Pra novaha ministra zamiežnych spravaŭ Biełarusi Siarhieja Alejnika ŭ novym vypusku jutub-kanała «Tok» raspavioŭ palityčny analityk Jeŭrapiejskaj rady pa mižnarodnych adnosinach i były supracoŭnik biełaruskaha MZS Pavieł Śluńkin.
Pavieł Śluńkin padkreślivaje, što Siarhiej Alejnik i Uładzimir Makiej — dva absalutna roznyja čałavieki jak pa bekhraŭndzie, tak i pa styli pracy.
«Jak mnie zdajecca, Siarhiej Alejnik bolš miakki čałaviek. Ja za hady svajoj dypłamatyčnaj słužby nie čuŭ pra jaho nivodnaha drennaha słova. Zaŭsiody pra jaho vykazvalisia: «O, Siarhiej Fiodaravič. Heta hałava!»
Heta sapraŭdy vydatny dypłamat. Jaho na praciahu šmat hadoŭ razhladali jak zamienu Makieju. I navat niekalki razoŭ zdavałasia, što ŭžo dakładna jaho pryznačać. Ale hetaha nie adbyvałasia. Makiej dakazvaŭ svaju nieabchodnaść na hetaj pasadzie».
Z pryznačeńniem Siarhieja Alejnika, zaŭvažaje Śluńkin, źmianiŭsia farmat ci styl pracy MZS Biełarusi, ale sutnaść zastałasia taja ž. «Umovy, u jakich pracujuć biełaruskija dypłamaty, nie zaležać ad pasady kiraŭnika Ministerstva zamiežnych spraŭ.
Tudy možna pastavić, naprykład, Paŭła Łatušku, i ŭ hetych umovach ničoha inšaha nie budzie, kali jon budzie vykonvać zahady, jakija prychodziać, ci sprabavać u hetych umovach niešta rabić. Bo jość inšyja zusim faktary, jakija abmiažoŭvajuć dziejnaść dypłamataŭ.
Jany vymušany padtrymlivać hradus niehatyŭnych adnosin z zachodnimi krainami, žyć va ŭmovach sankcyj. Jany vymušany sami izalavać Biełaruś, pradavać suvierenitet Biełarusi ŭ Maskvu. Tut kaho ni pastaŭ, hetyja ŭmovy zadajucca imi samimi, ich rukami i Alaksandram Łukašenka, jaki stavić im zadačy», — miarkuje były dypłamat.
Pavieł Śluńkin adznačyŭ, što sačyŭ za zajavami MZS Biełarusi na praciahu apošniaha paŭhoda, i padzialiŭsia svaim nazirańniem: «Stylistyčna hradus jak minimum zajavaŭ Ministerstva zamiežnych spraŭ Biełarusi staŭ trošačku mienš ahresiŭnym i mienš padobnych da zacharaŭščyny (styl pradstaŭnicy MZS Rasii Maryi Zacharavaj. — NN). Ministerstva pierastała vystupać z takimi nachabnymi i absalutna niedypłamatyčnymi zajavami. Taja łuchta, što vykazvaŭ Hłaz, była ŭzhodnienaja z Makiejem.
Jak pamiatajem, była hučnaja zajava MZS adnosna Złučanych Štataŭ, kali navat syn Uładzimira Makieja vystupiŭ z krytykaj hetaj zajavy i skazaŭ, što jamu soramna za heta. Heta ŭsio Makiej uchvalaŭ. Ale zaraz, u apošnija miesiacy, jak mnie padajecca, jany sprabujuć usio ž taki štučna nie pahłyblać hety kanflikt.
A jak minimum, navat vykazvajučysia niehatyŭna pa pytańniach sankcyjaŭ ci parušeńnia miažy, zajavaŭ zamiežnych palitykaŭ nakont Biełarusi, jany ŭsio ž taki sprabujuć adkazvać vostra, ale nie tak, jak adkazvajuć pjančuhi la padjezda».
Hladzicie całkam:
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?36
Kamientary