Biełarusam admovili ŭ PMŽ u Polščy z-za typu vizy. Vyhladaje, što pamyłkova, ale heta vialikaja prablema
Matyviroŭka admovy dziŭnaja: bo nie było dazvołu na pracu. Choć była humanitarnaja viza (z joj dazvołu i nie treba). Chutčej za ŭsio, inśpiektar prosta pamyliŭsia, ale biurakratyčnaja dryhva ŭžo zasmaktała biełarusaŭ.
Siamja ajcišnika Barysa Krasko žyvie ŭ Polščy ad 2018 hoda, aboje sužency lehalna pracujuć.
Na dniach jany atrymali admovu ŭ PMŽ, bo vajavoda i ŭpraŭleńnie pa spravach zamiežnikaŭ vyrašyli, byccam ajcišnik nie mieŭ prava pracavać pa humanitarnaj vizie. (Čamu jany tak vyrašyli? Zdajecca, prosta nie pračytali abnaŭleńnia zakanadaŭstva 2020 hoda). Ciapier ciaham miesiaca siamja musić pakinuć Polšču, piša Devby.io sa spasyłkaj na telehram-kanał Dzic pic.
Barys: «My majem 30 dzion na padaču apielacyi i na vyjezd z krainy adnačasova»
— Ad 2018 hoda my z žonkaj pražyvajem u Varšavie. Apošnija niekalki hadoŭ ja pracavaŭ u polskich IT-kampanijach — spačatku ŭ NSS, a zatym u Omtech, dzie zajmajusia stvareńniem prahram dla GPS-sistem. Maja žonka zajmała pasadu śpiecyjalistki administracyi ŭ transpartnaj kampanii.
U 2020-m u nas naradziłasia dačka, i my časova viarnulisia ŭ Biełaruś dla afarmleńnia pašparta i vizy dla dziciaci. Na toj momant žonka ŭžo mieła polski DNŽ, ale ja i dzicia — nie. Tady ja aformiŭ humanitarnuju vizu, ź jakoj pracavaŭ u Polščy ŭ 2021 i 2022 hadach. Žonka ŭ hety čas nie pracavała.
U 2023 hodzie žonka padała siabie i dačku na PMŽ, jany adpaviadali ŭsim kryteram. U pakiecie ŭ tym liku była maja viza D21 i pracoŭnyja kantrakty. Jak heta časta byvaje, nam nie pisali i nie telefanavali z prośbaj danieści niešta jašče.
A praz paŭhoda (za hety čas u našaj spravie źmianiłasia niekalki inśpiektaraŭ) pryjšła admova, pryčyna — adsutnaść dakumientaŭ, jakija paćviardžajuć majo prava na pracu. Maŭlaŭ, my nie dali im zezwolenia na pracę, i ŭ ich sistemie taksama niama nijakich źviestak pra toje, što vajavoda vydavaŭ mnie taki dazvoł.
My padali apielacyju na praciahu tydnia. U liście spasyłalisia na zakon i pastanovu ab humanitarnaj vizie, prykłali kopiju vizy, ale samich tekstaŭ pravavych aktaŭ nie prykładvali.
- Spačatku apielacyja traplaje nazad u pieršuju instancyju, jakaja vydavała rašeńnie, i jaje razhladaje inšy inśpiektar.
- Kali jon nie znachodzić arhumientaŭ dla źmieny rašeńnia, adpraŭlaje ŭžo ŭ druhuju instancyju. Heta ŭpraŭleńnie pa spravach zamiežnikaŭ.
My pamierkavali, što rašeńnie vydała niespraktykavanaja inśpiektarka, što jany zaŭvažać svaju pamyłku i pierahledziać našu spravu biez druhoj instancyi, takoje časta byvaje, ale sprava pajšła dalej.
Situacyja zaciahnułasia, i, niahledziačy na aficyjnyja listy z hałoŭnaha ofisa žonki, jakija zaklikajuć razhledzieć spravu pryjarytetna praź jaje klučavuju rolu ŭ kampanii, rašeńnie druhoj instancyi było admoŭnym.
1 studzienia maju žonku pavysili da Head of Administration, a 8 studzienia my atrymali adkaz ad Upraŭleńnia pa spravach zamiežnikaŭ, jaki paćviardžaje pravamiernaść admovy ŭ PMŽ z patrabavańniem pakinuć Polšču na praciahu miesiaca. Hetaja pamyłka moža abiarnucca strataj pracy, rasstańniem ź siamjoj i pierapynieńniem amal šaścihadovaha znachodžańnia ŭ Polščy.
Na ich dumku, humanitarnaja viza typu D21 nie daje dastatkovaha dostupu da rynku pracy (nasamreč daje). Heta adzinaja pryčyna admovy, i rašeńnie kančatkovaje, jano padlahaje abskardžańniu tolki ŭ sudzie. Ciapier ja taki adzin, ale padobnaja traktoŭka zakona ŭ budučyni patencyjna moža zakranuć mnohich.
Chtości spytaje, a raptam ja pracavaŭ pa humanitarnaj vizie da taho, jak heta dazvolili?
