Kolkaść rasiejcaŭ, jakija vystupajuć za mirnyja pieramovy z Ukrainaj, upieršyniu pieravysiła kolkaść prychilnikaŭ praciahu vajny

Za mir

Krychu mienš za pałovu rasiejcaŭ (48%) upeŭnienyja, što Kramlu treba pierachodzić da mirnych pieramovaŭ u kanflikcie z Ukrainaj. Heta samy vysoki pracent takich adkazaŭ ź viasny 2022 hoda, kali pačałasia vajna. 

Suprać mirnych pieramovaŭ i za praciah «śpiecapieracyi» vystupajuć 39% respandentaŭ.

Pavialičyć

Za mirnyja pieramovy čaściej za inšyja hrupy vykazvalisia žančyny i respandenty da 45 hadoŭ, za praciah vajny — mužčyny i ludzi starejšyja za nazvany ŭzrost. Miarkujučy pa adkazach na inšyja pytańni daśledavańnia, žančyny naohuł čaściej za mužčyn vybirali najbolš mirnyja varyjanty. 

Na mierkavańnie apytanych upłyvaje i toje, ad kaho budzie zychodzić inicyjatyva mirnych pieramovaŭ. Usiaho 18% rasiejcaŭ nie padtrymajuć ich, kali adpaviednaje rašeńnie prymie Uładzimir Pucin, vynikaje z apytańnia. 

Pry hetym, bolš za ŭsio apytanych vystupili za ŭtrymańnie biahučych pazicyj na vajnie — 66%. Jašče 60% zajavili, što padtrymajuć nastupalnyja dziejańni, i ŭsiaho 32% hatovy vystupić za vyvad vojskaŭ. 

Respandentaŭ taksama spytali ab tym, na jakich umovach jany hatovy padtrymać mir Rasii i Ukrainy. Bolš za ŭsio apytanych nazvali spynieńnie hibieli ludziej (10%), pryznańnie tak zvanych «DNR» i «ŁNR» terytoryjaj Rasii (9%), pryznańnie Chiersonskaj i Zaparožskaj abłaściej častkami Rasii (7%), dałučeńnie inšych terytoryj i kapitulacyju Ukrainy (pa 6%). Taksama apytanyja zhadvali pryznańnie Kryma rasijskaj terytoryjaj, dałučeńnie ŭsioj Ukrainy, admovu Kijeva ad ustupleńnia ŭ NATA i hetak dalej.

Raniej apytańnie na anałahičnuju temu pravioŭ Levada-centr. Pa ich danych, 70% rasiejcaŭ padtrymali b spynieńnie vajny, kali b takoje rašeńnie pryniaŭ Pucin. Ale 34% zhodny na zaklučeńnie miru, kali b prezident pry hetym viarnuŭ anieksavanyja ŭkrainskija terytoryi. 

Suprać druhoj chvali

Pavodle apytańnia, bolš za pałovu rasiejcaŭ (58%) nie padtrymali b praviadzieńnie druhoj chvali mabilizacyi, za jaje praviadzieńnie — mienš za tracinu (32%). 

Na adkazy respandentaŭ taksama ŭpłyvaje toje, chto mienavita abjaviŭ by mabilizacyju. Tak, dola tych, chto padtrymaŭ by jaje, kali ab hetym rašeńni abjavić prezident, krychu ŭzrastaje. Zrešty, nie padtrymajuć jaje ŭsio roŭna bolš za pałovu apytanych — 53%. Naadvarot, 38% padtrymajuć mabilizacyju ŭ vypadku, kali jaje abvieścić Pucin.

Pavialičyć

Jak i ŭ pytańni ab mirnych pieramovach, čaściej druhuju chvalu mabilizacyi padtrymlivajuć mužčyny i starejšaje pakaleńnie. Adkazvajučy na pytańnie ab emocyjach, 61% apytanych skazali, što źviedali b niehatyŭnyja emocyi, kali b była abjaŭlena druhaja chvala. Jašče 18% uspryniali b hetuju infarmacyju spakojna, 8% — pazityŭna.

Na dumku palitołaha Kanstancina Kałačova, mužčyny ŭ pryncypie čaściej schilnyja padtrymlivać vajaŭničyja i ahresiŭnyja inicyjatyvy. «Brutalnaść, maskulinnaść i inšaje, ale ludzi časta kažuć adno, dumajuć inšaje, a robiać treciaje. Tema ŭsieahulnaj mabilizacyi syšła z paradku, tak što na froncie ŭ bližejšyja dni respandenty mužčynskaha połu siabie nie bačać», — adznačyŭ jon.

Ekśpiert taksama vykazaŭ mierkavańnie, što pieravaha mirnych nastrojaŭ siarod žančyn źviazana z tym, što jany vastrej za mužčyn adčuvajuć niehatyŭnyja nastupstvy vajny. «Žančyny pieražyvajuć za svaich mužčyn, žančyny zvyčajna nie adroźnivajucca kryvažernaściu, jany bolš praktyčnyja i bačać bytavyja vydatki zaciahvańnia kanfliktu», — dadaŭ Kałačoŭ.

Siarod apytanych Russian Field bolšaść (65%) praciahvaje ličyć, što Rasija zaraz ruchajecca ŭ pravilnym kirunku. Adnak hety pakazčyk źniziŭsia na 8 pracentaŭ u paraŭnańni z červieńskimi danymi.

U svaju čarhu, 21% rasiejcaŭ dumaje, što spravy ŭ krainie iduć niapravilna.

Taksama 56% ličać, što vajna va Ukrainie praciahvajecca paśpiachova dla Rasii, 25% upeŭnieny, što heta nie tak. Kolkaść niezadavolenych chodam «śpiecapieracyi» taksama vyrasła z červienia — na 4%.

• 2
• 0
• 1
• 3
• 0
• 1
• 3
• 0