Dzie sioleta adpačyvajuć Tur, Mirončyk-Ivanova, viadučaja HUBAZiKa dy inšyja łukašysty i jakija hateli jany vybirajuć?
Pahladzieli, jak pravodziać adpačynak prychilniki režymu i čym jany dzielacca z padpisčykami ŭ sacyjalnych sietkach.
Nastaśsia Mirončyk-Ivanova
Nastaśsia Mirončyk-Ivanova
Lohkaatletka i deputatka Nastaśsia Mirončyk-Ivanova palacieła ŭ adpačynak z mužam i synam u Jehipiet. Hatel jana abrała šykoŭny — piacizorkavy chmaračos Rixos Premium Alamein. U žniŭni i pačatku vieraśnia numar z panaramnymi voknami (taki, jak zabraniravała Nastaśsia) na booking.com kaštuje kala 660 dalaraŭ za noč dla dvuch čałaviek.
Deputatka ŭ storys nie chavała svajho zachapleńnia ad vytančanaj ježy i žyvoj muzyki ŭ restaranie hatela.
Ihar Tur
Žonka prapahandysta Ihara Tura raspaviała padpisčykam, što jany ź dziećmi narešcie źlatali ŭ pieršy siamiejny adpačynak — taksama ŭ Jehipiet.
Siamja prapahandysta adpačyvała ŭ piacizorkavym Reef Oasis Blue Bay Resort & Spa. Samy tanny numar ciapier kaštuje kala 200 dalaraŭ za noč dla 2 čałaviek.
Taćciana Traciak
Tvar kanała HUBAZiKa, a ciapier jašče i viadučaja ANT Taćciana Traciak palacieła zaharać u AAE ŭ Fudžejru. Kaža, mienavita hety kurort lepš za inšyja ŭ Emiratach padychodzić, kab pierazahruzicca i adpačyć ad štodzionnaha stresu.
Taćciana pachvaliłasia, što čytaje detektyŭ Frydrycha Niaznanskaha — kaža, što bieź jaho knih, jak i biez SFP 50, nikudy lacieć nielha. Spyniłasia prapahandystka ŭ piacizorkavym hateli Miramar Alaqah Beach Resort. Ceny na numary pačynajucca ad 175 dalaraŭ za dvaich za noč. Budzie ciapier atrymlivać asałodu ad straŭ italjanskaj i tajskaj kuchni, a taksama morapraduktaŭ.
Jaŭhien Alejnik i Julija Bykava
Prydvorny kampazitar Jaŭhien Alejnik pryśviaciŭ asobny dopis tamu, jak składana było jamu znajści čas dla adpačynku. Bo krynžovyja pieśni pra Łukašenku sami siabie nie praśpiavajuć, tamu hurt «Aŭra», u jakim salistka — Julija Bykava (žonka Alejnika), uvieś čas udzielničaje ŭ roznych praŭładnych mierapryjemstvach.
Alejnik śćviardžaje, što hrafik «Aŭry» ščylna raśpisany ažno da kastryčnika, cudam udałosia znajści tolki 6 volnych dzion u kancy žniŭnia. Ale chacieli pakazać małodšamu synu ciopłaje mora.
Miesca dla vodpusku siamja vybirała prosta: patrebna była «zrazumiełaja kraina», kudy latajuć samaloty ź Minska, ź biaźvizavym režymam dla biełarusaŭ. Nu i kab tudy realna było chucieńka nabyć kvitki. U vyniku adpačyvać vyrašyli ŭ Azierbajdžanie. Jaŭhien nabyŭ kvitki ŭ Baku: «Pačynajucca zvanki: a «Aŭra» volnaja 26, a vy možacie być na zdymkach 29, a što ŭ vas 30 i 31? Ja ŭ panicy — u našaj pracy nielha admaŭlać, raz admoviŭ — pakryŭdziŭ ludziej».
Karaciej kažučy, Alejnik užo kinuŭsia zdavać kvitki, ale ž kasirka, da jakoj jon źviarnuŭsia, paznała jaho i spytała, ci nie na hastroli jany laciać. Jaŭhien paličyŭ heta znakam Suśvietu i ŭ vyniku rašyŭ usio ž lacieć ź siamjoj u adpačynak.
Siadzić ciapier na bałkonie Bilgah Beach Hotel i zvodzić niejki čarhovy trek. Heta davoli kamfortny piacizorkavy hatel, numar u im kaštuje ciapier ad 107 dalaraŭ za noč dla 2 čałaviek.
Siostry Hruździevy
Krychu dziŭna, ale sioleta siostry Hruździevy vyrašyli adpačyvać nie razam. Ale ŭsio roŭna ŭ Turcyi, jakuju jany abiedźvie lubiać. Ciapier u ahulnym instahramie Hruździevych źjaŭlajucca fotazdymki ź piacizorkavaha Dobedan Exclusive Hotel & Spa u Bieleku. Tut možna zabraniravać numar minimum na 5 načej. Ciapier u dostupie jość tolki čatyrochmiesny deluks — jon na taki termin dla dvuch darosłych budzie kaštavać 3800 dalaraŭ.
Valancina Hruździeva raspaviała, što vystupać tudy pryjazdžajuć rasijskija zorki — ale niejkaja vielmi viadomaja artystka jaje rasčaravała.
Zatoje jakija pryjemnyja mary na mory! «Mianie siońnia za śniadankam adzin čałaviek nazvaŭ madam ministr. Ja spytała: čamu? Jon adkazaŭ, a vy padobnyja da ministra. Voś dumaju, heta znak ci nie?» — padzialiłasia dumkami ŭ instahramie Hruździeva.
Kaciaryna Zabiańko
Viadučaja STB Kaciaryna Zabiańko, jakaja ŭ 2020 hodzie škadavała siłavikoŭ, latała z synam adpačyvać u Kiemier (Turcyja). Spyniałasia ŭ hateli Armas Beach. Samy tanny numar na adnu noč tut kaštuje 205 dalaraŭ za dvuch darosłych.
Lidzija Zabłockaja
Udzielnica dziciačaha «Jeŭrabačańnia-2011», a ciapier reparciorka Biełteleradyjokampanii Lidzija Zabłockaja razam z mužam Antonam Malutam (jon pracuje ekanamičnym ahladalnikam na BT) palacieła ŭ viasielnaje padarožža ŭ Turcyju.
Maładyja spynilisia ŭ piacizorkavym DoubleTree by Hilton Antalya-Kemer. Hatel karystajecca šalonaj papularnaściu — pieršyja volnyja numary dastupny dla braniravańnia tolki naprykancy vieraśnia. Za 5 načej tut dvaim darosłym pryjdziecca zapłacić minimum 3 tysiačy dalaraŭ.
Padpisčykam Lidzija raspaviadała, jak bajałasia lacieć nad moram na parašucie, a taksama pra toje, što nie ŭmieje płavać, tamu ŭ vadzie joj patrebny narukaŭniki.
Tur patłumačyŭ, što Łukašenka mieŭ na ŭvazie, kažučy pra pryznačeńnie dyrektaraŭ u pryvatnyja kampanii7
Kamientary