Žychara rasijskaha Novasibirska asudzili na 25 hadoŭ za padpał vajenkamata, jakoha nie było. Heta rekordny termin
Pry tym, što chłopcu ŭsiaho 24 hady.
2-i Uschodni akruhovy vajskovy sud u Novasibirsku prysudziŭ 24-hadovaha Illu Baburyna da 25 hadoŭ kałonii strohaha režymu. Heta samy surovy prysud pa spravach ab padpałach vajenkamataŭ u Rasii — pryčym za padpał, jakoha nie było, piša Bi-bi-si.
Baburyna aryštavali ŭ vieraśni 2022 hoda pavodle abvinavačvańnia ŭ zamachu na arhanizacyju teraktu z-za padpału vajenkamata, jaki nie adbyŭsia. Paźniej jamu vystavili jašče piać abvinavačvańniaŭ: u dziaržzdradzie, terakcie, udziele ŭ dziejnaści niezakonnaha ŭzbrojenaha farmavańnia i dziejnaści terarystyčnaj arhanizacyi i niezakonnaj prasłuchoŭcy.
Sud pryznaŭ Baburyna vinavatym pa šerahu artykułaŭ, u tym liku ab dziaržzdradzie i zamachu na arhanizacyju terarystyčnaha aktu. Piać hadoŭ 25-hadovaha terminu jon pavinien budzie pravieści ŭ turmie, astatnija 20 — u kałonii strohaha režymu.
Sam jon nie pryznaje vinu. Advakat Baburyna Vasil Dubkoŭ patrabavaŭ apraŭdać svajho padabaronnaha.
Maksimalnaje pakarańnie, jakoje pahražała 24-hadovamu Baburynu pa piaci artykułach KK RF, — 30 hadoŭ pazbaŭleńnia voli. 8 maja abvinavačvańnie zapytała dla jaho 26 hadoŭ kałonii.
«Kali prakuror zapytaŭ hety termin, Illa ŭchmylnuŭsia i trochi ŭśmichnuŭsia, była takaja reakcyja, — kazaŭ advakat Dubkoŭ. — 14 maja ja byŭ u jaho ŭ SIZA, jon skazaŭ, što byŭ unutrana hatovy da hetaha. Ale tym nie mienš heta žudasny termin. — bolš, čym Illi hadoŭ».
Z čaho pačałasia sprava Baburyna
Novasibircu Illi Baburynu 24 hady. Da svajho aryštu ŭ vieraśni 2022 hoda jon pracavaŭ u śfiery IT i šmat padarožničaŭ. Jaho žonka žyła va Ukrainie, jon časta jeździŭ da jaje, pakul muž i žonka nie rasstalisia. Heta adbyłosia jašče da pačatku vajny va Ukrainie, ale razvod jany jurydyčna nie aformili. Apošni raz Baburyn byŭ va Ukrainie ŭ kastryčniku 2021 hoda.
Jak raspaviadała siabroŭka Baburyna Hanna, uvarvańnie Rasiei va Ukrainu jon uspryniaŭ niehatyŭna i byŭ suprać vajny, choć i nie ŭdzielničaŭ ni ŭ jakich antyvajennych akcyjach i mitynhach.
22 vieraśnia 2022 hoda, na nastupny dzień paśla abviaščeńnia ŭ Rasii častkovaj mabilizacyi, Baburyna zatrymali ŭ Novasibirsku supracoŭniki FSB, nieŭzabavie jon byŭ aryštavany.
Tady ŭ spravie Illi byŭ tolki adzin epizod. Pa viersii śledstva, Baburyn spłanavaŭ padpały vajenkamataŭ u Novasibirskaj vobłaści pa zadańni nieŭstanoŭlenych asob z ukrainskaha bataljona «Azoŭ» (Dla hetaha jon znajšoŭ dvuch vykanaŭcaŭ i pieradaŭ im butelku z «kaktejlem Mołatava».
Samoha padpału pry hetym tak i nie adbyłosia, u spravie navat niama infarmacyi, ab jakim kankretnym vajenkamacie nibyta išła havorka, adznačaje advakat.
Mierkavanyja «vykanaŭcy» Šoryn i Arłoŭ (pad hetymi proźviščami jany fihurujuć u materyjałach spravy, heta znajomy Baburyna i znajomy znajomaha, tłumačyć advakat) dobraachvotna pryjšli ŭ FSB i raspaviali pra toje, što nibyta płanavaŭ Baburyn.
