Prapahandysty azadačylisia: jak upeŭnić narod, što miech bulby — heta kruta, a Maldyvy — nie
U tok-šou «Pa sutnaści» na STB abmiarkoŭvali sposaby baraćby z zachodnimi kaštoŭnaściami. Voś da čaho dahavarylisia.
Padčas razvah pra tradycyjnyja kaštoŭnaści viadučy Kirył Kazakoŭ zadaŭsia pytańniem:
«My adkryvajem biełaruski instahram. Znachodzim staronku dziaŭčyny, jakaja vykładvaje praktyčna kožny dzień, jak jana jeździć na darahoj mašynie, pje šampanskaje i raspaviadaje ab tym, što lacić na Maldyvy. Paralelna Ihar Tur raspaviadaje pra toje, što jamu prezident padaryŭ miech bulby. Jak upeŭnić narod, što miech bulby — heta kruta, a šampanskaje i Maldyvy — nie?»
«Heta taja materyjalnaja asnova. Heta adnosiny asoby da toj realnaści. Zrazumiejcie. Tut idzie psichałahičnaja vajna. Tut raźlik na našu mientalnaść, na jadro», — błytana jamu adkazvała prafiesarka kafiedry psichałohii, źmieściva i mietadaŭ vychavańnia Akademii paśladypłomnaj adukacyi Śviatłana Sakałova.
Na čym pahareŭ Saviecki Sajuz
Bačačy, što adkazu kankretnaha nie dačakajucca, u razmovu ŭkliniłasia druhaja viadučaja — Alena Syrova.
«Davajcie vierniemsia da bazy. Kirył pryvodziŭ prykład Savieckaha Sajuza i rekłamy. Džynsy, «Piepsi», «Koła» i hetak dalej. Toje, što nam, žycharam taho času, zdavałasia: majučy heta, my stanovimsia jak by lepšymi i prahresiŭniejšymi. Heta ž užo tady pačynałasia. Čamu ŭ nas nie zakładziena na mientalnym uzroŭni canić jakraz ža svajo i hanarycca svaim?»
Na heta pytańnie ŭziaŭsia adkazvać telepiersanaž Vadzim Baravik. Na jaho pohlad, nielha kankuravać na adnoj duchoŭna-maralnaj śfiery. Nieabchodna kankurentnaja ekanomika:
«Čamu raspaŭsia Saviecki Sajuz? Tamu što vy pieli himn, nadziavali halštuki i maryli pra juhasłaŭskija boty, i dziesiać hadoŭ stajali ŭ čarzie za aŭtamabilem. Usie chacieli žyć. Tamu pavinna być efiektyŭnaja ekanomika, kankurentny, efiektyŭny ŭzrovień žyćcia ŭ krainie. I pry hetym pravilnyja kaštoŭnaści. Heta ŭsio ŭzajemaźviazana.
Tamu Saviecki Sajuz na kryvadušnaści pahareŭ. Ja heta ŭsio pamiataju. Na kryvadušnaści. Tamu što byŭ kłub ludziej, jakija mahli sabie heta dazvolić, — tyja, što vyjazdžali za miažu, tyja, što byli pry abkamach, i hetak dalej. Astatnija smaktali łapu».
Nie tyja kaštoŭnaści
Z Baravikom pasprabavali spračacca. Prafiesarka Sakałova zaŭvažyła: «Navat zhadvajučy toj čas, pieršačarhovym byli tyja pracadni, toje, što my rabili. Naša siamja. Usio toje ž samaje».
Svajo mierkavańnie vykazaŭ prafiesar Vajennaj akademii Uładzimir Makaraŭ. Jon adznačyŭ, što ŭ asnovie ŭsich vojnaŭ nie tolki ekanomika, ale śfiera sensaŭ.
«Prablema ŭ tym, što ŭ 1961 hodzie toje kiraŭnictva zrabiła najstrašniejšuju, zdradnickuju pa sutnaści akcyju, kali pryniało prahramu KPSS dahnać i pierahnać ZŠA pa spažyvańni. Najlepšyja rozumy Jeŭropy skazali: «Što vy robicie? Vy napieradzie płaniety ŭsioj akramia spažyvańnia. Ale jano budzie aŭtamatyčna raści».
«Mienavita heta i pieramahło. Žujek i džynsaŭ nie chapiła», — dadaŭ Kazakoŭ.
«Kali abviaścili nie najvyšejšyja kaštoŭnaści», — udakładniŭ Makaraŭ.
Treba raskazvać, što ŭ Biełarusi možna zarabić. Maldyvy nieabaviazkovyja
Kirył Kazakoŭ viarnuŭ dyskusiju da jaje pačatku i źviarnuŭsia da Ihara Tura z pytańniem:
«Jak tvaim miecham bulby ad prezidenta pieramahčy ŭpeŭnienaść u tym, što charošaje žyćcio — heta «Majot» «Mazeraci»?»
Tur aznačyŭ: «Liču, što miecham bulby pieramahčy iluziju biesprablemnaha, tannaha i cudoŭnaha žyćcia niemahčyma. I sprabavać heta rabić nie treba. Pry ŭsim tym, što biezumoŭna dla mianie miech bulby ad prezidenta zjaŭlajecca kudy bolš kaštoŭnym, čym pajezdka na Dubai.
Ale ja zhodny z tym, što ekanomika ŭsio ž dla sensaŭ krytyčna važnaja. Što prapanoŭvaje zachodniaja madel? Kajfujem, adpačyvajem. Dla hetaha patrebna kuča hrošaj. Adpaviedna, kali my prasoŭvajem svaje naratyvy ab kaštoŭnaściach siamiejnych, ab usim, my pavinny taksama havaryć ab tym, što ŭ našaj sistemie kaardynat taksama možna być finansava paśpiachovym.
Heta moža być i inšy šlach. Nie abaviazkova ź niejkim starym jechać na Maldyvy ci jašče niekudy.
Ale heta možna zrabić. U sistemie dziaržaŭnaha kiravańnia, sistemie funkcyjanavańnia krainy. Adpaviedna, my pavinny pakazvać našych ludziej, jakija nie tolki zvyčajnyja, ale i paśpiachovyja. Jakija taksama svajoj pracaj zarabili prystojnuju kolkaść hrošaj».
Čytajcie jašče:
Prapahandysty znajšli zamienu Dniu śviatoha Valancina
«Heta ž prosta jeraś!» Prapahandysty sabralisia na STV abhavaryć fejki, i pakaciłasia
Vializnaja chvala zatrymańniaŭ — stała zrazumieła, na kaho hetym razam palavali KDB i HUBAZiK6
Kamientary