Izrail damoviŭsia pra vyzvaleńnie 50 zakładnikaŭ u abmien na pieramirje ŭ Hazie
Taksama buduć vyzvalenyja 150 paleścincaŭ.
Urad Izraila paśla niekalkich hadzin abmierkavańnia ŭ noč na sieradu ŭchvaliŭ pahadnieńnie z hrupoŭkaj CHAMAS ab vyzvaleńni častki zachoplenych izrailskich zakładnikaŭ i čatyrochdzionnym spynieńni ahniu ŭ siektary Haza, na praciahu jakoha ŭ ankłaŭ pavinna pastupić humanitarnaja dapamoha i paliva, piša Bi-bi-si.
«Urad uchvaliŭ ahulnyja abrysy pieršaha etapu pahadnieńnia, zhodna ź jakim prynamsi 50 vykradzienych ludziej — žančyn i dziaciej — buduć vyzvalenyja na praciahu čatyroch dzion, na jakija pryjdziecca paŭza ŭ bajavych dziejańniach», — havorycca ŭ paviedamleńni kancylaryi premjer-ministra Izraila Bińjamina Nietańjachu.
U im adznačajecca, što spynieńnie ahniu moža być padoŭžanaje adnosna pieršapačatkova ŭstanoŭlenaha terminu: dla kožnych 10 vyzvalenych zakładnikaŭ budzie dadavacca jašče adzin dzień. Ułady taksama padkreślili, što paśla zakančeńnia pieramirja vajna praciahniecca.
«Urad Izraila, izrailskaja armija i siły biaśpieki praciahnuć vajnu, kab viarnuć usich vykradzienych, źniščyć CHAMAS i damahčysia taho, kab z Hazy bolš nie zychodziła nijakaj pahrozy dziaržavie Izrail», — dadali ŭ kancylaryi.
Pahadnieńnie, pasiarednikam u jakim vystupaje Katar, taksama praduhledžvała vyzvaleńnie častki paleścinskich źniavolenych ź izrailskich turmaŭ — žančyn i niepaŭnaletnich.
Praź niekalki hadzin paśla hałasavańnia ŭ Izraili Katarski MZS aficyjna paćvierdziŭ zaklučeńnie ŭhody.
«Pahadnieńnie praduhledžvaje vyzvaleńnie 50 hramadzianskich asob — žančyn i dziaciej (usiaho ŭ pałonie znachodzicca kala 240 čałaviek — NN), jakija ŭtrymlivajucca ŭ siektary Haza, u abmien na vyzvaleńnie šerahu paleścinskich žančyn i dziaciej, jakija ŭtrymlivajucca ŭ izrailskich turmach; kolkaść vyzvalenych budzie pavialičana na paźniejšych etapach realizacyi pahadnieńnia», — havorycca ŭ zajavie MZS Katara.
Katarskija ŭłady, jakija ŭdzielničali ŭ pieramovach razam z pradstaŭnikami Jehipta i ZŠA, zajavili, što čas pačatku pieramirja budzie abvieščany ciaham 24 hadzin.
Bajeviki CHAMAS nočču taksama vystupili z zajavaj, u jakoj vitali «humanitarnaje pieramirje» i paćvierdzili, što vyzvalać z pałonu 50 žančyn i dziaciej u abmien na 150 paleścincaŭ.
Pavodle źviestak pradstaŭnikoŭ CHAMAS, usia pavietranaja aktyŭnaść Izraila na poŭdni Hazy budzie spynienaja na čatyry dni, a na poŭnačy — abmiežavanaja z 10 ranicy da 16 hadzin, pakul dziejničaje spynieńnie ahniu.
«Abviaščajučy ab zaklučeńni pahadnieńnia ab pieramirji, my paćviardžajem, što našy palcy zastajucca na spuskavym kručku, a našy bajcy buduć praciahvać abaraniać naš narod i pieramahać akupacyju», — havorycca ŭ zajavie hrupoŭki.
Jak paviedamlaje Haaretz sa spasyłkaj na vysokapastaŭlenaha izrailskaha čynoŭnika, na praciahu čatyroch dzion CHAMAS vyzvalić 30 dziaciej i 20 žančyn.
«Sa słoŭ čynoŭnika, usie padraździaleńni izrailskich słužbaŭ biaśpieki — CACHAŁ, Šyn-Bet i Masad — padtrymlivajuć płanavanuju ŭhodu», — piša vydańnie.
Jak zajaviŭ žurnalistam vysokapastaŭleny pradstaŭnik amierykanskaj administracyi, Vašynhton čakaje, što kolkaść zakładnikaŭ, jakija buduć vyzvalenyja ŭ vyniku ŭhody, budzie bolšaja za 50. Usiaho ŭ pałonie ŭ bajevikoŭ znachodzicca kala 240 zakładnikaŭ.
«Struktura ŭhody takaja, što jana ŭ značnaj stupieni stymuluje vyzvaleńnie ŭsich [zakładnikaŭ]», — zajaviŭ jon na bryfinhu.
Pa danych Haaretz, šeść izrailskich balnic užo padrychtavalisia da taho, kab pryniać vyzvalenych z pałonu CHAMAS — dla ich padrychtavali asobnyja pałaty.
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?76
Kamientary