Heta nie tak, nielehalnym pryznali moj dachod za 2022 hod, kali zakon užo dazvalaŭ pracavać z D21 biez dadatkovych dazvołaŭ. Datul ja pracavaŭ pa inšaj vizie.
Žoncy maje dakumienty spatrebilisia tamu, što jana była ŭ dekrecie i zaležała ad majho dachodu. Uvieś hety čas jana mieła DNŽ.
Ciapier my znachodzimsia ŭ ciažkaj situacyi i adčuvajem siabie niamohłymi. Niaviedańnie zakonaŭ i niežadańnie inśpiektara ŭnikać u detali stanovicca surjoznym vyklikam dla zamiežnikaŭ. My majem 30 dzion na abskardžańnie ŭ sudzie i adnačasova 30 dzion na vyjezd z krainy.
Navat u vypadku pieramohi ŭ sudzie praces moža zaniać dva hady, PMŽ budzie vydadzienaje tolki paśla sudovaha rašeńnia. My atrymajem tolki nievialikuju kampiensacyju za sudovyja vydatki, kala 500 złotych, ale ŭsio roŭna majem apłacić značnyja sumy advakatu.
Juryst: «Rašeńnie dziaržorhana niepravamiernaje, ale siamju ŭsio roŭna čakaje doŭhi sudovy praces»
Jurystka i śpiecyjalistka ŭ mihracyjnych pytańniach Darja Hryšanovič upeŭnienaja, što dziaržorhan prosta pamyliŭsia, i tym nie mienš vypraŭleńnie hetaj pamyłki budzie kaštavać času i niervaŭ. Tamu lepš nie spadziavacca, što ŭžond budzie samastojna raźbiracca ŭ zakonach, a samomu adrazu prykłaści da zajavy na DNŽ/PMŽ usie mahčymyja spasyłki na zakanadaŭstva.
— Hety vypadak — jaskravy prykład taho, što pamyłki ŭ dziaržorhanach zdarajucca, — kaža Darja Hryšanovič. — U majoj karjery byli roznyja vypadki: ad zhuby dakumientaŭ da banalnaha niaviedańnia zakonaŭ rabotnikam užonda. Tak što ja raiła b usim, chto samastojna viadzie spravu:
- Zaŭsiody mieć paćvierdžańnie padačy dakumientaŭ, u tym liku dadatkovych. Potym budzie praściej dakazać fakt padačy dakumientaŭ.
- Zaŭsiody spasyłacca na pravavyja normy, prykładać teksty pravavych dakumientaŭ, asabliva tych, jakija ŭviali niadaŭna.
Rašeńnie dziaržorhana niepravamiernaje, pakolki jak vajavoda, tak i kiraŭnik pa spravach zamiežnikaŭ, nie ŭziali pad uvahu pastanovy ministra raźvićcia, pracy i technałohij ad 20 listapada 2020 hoda, jakaja pašyryła pieralik padstaŭ, kali nie treba atrymlivać dazvoł na pracu.
Pry napisańni apielacyi taksama varta paznačać pravavyja pałažeńni, jakija paćviardžajuć vašu pazicyju, i prykładvać usie mahčymyja dakumienty, bo kali dachodzić da etapu sudovaha razboru, to administracyjny sud nie pravodzić pracedury dakazvańnia, nakiravanaj na ŭstanaŭleńnie faktaŭ, a tolki praviaraje zakonnaść aktaŭ, vydadzienych administracyjnymi orhanami. To-bok sud daśleduje tyja materyjały, jakija ŭžo znachodziacca ŭ spravie.
Tym nie mienš, kali na etapie sudovaha razboru ŭ starany źjavilisia dadatkovyja dokazy, ich usio roŭna lepš prykłaści — horš nie budzie.
U apisanaj situacyi siamju čakaje sudovy praces, jaki moža zaniać hod i bolš. A sudovaje rašeńnie pry pravilna napisanaj skarzie, jakaja nie źmiaščaje farmalnych niedachopaŭ, budzie vydadzienaje na karyść siamji.
Što rabić z rašeńniem ab departacyi? Na žal, čas sudovaha pracesu nie aznačaje lehalnaha znachodžańnia ŭ Polščy.
Tamu varyjantaŭ dva: albo padparadkoŭvacca i vyjazdžać z krainy da vydačy kančatkovaha rašeńnia, albo na svaje strach i ryzyku zastavacca, razumiejučy, što lubaja pravierka pamiežnaj słužby pryviadzie da departacyi.
Ale kali pa sudovaj spravie vydaduć pazityŭnaje rašeńnie, to znachodžańnie zamiežnika budzie ličycca lehalnym ad momantu vydačy niehatyŭnaha rašeńnia administracyjnym orhanam.
Taksama ja b raiła spahnać sumu za sudovyja vydatki i advakata. Ale tut, jak i z astatnimi spravami, pryjdziecca ŭsio maksimalna vyrazna vykłaści i prykłaści ŭsie mahčymyja dakumienty i NPA.
U mahiloŭskaj kałonii pamior 22-hadovy palitźniavoleny Dźmitryj Šlethaŭer9
Kamientary