Vypadak ź biełaruskim dobraachvotnikam, jakoha zatrymali za narkotyki, aktualizuje prablemu narkamanii na vajnie. Pry hetym jana zakranaje vajskoŭcaŭ z dvuch bakoŭ ad linii frontu.
Situacyja z ukrainskaha boku
Jak pakazała daśledavańnie Global Initiative, vajna va Ukrainie sadziejničaje rostu spažyvańnia narkotykaŭ siarod sałdat, asabliva sintetyčnych rečyvaŭ. Rynak apošnich u pieryjad z 2021 pa 2023 hod vyras bolš za ŭsie padobnyja rynki ŭ śviecie.
Jak piša vydańnie, zvyčajna spažyvańnie pačynajecca z aktyŭnych ci byłych narkamanaŭ, jakich pryzyvajuć u armiju bieź nieabchodnaha miedyčnaha ahladu.
Niekatoryja sałdaty vykarystoŭvajuć narkotyki jak srodak eskapizmu, inšyja — kab adpačyć paśla niekalkich biassonnych načej pad pastajannymi abstrełami. Inšym prosta sumna. Jość i tyja, chto ŭžyvaje narkotyki, kab nie stracić pilnaść — bo niemahčyma ni na siekundu zapluščyć vočy, kali vorah znachodzicca ŭsiaho za niekalki mietraŭ.
Jak adznačajecca ŭ daśledavańni, linija frontu stała vyhadnym rynkam dla mnohich ludziej, jakija zajmajucca handlem narkotykami. Vajskoŭcam płaciać bolš, čym zvyčajnym cyvilnym, i niekatoryja sałdaty hatovyja tracić hetyja hrošy na zabavy — žančyn, ałkahol abo narkotyki.
Heta robić ich lohkaj mišeńniu dla tych, chto ŭciahnuty ŭ narkahandal, — ad miascovych žycharoŭ, jakija vyroščvajuć marychuanu ŭ siabie ŭ dvary, da arhanizavanych hrup. Hetyja złačynnyja hrupoŭki navat pieranosiać svaje łabaratoryi bližej da zony bajavych dziejańniaŭ, kab skaracić transpartnyja vydatki.
Jak śćviardžajecca ŭ materyjale, hierain i kakain praktyčna źnikli z unutranaha rynku. Samym papularnym staŭ kanabis. Pobač z hetym imkliva pašyrajecca novy narkotyk, viadomy jak «soli dla vannaŭ». Jon zamianiaje papularny mietamfietamin, na jaki vizualna padobny.
Narkotyki na front traplajuć roznymi sposabami. Nievialikija partyi dastaŭlajuć u pasyłkach poštaj, zamaŭlajuć praz anłajn-płatformy. Taksama ich pryvoziać niepasredna sami dobraachvotniki. U handal uciahnutyja cyvilnyja asoby, naprykład, taksisty. Nie treba zabyvacca i pra balnicy, dzie možna nabyć jak lehalnyja, tak i nielehalnyja narkotyki.
Jak pišuć aŭtary, jość padstavy mierkavać, što hetyja narkotyki ŭ masavym paradku pastaŭlajucca vajskoŭcam, jakija znachodziacca na pieradavoj, pryčym viadučuju rolu ŭ hetym adyhryvajuć bujnyja narkakarteli.
Jak śćviardžajecca ŭ materyjale, mała taho, što narkamanija na froncie raście, dyk jašče i ŭkrainski ŭrad nie ŭ poŭnaj miery vyrašaje hetuju prablemu, a asnoŭny ciažar niasuć vałanciorskija arhanizacyi i darahija pryvatnyja reabilitacyjnyja centry.
Situacyja z rasijskaha boku
Padobnym čynam vyhladaje situacyja i z rasijskaha boku linii frontu. Jak pisała internet-vydańnie «Viorstka», na froncie narkotyki spažyvajuć 10-15% vajskoŭcaŭ u kožnaj dyvizii. Narkakurjery na akupavanych terytoryjach voziać miefiedron i «soli» prosta da akopaŭ.
Pa słovach surazmoŭcaŭ vydańnia, hałoŭny drajvier spažyvańnia narkotykaŭ — nudota. Harełka ŭ paraŭnańni z narkotykami nie akazvaje nijakaha efiektu. U vyniku pieradaziroŭki źjaŭlajucca zvyčajnaj rečču.
Na front traplajuć i narkamany sa stažam, što śviedčyć pra niadbajnaść miedyčnych kamisij.
Zabaronienyja rečyvy, pa słovach surazmoŭcaŭ vydańnia, možna nabyć u miascovych žycharoŭ i ŭ taksistaŭ. Ich mohuć dastavić tak zvanyja «prafiesijnyja pravadniki» — miascovyja, jakija majuć damoŭlenaści z KPP i pravodziać ludziej praź ich.
Sałdatam narkotyki mohuć pryvieźci vałanciory, jakija padtrymlivajuć rasijskuju armiju i voziać na front techniku dy pradmiety pieršaj nieabchodnaści. Taksama narkatyčnyja rečyvy dastaŭlajuć z kamandzirovak inšyja tavaryšy pa słužbie.
Rekłamaj «solaŭ» raśpisanyja budynki ŭ Daniecku i Maryupali. Pa słovach miascovych žycharoŭ, paśla vajny ceny na narkotyki ŭzraśli ŭ šeść razoŭ. Rasijskija kantraktniki i mabilizavanyja mohuć dazvolić sabie narkotyki pa vysokich cenach dziakujučy vypłatam ad dziaržavy, jakija prychodziać im na kartki «Mir». Kupić narkotyki praz telehram-boty možna pieravodam z karty na kartu.
Admietna, što kali vajskoŭcaŭ, jakija ŭžyvajuć narkotyki, sudziać, to im nie dajuć kryminalnyja terminy, a adpraŭlajuć u atrady «Štorm-Z». Hetyja atrady iduć samaj pieršaj linijaj na «miasnyja šturmy».
A niekalki miesiacaŭ tamu internet uskałychnuli kadry ź videa pracesu «vychavańnia» rasijskich sałdat ich sasłužyŭcami. Sałdat abvinavacili ŭ raspaŭsiudžańni na froncie «solaŭ». Užyŭšy hetyja rečyvy, rasijskija bajcy nie zmahli vajavać i akazać padtrymku inšamu padraździaleńniu, jakoje patrapiła pad abstreł USU.
Čytajcie jašče:
Va Ukrainie za narkotyki zatrymali biełaruskaha dobraachvotnika. Pahražaje da 12 hadoŭ
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu55
Kamientary