Pa trubach. Źjavilisia nieviadomyja padrabiaznaści zachopu rasijanami Aŭdziejeŭki
Bai za Aŭdziejeŭku doŭžylisia čatyry miesiacy, napačatku rasijanie nieśli vializnyja straty, ale paśla znajšli niečakanyja chady, pišuć vajskovyja analityki.
Jak śćviardžajuć analityki hrupy Frontelligence Insight, krytyčnaj dla ŭkrainskaha boku situacyja ŭ Aŭdziejeŭcy była nie zaŭsiody. Faktyčna try z pałovaj miesiacy abarona horada była paśpiachovaj.
Padčas pieršapačatkovaha šturmu rasijskija vojski pajšli na ŭmacavanyja ŭkrainskija pazicyi praz adkrytyja, časta zaminavanyja pali, dzie adzinym naturalnym ukryćciom byli pasadki z dreŭ. Jany panieśli nadzvyčaj vysokija straty navat pavodle ich ułasnych standartaŭ, jakija stali vynikam nierealistyčnych čakańniaŭ na rańniaj fazie.
Naprykład, paśla paniesienych 10—19 kastryčnika strat rasijskaje kamandavańnie vyrašyła nie ŭvodzić dadatkovyja siły. Faktyčna jano admoviłasia ad idei chutkaha akružeńnia horada miechanizavanymi padraździaleńniami. Kab papoŭnić straty, Rasii pryjšłosia pieradać u rasparadžeńnie 2-j i 41-j ahulnavajskovych armij techniku 25-j armii.
Pieršapačatkova rasijskija «abcuhi» paciarpieli vialikuju niaŭdaču. Jany niedaacanili rašučaść ukraincaŭ abaraniać pazicyi i pieraacanili moc svaich vojskaŭ na paŭnočnym fłanhu.
Pieryjad z kastryčnika pa śniežań charaktaryzavaŭsia niazdolnaściu Uzbrojenych sił Rasii zaviaršyć akružeńnie Aŭdziejeŭki, što prymusiła ich sfakusavacca na samim horadzie. I tut im dapamoh niedachop artyleryjskich bojeprypasaŭ u ŭkraincaŭ, jakija nie mahli vieści efiektyŭnuju kontrbatarejnuju baraćbu.
Pierałom u bajach
Situacyja dla rasijskich vojskaŭ palepšała kala 21 studzienia, kali im udałosia trapić u haradskuju zabudovu praz padziemnyja kamunikacyi. Za košt efiektu niečakanaści jany zachapili niekalki pazicyj u tyle, što stała asnovaj dla płacdarmu.
Jak adznačajuć analityki, suadnosiny strat u haradskich bajach zaŭsiody vyraŭnoŭvajucca, asabliva kali ŭ voraha pieravaha ŭ artyleryi i ŭ pavietry. Heta dazvalaje prasoŭvacca vulica za vulicaj, źniščajučy šlachi zabieśpiačeńnia.
Nasupierak raspaŭsiudžanamu mierkavańniu, rasijskija vojski nie zaŭsiody šturmavali ŭ łob, a vykarystoŭvali bolš hnutkuju taktyku. Jany adaptavalisia. Razumiejučy abmiežavańni svaich miechanizavanych kułakoŭ, rasijski bok staŭ stvarać nievialikija «kišeni», padzialajučy ŭkrainskija vojski.
Zamiest pramoha ŭdaru na Stepavoje rasijanie namacali słaboje miesca na poŭnačy pamiž Aŭdziejeŭkaj i Aŭdziejeŭskim koksachimičnym zavodam, i rušyli tudy, pašyryŭšy svaju zonu kantrolu da čyhunki i za jaje miežy.
Pašyryłasia zona paražeńnia kiravanymi avijabombami (KAB). Rasijskija avijabomby nie abmiažoŭvalisia Aŭdziejeŭkaj, jany bili i pa bližejšych vioskach u tyłavych rajonach.
Namieśnik kamandzira 3-j šturmavoj bryhady i vajenny karespandent (bolš za 94 tysiačy padpisčykaŭ u telehram) major Maksim Žoryn u intervju vydańniu NV.UA havoryć pra 60-80 KABaŭ u siarednim za sutki. Jany niedakładnyja, ale razburalnyja. Rasijski bok braŭ kolkaściu. Pavodle słoŭ Žoryna, kali b nie było KABaŭ, trymacca ŭkrainskim padraździaleńniam było b našmat lahčej.
Rasijski bok pastajanna papaŭniaŭ ludskija resursy. Z apoviadaŭ uziatych u pałon pad Aŭdziejeŭkaj rasijskich vajskoŭcaŭ, stała viadoma, što šmat kaho ź ich mabilizavali ŭ śniežni i navat u siaredzinie studzienia. Ludziej adrazu ž adpraŭlali ŭ miasarubku. Choć hetym sałdatam moža nie chapała vopytu, prytok navabrancaŭ zabiaśpiečvaŭ pastajanny cisk na źniasilenyja ŭkrainskija padraździaleńni, vyčerpvajučy ich resursy i zmušajučy adychodzić.
Jak pišuć analityki, Rasija była blizkaja da stvareńnia niekalkich «kišeniaŭ» u horadzie. U USU było dva varyjanty: albo adychod, albo kontrataki, kab raźbić «kišeni». Ale arhanizavanyja kontrataki vielmi składanyja ŭ tych umovach. Ukraincam pryjšłosia b albo iści ŭ frantalnyja ataki pa vuzkim pierašyjku, albo bić u fłanh, ale bieź pieravahi ŭ artyleryi i padtrymki z pavietra.
Situacyja zastavałasia krytyčnaj, asobnyja padraździaleńni apynulisia pad pahrozaj akružeńnia abo adrezki ad šlachoŭ zabieśpiačeńnia. U vyniku ŭ noč na 17 lutaha ŭkrainskaje kamandavańnie pryniało rašeńnie ab vyvadzie vojsk z horada.
Vyniki
Padvodziačy vyniki bajoŭ, analityki śćviardžajuć, što rannija miesiacy abarony dazvalali nanosić salidnyja straty Uzbrojenym siłam Rasii, pry hetym USU praduchilili chutki praryŭ i akružeńnie Aŭdziejeŭki.
Pavodle infarmacyi USU, usiaho asabovaha składu rasijskich vojskaŭ było źniščana bolš za 47 tysiač. Uzbrojenyja siły Rasii ŭ horadzie i navakollach stracili 364 tanki, 748 bajavych braniravanych mašyn, 248 artsistem, piać samalotaŭ.
Vyjhrany čas dazvoliŭ Ukrainie ŭmacavać pazicyi za Aŭdziejeŭkaj, choć abarončyja zbudavańni ŭsio jašče hatovyja nie całkam.
Sa strataj Aŭdziejeŭki Ukraina pazbaviłasia apošniaha płacdarmu dla patencyjnaha nastupu na Danieck. Ale jon i tak byŭ čysta tearetyčnym. U toj ža čas, pavodle słoŭ Maksima Žoryna, na dadzieny momant u rasijskaha boku jość jašče dastatkova sił dla taho, kab sprabavać ruchacca dalej. Na kolki ich chopić, heta pytańnie inšaje.
Čytajcie jašče:
«16 tysiač biezzvarotnych strat». Aŭdziejeŭka vačyma rasijskich vajenkaraŭ
Ukrainskija vojski pakinuli Aŭdziejeŭku. Jakoje heta maje značeńnie?
Łukašenka: Chto tam u Rasii viakaje na šmatviektarnaść Biełarusi i vyzvaleńnie palitviaźniaŭ?9
Kamientary