«Byccam prasiŭ dapamohi». U Viciebskim rajonie vyratavali alenia, jaki vyjšaŭ da darohi VIDEA
Apieracyja ciahnułasia niekalki hadzin. U joj uziali ŭdzieł nieabyjakavyja viaskoŭcy, daišniki i supracoŭniki vietakademii.
Historyju vyratavańnia dzikaj žyvioły raskazvajuć «Vićbičy».
Kiroŭca sialhaspradpryjemstva Michaił Varancoŭ pabačyŭ na abočynie kala vioski Kamary Viciebskaha rajona alenia. Toj ledź stajaŭ na nahach i nie ŭciakaŭ, ubačyŭšy čałavieka.
Varancoŭ adčuŭ, što niešta nie toje. Padyšoŭšy da alenia, mužčyna ledź nie raspłakaŭsia — žyvioła nibyta prasiła ab dapamozie. Viaskoviec nie viedaŭ, što rabić, ale nie chacieŭ pakidać alenia, tamu pazvaniŭ vieterynaru svajoj haspadarki. A paśla pačali źviartacca ŭ roznyja słužby.
U Kamary pryjechali inśpiektary DAI. Praź niekalki hadzin znajšłasia mahčymaść transpartavać alenia, jakoha pryniali daktary kafiedry terapii Viciebskaj vietakademii.
Pa słovach prarektara pa navukovaj pracy vietakademii Alaksandra Białko, žyvioła znachodziłasia ŭ stresavym stanie. Jak miarkujuć daktary, chutčej za ŭsio aleń adbiŭsia ad statka, pierastaŭ jeści, byŭ źniasileny i nie pražyŭ by i niekalkich dzion.
Miedyki praviali čaćvieranohamu pacyjentu detaksikacyjnuju terapiju, «zapuścili» straŭnik, pačali padkormlivać. Kab nie stvarać prablem z-za pryvykańnia da čałavieka i ciapła, chutka jaho vypuściać u zvykłaje asiarodździe ŭ Lotčanskaje laśnictva.
Žyvahłod pryznała rassyłku praz čat-bot «Sumlennych ludziej» karystalnikam u Biełarusi: Ale nie ŭ pracoŭny čas, paśla 18 hadzin8
Kamientary