Jak ličyć advakat Dubkoŭ, toje, što adbyłosia dalej, padobna na pravakacyju złačynstva z boku FSB. Jak jon raspaviadaje, Baburyn sapraŭdy prapanavaŭ svajmu znajomamu Šorynu źniać videa, jak u budynak vajenkamata lacić «kaktejl Mołatava», ale paśla pieršaj ža razmovy pieradumaŭ heta rabić.
«Ale Šoryn da taho momantu ŭžo źviarnuŭsia ŭ FSB i na patrabavańnie supracoŭnika FSB staŭ uhavorvać Baburyna pieradać jamu butelku z zapalnaj sumieśsiu. Faktyčna heta pravakacyja», — skazaŭ advakat Bi-bi-si.
Paśla ŭhavoraŭ, sa słoŭ Dubkova, Baburyn usio ž pieradaŭ Šorynu butelku z «kaktejlem Mołatava». Illa hetaha nie admaŭlaje, padkreślivaje jahony advakat, ale, na jahonuju dumku, kvalifikavać heta jak padrychtoŭku da arhanizacyi teraktu niapravilna: Baburyn schilaŭ Šoryna nie da teraktu, a da chulihanstva.
Novyja artykuły ŭ spravie Baburyna
U 2023 hodzie, kali Baburyn užo znachodziŭsia ŭ SIZA, u jaho spravie pačali źjaŭlacca novyja artykuły.
Praz hod paśla zatrymańnia jaho abvinavacili ŭ padpale dziciačaj muzyčnaj škoły ŭ Novasibirsku, jaki adbyŭsia 1 lipienia 2022 hoda. Sprava była zaviedziena pa fakcie padpału, padazravanych u joj nie było, jana doŭha lažała biez ruchu. Ale śledčyja pa spravie Baburyna znajšli ŭ jaho telefonie videa z padpałam niejkaha budynka, supastavili jaho z budynkam muzyčnaj škoły, pryjšli da vysnovy, što heta adzin i toj ža abjekt i pradjavili Baburynu abvinavačvańnie ŭ jaje padpale, raspavioŭ Dubkoŭ Bi-bi-si.
Ekśpiertyza pachodžańnia videa nie pravodziłasia, dokazaŭ, što jaho zdymaŭ sam Baburyn, niama, kaža advakat.
Pry hetym padpał byŭ kvalifikavany jak terakt (č.1 art. 205 KK RF), niahledziačy na toje, što škoła nie źjaŭlajecca administracyjnym abjektam, pry padpale nichto nie paciarpieŭ, a materyjalny ŭron skłaŭ mienš za 20 tysiač rubloŭ (kala 240 dalaraŭ).
Baburyn svaju datyčnaść da hetaha padpału admaŭlaje.
Pry hetym, pa viersii śledstva, ździejśniŭšy «zamach na arhanizacyju padpału nieŭstanoŭlenaha vajenkamata» i padpał muzyčnaj škoły, Baburyn dziejničaŭ u intaresach abo pa zadańni «Azova». Da takoj vysnovy śledčyja FSB pryjšli, abapirajučysia na toje, što Baburyn raniej jeździŭ va Ukrainu i što ŭ jaho tam jość znajomyja, jakija paźniej, paśla pačatku poŭnamaštabnaha ŭvarvańnia Rasiei va Ukrainu dałučylisia da «Azova», kaža advakat.
Tak u spravie Baburyna źjaviłasia treciaje abvinavačvańnie — u dziaržzdradzie (art. 275 KK RF).
Narešcie, z faktu znajomstva z udzielnikami «Azova» śledčyja zrabili vysnovu ab tym, što Baburyn i sam ustupiŭ u «Azoŭ», kaža advakat. Na hetaj padstavie Baburynu pradjavili adrazu dva abvinavačvańni: va ŭdziele va ŭzbrojenym farmiravańni i ŭ terarystyčnaj arhanizacyi.
Viarchoŭny sud Rasii pryznaŭ bataljon «Azoŭ» terarystyčnaj arhanizacyjaj 3 žniŭnia 2022 hoda, ale Baburyn, pa viersii śledčych, byŭ u im jak da hetaha rašeńnia suda, tak i paśla. Adsiul i dva roznyja artykuły KK, tłumačyć Dubkoŭ łohiku śledstva.
Kamientary