejkaŭ. Choć nasamreč jon byŭ asabliva nikomu nie cikavy i anijakich jahonych fejkaŭ, viadoma, nichto nie stvaraŭ.
Jaho nie lubili na patoku, i jon heta adčuvaŭ, tamu navat na ŭručeńnie dypłomu nie pryjšoŭ. Nie lubili jaho, bo jon plotki zaŭsiody źbiraŭ, za śpinaj usich abmiarkoŭvaŭ i nie z samaha lepšaha boku. U hrupie nastrojvaŭ usich suprać usich, pry hetym chacieŭ zastavacca z čystymi rukami. Taksama byŭ zaŭždy taki hapavaty. Ale da vykładčykaŭ padlizvaŭsia.
Dy i ahułam pavodziny ŭ jaho byli dziŭnavatyja. Naprykład, jon nikoli nidzie nie pakidaŭ svoj zaplečnik, navat u prybiralniu ź im chadziŭ. A jašče zaŭsiody piŭ kiefir, i pra heta chadziła šmat žartaŭ.
Račyłoŭski byŭ zaŭždy skrytny i ŭsich padazravaŭ. Ale była bačnaja taksama jaho ahida da ŭsich, až da taho, što blizkim da siabie adnakurśnikam nazyvaŭ adnahrupnikaŭ «pieŭniami», i žadańnie iści pa hałovach.
Raskazvali, što ŭ kaledžy ŭ jaho adbyŭsia niejki kanflikt, dzie ci to jaho zdali, ci to jon svaich siabroŭ. Paśla hetaha jon zaŭsiody vydalaŭ asabistyja paviedamleńni paśla taho, jak napiša, nikoli nie zapisvaŭ hałasavych i nie dasyłaŭ fota.
Jašče adzin vypusknik BDPU z taho ž kursa kaža: «Mikita da niejkaha momantu byŭ nie nadta zaŭvažny. Ale ź siaredziny druhoha kursa staŭ mocna aktyŭny. Paśla hetaha było takoje adčuvańnie, što jon u BDPU ŭznačaliŭ usio zapar. Byŭ vielmi aktyŭny, až zanadta».
Da 2020-ha ŭ miedyjach Račyłoŭski nie źjaŭlaŭsia. Tolki ŭ žniŭni 2020-ha, kali jon byŭ na 2-m kursie, videa ź im vykłali ŭ kanał BDPU. Tam chłopiec raspaviadaje pra toje, što jon kiruje arhanizacyjaj Green Office BSPU, jakaja zajmajecca infarmavańniem pra mety ŭstojlivaha raźvićcia.
Tady jaho taksama prezientavali jak «udzielnika 55-ha Zornaha pachodu (pafasnaje prapahandysckaje mierapryjemstva, padčas jakoha studenty z BDPU i krainaŭ byłoha SSSR jeździać pa «miescach pracoŭnaj i vajskovaj słavy» Biełarusi — NN), finalista konkursu «Student hoda BDPU-2020» u naminacyi «Sacyjalna značnaja dziejnaść i moładzievaje lidarstva».
U vieraśni 2020-ha jon paŭdzielničaŭ u VII forumie rehijonaŭ Biełarusi i Rasii. U kamientary dla dziaržSMI Račyłoŭski vydaje niešta abstraktnaje pra «skažeńnie histaryčnaj pamiaci».
Nieŭzabavie jaho abrali «moładzievym pasłom Metaŭ ustojlivaha raźvićcia». A mienavita, pasłom 4-j mety — «Jakasnaja adukacyja». Tearetyčnaja meta «moładzievych pasłoŭ» — prasoŭvańnie metaŭ ustojlivaha raźvićcia AAN, ale ŭ nas nie atrymałasia adšukać farmalnych kryteraŭ, jakim musiać adpaviadać kandydaty.
Račyłoŭski na słužbie prapahandy
Z 5 žniŭnia 2022 hoda Mikita źjaŭlajecca kiraŭnikom Moładzievaha parłamienta i ruchu «Ruch napierad», źviazanaha ź im. Čym zajmajecca ruch — tajamnica, bo na aficyjnym sajcie infarmacyi vobmal. Uvohule dziejnaść tak zvanaha Moładzievaha parłamienta zvodzicca da imitacyi pradstaŭničaj demakratyi.
Taksama Račyłoŭski aktyŭna ŭdzielničaje ŭ «Parłamienckim schodzie Biełarusi i Rasii», dzie ŭvachodzić u «Moładzievuju pałatu pa pytańniach turyzmu i ekałohii». A na 10-m «Forumie rehijonaŭ» u červieni 2023-ha jon abmiarkoŭvaŭ z rasijskimi «maładymi parłamientarami» mahčymaści dla jašče šyrejšaha supracoŭnictva.
Z kanca 2022 hoda Račyłoŭskaha ŭsio aktyŭniej kličuć u praŭładnyja miedyja. Ën pačynaje vieści ŭłasnuju prahramu na STV, jakaja nazyvajecca «Sienat». Tam Račyłoŭski biare kamientary ŭ deputataŭ.
Na kamientary ŭ ŚMI jon taksama ščodry. U śniežni 2022-ha Račyłoŭski raschvalvaŭ rašeńnie Łukašenki nazvać 2022-hi «hodam narodnaha adzinstva». A ŭ červieni 2023-ha ahitavaŭ za «čystki» ŭ histaryčnych VNU.
Taksama Račyłoŭski prapanavaŭ zabaranić elektronnyja cyharety, ale nie zabaraniać prodažu tytuniovych vyrabaŭ.
A ŭ žniŭni 2023-ha nadyšoŭ jaho zorny čas. Heta zdaryłasia, kali jon zajaviŭ, što «hatovy adkazać za dziejańni ciapierašniaj ułady», «pamierci za Łukašenku» i «žyvymi ich (moładź z praŭładnych arhanizacyjaŭ — NN) nie voźmuć».
20 žniŭnia 2023-ha jon uschvalaŭ «mocnaje intervju Łukašenki» niekali ŭkrainskaj, a ciapier rasijskaj prapahandystcy Dzijanie Pančanka.
A 4 vieraśnia jon nakinuŭsia na błohieraŭ «Dzim Dzimyča», hurt «Drazdy» i kanał «Mierzkij Kokobaj». Račyłoŭski prapanuje abmiežavać ichniuju publičnaść za toje, što, byccam by, «u 2020-m jany chacieli razburyć krainu» i «prapahandujuć ŁHBT».
Tak moładzievy pasoł jakasnaj adukacyi kataŭ, kataŭ sa šporaŭ i ŭrešcie złaviŭ chvalu.
«Naša Niva» — bastyjon biełaruščyny
PADTRYMAĆPradstaŭnik łukašenkaŭskaha Moładzievaha parłamienta dałučyŭsia da ruchu «Supraciŭ» i raskazaŭ, jak pierajšoŭ u apazicyju
Jak małady kamunist viadzie filijał «Žoŭtych źlivaŭ» dla moładzi i vykładaje ŭ BDUIR
Bondaravaj zabaranili krytykavać «niebažycharoŭ» pad pahrozaj «vałuna ŭ padvarotni». Ale jana ŭsio adno nie moža strymacca
Na sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?7
Kamientary
Za jazyk tiebia nikto nie tianuł.Vsie vozmožno v našiem Mirie.