Dyzajnier stvaryŭ dla dački azbuku na 24 movach. Voś dzie jaje možna zamović

Apošnija čatyry hady Dźmitryj Buka zajmajecca dyzajnam knih, za hety čas jon apublikavaŭ i dastaviŭ da čytačoŭ bolš za 10 tysiač asobnikaŭ. Sioleta mužčyna stvaryŭ ułasnuju dyzajnierskuju studyju BOOKO, što jakraz śpiecyjalizujecca na knihach i inšaj vydavieckaj pradukcyi.

Azbuka dla multylinhvaŭ — pieršy prajekt studyi. Na staroncy kraŭdfandynhu dla knihi Dźmitryj raskazvaje, što na azbuku jaho natchniła dačka Jeva, jakaja naradziłasia padčas žyćcia pary ŭ Polščy. Pavodle jaho słoŭ, małaja lohka spraŭlajecca z čatyrma movami: u dziciačym sadku jana hutaryć pa-anhlijsku, na dziciačaj placoŭcy — pa-polsku, a sa svajakami i siabrami — pa-rasijsku i pa-biełarusku. 

Dźmitryj pryznajecca, što daŭno maryŭ zrabić knihu dla dziaciej. Spačatku jon sprabavaŭ znajści azbuku dla Jevy, ale ni adna kniha nie adpaviadała jaho kryteram. Baćku było važna, kab azbuka była na niekalkich movach i pry hetym była estetyčna pryvabnaj, i narešcie jon vyrašyŭ zrabić takuju azbuku samastojna.

Pavialičyć

Mužčyna staŭ šukać słovy, viersii jakich u roznych movach pačynajucca na adnu i tuju ž litaru — pryznajecca, što ChatGPT mocna palehčyŭ praces. Dźmitryj pačynaŭ ź piaci moŭ, a ŭ vyniku ŭ knizie ich 24. Heta biełaruskaja, ruskaja i ŭkrainskaja movy, a taksama bałtyjskija movy, zachodnie– i paŭdniovasłavianskija, ramanskija, hiermanskija i siemickija. Jość navat azijackija movy — japonskaja i kazachskaja, mova chindzi i sproščanaja viersija kitajskaj movy. Praviarać tekst knihi Dźmitryju dapamahali 48 nośbitaŭ tych moŭ, što pradstaŭlenyja ŭ joj.

Hałoŭnuju ideju knihi Dźmitryj farmuluje tak: «Jość šmat moŭ. Niekatoryja — vielmi padobnyja, a niekatoryja mocna adroźnivajucca». U jaho azbucy słovy na roznych movach pradstaŭlenyja razam, tak što dzicia zmoža pabačyć hetyja padabienstvy i adroźnieńni.

Što da ilustracyj, ich razam ź Dźmitryjem rabiła Jeva i jaje siabry. Dapamoh štučny intelekt: spačatku u ChatGPT składalisia promty dla malunkaŭ, a paźniej jany pieratvaralisia ŭ žyćcio z dapamohaj siervisaŭ Midjourney i Magnific AI.

Pavialičyć

Dźmitryj nadrukavaŭ dźvie probnyja viersii knihi, a potym zapuściŭ kraŭdfandynh na jaje. Spačatku chacieŭ vypuścić 300 asobnikaŭ azbuki koštam pa 19 jeŭra i spadziavaŭsia sabrać na ich hrošy ciaham miesiaca, ale atrymałasia zrabić heta mienš čym za dva tydni. Mužčyna zakryvaje zbor praz paru dzion, i na siońnia jon maje zamovy na sumu ŭ paŭtara raza bolšuju, čym chacieŭ sabrać: metaj było sabrać 5600 jeŭra, a ciapier suma składaje bolš za 9 tysiač jeŭra.

Pavodle słoŭ Dźmitryja, jamu važna było pakazać inšym, što vydać svaju knihu realna: «Maju šmat znajomych, chto chacieŭ by zrabić svaju knihu, ale baicca hetym zajmacca praz toje, što prajekt pieršapačatkova padajecca stratnym, što kniha, jakuju sam prydumaŭ, nie akupić ni vydatkaŭ času, ni ŭłasnych unioskaŭ. U šmatlikich vypadkach nichto nie zdoleje adkazać, ci atrymajecca akupić vydatki».

Biełarus miarkuje, što płatformy dla kraŭdfandynhu nakštałt Kickstarter vyrašajuć takuju prablemu. Kali b jon nie sabraŭ hrošy na knihu, usie atrymanyja danaty viarnulisia b karystalnikam, i Dźmitryj nie musiŭ by tracić hrošy na publikacyju knihi.

Kali vy žadajecie zamović sabie azbuku, zrabić heta možna tut.

Čytajcie taksama:

«Chaču, kab dzicia nie hruzili biełaruskaj movaj, a kab jana była ŭ jaho žyćci». Što takoje kazkaterapija ad «Knižnaha voza»

«Biełaruskaja mova jak by na padkorcy». Błohierka aburyłasia, što jaje syna nie vučać rodnaj movie ŭ škole

«Razmaŭlaju pa-biełarusku, kab mova nie zahinuła». Palak vyvučyŭ biełaruskuju movu nastolki, što vodzić na joj ekskursii i vykładaje

• 8
• 0
• 0
• 1
• 1
• 0
• 0
• 0