Vajna va Ukrainie pryniesła vializnyja prybytki naftahazavamu siektaru ZŠA

Jak piša The New York Times, ciapier ZŠA zdabyvaje rekordnyja 13,2 miljona barelaŭ na dzień, što bolš, čym Rasija i Saudaŭskaja Aravija. Z pačatku 2022 hoda patok nafty vyras prykładna na 800 tysiač barelaŭ na dzień, i analityki čakajuć, što da kanca nastupnaha hodu halina moža dadać jašče 500 tysiač baralaŭ na dzień (kali ceny nie ŭpaduć nižej za 65 dołaraŭ za baral). A praź piać hadoŭ ZŠA zmohuć zdabyvać 15 miljonaŭ barelaŭ na dzień.

Asnoŭnym ruchavikom takich pracesaŭ stała zapoźnienaja reakcyja na rasijskaje ŭvarvańnie va Ukrainu ŭ lutym 2022 hoda, u vyniku jakoha cana na naftu ŭpieršyniu za dziesiacihodździe pieravysiła 100 dołaraŭ za baral. Rost vytvorčaści pryvioŭ da źnižeńnia amal na 40% cenaŭ bienzinu ŭnutry krainy (z 3,5 da 1,8 dołara).

Nazirajecca i źnižeńnie cany na haz, zdabyča jakoha taksama rekordna vyrasła. Heta ŭ svaju čarhu pryviało da źnižeńnia cenaŭ na elektraenierhiju, jakaja pradukujecca na hazavych elektrastancyjach krainy.

Złučanyja Štaty ciapier ekspartujuć kala čatyroch miljonaŭ baralaŭ nafty na dzień, bolš, čym luby siabra Arhanizacyi krain-eksparcioraŭ nafty, za vyklučeńniem Saudaŭskaj Aravii.

U cełym, kraina pa-raniejšamu impartuje bolš čym ekspartuje, pakolki ŭnutrany popyt pieravyšaje prapanovu. Da taho ž šmatlikim amierykanskim naftapierapracoŭčym zavodam lahčej pierapracoŭvać ciažejšuju naftu, jakaja zdabyvajecca ŭ Kanadzie i Łacinskaj Amierycy, čym bolš lohkuju naftu z ułasnych słancavych radoviščaŭ.

Rost zdabyčy nafty ŭmacavaŭ pazicyi ZŠA ŭ adnosinach z Rasijaj, Vieniesuełaj, Iranam, pazbaviŭšy nieabchodnaści raźličvać na Saudaŭskuju Araviju ŭ jakaści partniora pa stabilizacyi suśvietnych cenaŭ na naftu.

Rost pastavak amierykanskaj nafty i pryrodnaha hazu dapamahli pieraduchilić kryzisnuju situacyju na jeŭrapiejskim rynku enierharesursaŭ minułaj zimoju. Jeŭrapiejskija krainy zamianili bolšuju častku hazu, jaki jany kuplali ŭ Rasii, hazam z ZŠA, Katara i inšych eksparcioraŭ.

Ale pavieličeńnie zdabyčy nafty ŭ ZŠA taksama chavaje vialikija ryzyki. Rost prapanovy i źnižeńnie cen mohuć pavialičyć popyt na vykapniovaje paliva i ŭ vyniku — rostu vykidaŭ parnikovych hazaŭ. Pa mierkavańni vučonych, ciapier śviet daloki ad dasiahnieńnia metaŭ, nieabchodnych dla taho, kab paźbiehnuć katastrafičnych nastupstvaŭ hłabalnaha paciapleńnia.

Nasupierak pieradvybarnym abiacańniam zabaranić zdabyču enierharesursaŭ na fiederalnych ziemlach i niahledziačy na piarečańni ekołahaŭ prezident Bajden daŭ sankcyju na novyja bujnyja prajekty pa zdabyčy nafty na Alascy.

Jaho administracyja taksama vydała nievialikuju kolkaść licenzij na pašyreńnie zdabyčy na prybiarežnym šelfie Mieksikanskaha zaliva. Adna z pryčyn takich krokaŭ — zavajavańnie hałasoŭ vybarščykaŭ za košt źnižeńnia cenaŭ na enierhanośbity.

Akramia hetaha analityki papiaredžvajuć, što Saudaŭskaja Aravija moža akazać cisk na svaich sajuźnikaŭ pa APIEK+ pavialičyć pastaŭki dla rezkaha źnižeńnia cen. Taki krok prymusić amierykanskija kampanii rezka źnizić vytvorčaść.

Čytajcie jašče:

Kyrhyzstan pad ciskam ZŠA abmiažoŭvaje tranzit sankcyjnych tavaraŭ u Rasiju

Cichanoŭskaja lacić u ZŠA

Saudaŭskaja Aravija sprabuje pieraaryjentavacca z ZŠA na Kitaj i Rasiju 

• 19
• 0
• 2
• 1
• 3
• 2
• 5
• 0