U Biełarusi z‘javiŭsia šosty poŭny kavaler ordena Ajčyny. Chto jon?
Siońnia Łukašenka padpisaŭ ukaz ab uznaharodžańni dziaržaŭnymi ordenami i miedalami deputataŭ Pałaty pradstaŭnikoŭ i členaŭ Savieta Respubliki, jakija, pracujučy ŭ hetym orhanie z 2019 hoda, prykłali šmat namahańniaŭ dla zabieśpiačeńnia zachavańnia ŭłady ŭ rukach Łukašenki, siarod inšaha biez zapiarečańniaŭ zaćviardžajučy ŭsio bolš strohija represiŭnyja normy ŭ zakanadaŭstvie.
Pra toje, što treba ŭznaharodzić najbolš viernych jamu deputataŭ, Łukašenka havaryŭ adrazu paśla vybaraŭ u Pałatu pradstaŭnikoŭ, u pačatku sakavika. Ciapier ža heta znajšło ŭvasableńnie ŭ vyhladzie adpaviednaha ŭkaza.
Pavodle jaho słoŭ, staršyni Pałaty pradstaŭnikoŭ Uładzimiru Andrejčanku ŭručać orden Ajčyny I stupieni, a namieśniku pastajannaj kamisii pa nacyjanalnaj biaśpiecy — orden Pašany.
Deputat Siarhiej Račkoŭ razam ź inšymi kalehami načepić na hrudzi miedal «Za pracoŭnyja zasłuhi», a Lilija Ananič — «Za biezdakornuju słužbu» III stupieni.
Taksama niekalkim deputatam prysvojenyja hanarovyja zvańni ŭ zaležnaści ad taho, u jakoj śfiery jany pracujuć ci pracavali. Ihar Marzaluk ciapier zasłužany rabotnik adukacyi, Ludmiła Makaryna-Kibak — zasłužany lekar, a Michaił Rusy — zasłužany rabotnik sielskaj haspadarki Respubliki Biełaruś.
Paśla ŭznaharodžańnia vieterana łukašenkaŭskaha atačeńnia Uładzimira Andrejčanki ordenam Ajčyny I stupieni jon sabraŭ užo poŭny kamplekt hetaha ordena (u jaho try stupieni), staŭšy jaho poŭnym kavaleram. Takich ludziej da jaho było ŭ Biełarusi ŭsiaho piaciora.
U 2008 hodzie pieršym poŭnym kavaleram ordena Ajčyny stała słavutaja viaślarka Kaciaryna Karsten, u 2011-m — staršynia ahrakambinata «Zara» na Mahiloŭščynie Leanid Maisiejeŭ, u 2014-m — słavuty trenier pa frystajle Mikałaj Kazieka i kanstruktar biełaruskich kaśmičnych aparataŭ Uładzimir Pakryškin, a ŭ 2021-m — jašče adzin najbližejšy paplečnik Łukašenki, jaki aktyŭna dapamahaŭ jamu pryjści da ŭłady 30 hadoŭ tamu, Viktar Šejman.
Tur patłumačyŭ, što Łukašenka mieŭ na ŭvazie, kažučy pra pryznačeńnie dyrektaraŭ u pryvatnyja kampanii6
Kamientary