«Ad porna ciapier nie abaronišsia». Jak havaryć ź dziećmi pra seks
Jak i kali hutaryć sa svaimi dziećmi na temu seksu? Tłumačyć seksołah Vijaleta Nikicik.
«Nazyvajcie ŭsie častki cieła sapraŭdnymi nazvami»
Śpiecyjalistka ŭpeŭnienaja — u siamji abaviazkova musić być seksualnaja adukacyja. Treba hutaryć ź dziciom pra cialesnaść i seksualnaść, kali vy chočacie, kab takaja infarmacyja dajšła da jaho biaśpiečna, a nie ad siabroŭ na vulicy ci ŭ škole abo niejkich małaznajomych ludziej.
Takija razmovy — jašče i prafiłaktyka taho, kab dzicia nie sutyknułasia z seksualnym hvałtam: «Treba navučyć dzicia jašče z 3-4 hadoŭ tamu, što jość intymnyja zony i što nichto nie pavinien datykacca da hetych miescaŭ na ciele, akramia mamy albo doktara ŭ jaje prysutnaści. Varta ź dziacinstva nazyvać usie častki cieła sapraŭdnymi nazvami — nie kazać dziciaci, što ŭ jaho tam niejkaja pałačka ci piražočak, a vykarystoŭvać słovy «pienis» ci «vahina». Kažycie, što heta intymnyja, asablivyja zony, jany źviazanyja z darosłym žyćciom».
Dzicia i samo moža padymać u razmovie temy seksu, ale dzivicca hetamu nie varta, ličyć Vijaleta. Chutčej za ŭsio, kali dzicia samo padymaje hetaje pytańnie, jano ŭžo niešta daviedałasia pra seks — vierahodna, pačuła pra heta ŭ sadku ci ŭ škole. Tamu takija pytańni śviedčać, što baćkam treba było raniej samim pačać pra heta razmaŭlać.
«Spytajcie ŭ dziciaci, čamu ŭ jaho ŭźnikła takoje pytańnie, adkul jon daviedaŭsia pra hetuju temu. Toje, što dzicia hetym cikavicca, samo pa sabie narmalna, bo seks — častka našaha žyćcia, i ŭvohule asablivaść dziaciej — toje, što im usio cikavaje. Ale kali małomu raskazali pra heta dziadzia abo ciocia na vulicy, kali niechta ŭ sadku ci škole niešta rabiŭ ź jaho ciełam, vy pavinny na heta adpaviedna adreahavać — nie kryčać ci płakać pry dziciaci, a pajści i dać rady situacyi», — rekamienduje seksołah.
Jak budavać hutarku ź dziciom pra cialesnaść? Pierš za ŭsio, darosły, jaki ŭdzielničaje ŭ takoj hutarcy, sam musić prapracavać u siabie staŭleńnie da seksu. Heta treba, kab darosły nie naviešvaŭ na dzicia svoj soram, svaje pačućci i kompleksy na małoha.
Heta pavinna być spakojnaja razmova, biez mocnych prajavaŭ emocyj, tłumačyć Vijaleta. Kali darosłamu składana vieści takuju hutarku, možna pierad hetym prahavaryć usio z partnioram, svajakom ci siabram, a to i schadzić da psichołaha.
Kali dzicia padraście, važna paznajomić jaho z tym, što čakaje ŭ pubiertacie, jak hety pieryjad upłyvaje na ich psichiku i cieła.
«Časta byvaje, što dzicia ŭžo bačyła, jak baćki zajmajucca seksam»
Vijaleta časta pracuje ź ludźmi, jakim ad baćkoŭ pieradałosia saramlivaje staŭleńnie da cieła i seksu. Jana raskazvaje, što asabliva heta datyčyć tych, chto naradziŭsia ŭ savieckija časy i źjaŭlajecca častkaj toj kultury.
«Z hetym da mianie zvyčajna prychodziać klijenty — z tym, što jany saromiejucca svajho cieła, što darosłyja žančyny nie mohuć pahladzieć u lusterka na svaje pałavyja orhany, nie mohuć siabie łaščyć. Zvyčajna takoje staŭleńnie źviazana z tym, što tranślavali baćka ci maci, i dzicia padśviadoma ŭspryniała heta jak soram. Nie abaviazkova niechta z baćkoŭ musić kazać takoje naŭprost, dzicia pabačyć usio pa nievierbalnych sihnałach, dy i pa tym, jak baćki staviacca da svajho cieła», — raskazvaje seksołah.
Tema seksu tabujavanaja, i čałaviek moža vycieśnić šmat źviazanych ź joj pieražyvańniaŭ — svaje sapraŭdnyja žadańni, pačućci, adčuvańni ŭ ciele. Usio heta traplaje ŭ ciomnuju, saramlivuju častku psichiki, jakaja ŭsio roŭna potym moža siabie prajavić. Čałaviek moža bačyć sny pra hvałt ci seks, mieć fantazii pra heta, a potym adčuvać za heta vinu i karać siabie.
Byvaje, što dzieci sutykajucca z zabaronami datyčna seksu i cialesnaści. Heta moža pačynacca vielmi rana, kaža Vijaleta: «Časta byvaje, što ŭ 3-4 hady dzicia ŭžo bačyła, jak baćki zajmajucca seksam, jak jany lažać adzin na adnym i peŭnym čynam ruchajucca. Ale dzicia ŭsprymaje heta prosta jak hulniu, nie bačyć u hetym seksualny kantekst. Potym jany niaredka mohuć pryjści ŭ sadok i prapanavać kamuści pahulać u mamu i tatu, paŭtaryć hetyja ruchi. Kali baćki takoje zaŭvažajuć, jany adčuvajuć šok, bačać u takoj hulni seksualny kantekst. Mocnaja reakcyja na takoje zvyčajna vielmi pužaje dziaciej, tak moža źjavicca traŭma ci mocny soram i strach.
Kali dzieci pačynajuć hulacca sa svaimi hienitalijami, jany prosta paznajuć svajo cieła, bačać u hetym hulniu. Niechta z baćkoŭ moža heta pabačyć i pačać saromieć dzicia, zabaraniać datykacca da siabie. Kali darosły mocna prajaŭlaje emocyi i prajecyjuje na dzicia soram, mały moža zakrycca ŭ sabie, adčuvać, što jaho cieła — niešta soramnaje i brudnaje, tamu lepš nie dakranacca da hetaha».
A što rabić z kantentam seksualnaha charaktaru nakštałt parnahrafii? Ad porna ciapier nie abaronišsia, hety kantent budzie dastupny dziciaci, naprykład, u škole ci ŭ dvary, bo heta dastupny sposab aznajomicca sa svaim ciełam i seksualnaściu. Treba jašče da hetaha, na apiaredžańnie havaryć ź dziciom pra cieła, cialesnaść i intymnyja zony, pra hienitalii, kachańnie. Bo seksualnaja adukacyja — heta nie tolki pra fizijałohiju, a i pra pačućci.
«Naša Niva» — bastyjon biełaruščyny
PADTRYMAĆČytajcie taksama:
Kontradejtynh: novy padychod da spatkańniaŭ, jaki dapamoža pierazahruzić asabistaje žyćcio
Žyvahłod pryznała rassyłku praz čat-bot «Sumlennych ludziej» karystalnikam u Biełarusi: Ale nie ŭ pracoŭny čas, paśla 18 hadzin9
Kamientary