Pałova vykarystanych Rasijaj paŭnočnakarejskich rakiet uzarvałasia ŭ pavietry, nie dalacieŭšy da celi
Ukrainskaja prakuratura zajaviła, što vyvučyła abłomki 21 z prykładna 50 paŭnočnakarejskich balistyčnych rakiet, zapuščanych Rasijaj u pieryjad z kanca śniežnia pa kaniec lutaha, kab acanić uzrovień pahrozy ad supracoŭnictva Maskvy z Pchieńjanam, piša Reuters.
Pry hetym u ofisie hienieralnaha prakurora Ukrainy Andreja Kościna paviedamili Reuters, što častata vypadkaŭ, kali paŭnočnakarejskaja zbroja davała zboi, była davoli vysokaj.
«Prykładna pałova paŭnočnakarejskich rakiet straciła zaprahramavanyja trajektoryi i vybuchnuła ŭ pavietry; u takich vypadkach abłomki nie byli atrymanyja», — havorycca ŭ piśmovych adkazach ofisa Andreja Kościna na pytańni Reuters.
Va ŭkrainskaj prakuratury zajavili, što, kali abłomki nie ŭdałosia sabrać u miescach udaraŭ, to rakiety Hwasong-11, jakija na Zachadzie taksama nazyvajuć KN-23, identyfikavali pa trajektoryjach ich palotu, chutkaści i miescach zapusku.
Na dolu paŭnočnakarejskich rakiet prypadaje pakul tolki niaznačnaja častka rasijskich udaraŭ padčas vajny suprać Ukrainy, ale sam fakt ich vykarystańnia vyklikaŭ tryvohu ad Sieuła da Vašynhtona, bo heta moža aznačać kaniec amal dvuchdziesiacihadovaha kansensusu pamiž pastajannymi členami Rady Biaśpieki AAN pa praduchileńnie pašyreńnia Pchieńjanam jahonaj jadziernaj i balistyčnaj rakietnaj prahram.
Apošniaje zafiksavanaje vykarystańnie KN-23 było 27 lutaha, paviedamiła ŭkrainskaja prakuratura, dadaŭšy, što ahulnaja kolkaść vyjaŭlenych zapuskaŭ supadaje z danymi raźviedki, jakija śviedčać, što KNDR pastaviła ŭ Rasiju kala 50 balistyčnych rakiet.
Akramia nadańnia Paŭnočnaj Karei mahčymaści vypraboŭvać na praktycy rakiety, Rasija zrabiła kroki, jakija ŭskładniać Arhanizacyi Abjadnanych Nacyj manitorynh sankcyj, uviedzienych suprać Pchieńjana ŭ 2006 hodzie.
«Vy ž sami razumiejecie». Horki manałoh biełaruskaha nastaŭnika1
Kamientary
Łožnyje cieli.
Nie,nie słyšał.