Dla sabačak i kocikaŭ. Ci zasialilisia ŭ novuju rezidencyju Łukašenki dabračynnyja fondy?

Letaś u svaim rasśledavańni «Biełpoł» raskazaŭ pra budynak byłoj lečkamisii pa vulicy Čyrvonaarmiejskaj, jaki byŭ rekanstrujavany ŭ raskošnuju rezidencyju. Supracoŭniki «Biełpoła» atrymali sotni dakumientaŭ, jakija tyčylisia budoŭli, u tym liku detalovyja płany, dyzajn-kancepcyi, kantrakty, damovy ab pastaŭkach, kaštarysy na zakupy. Krynicaj finansavańnia rekanstrukcyi byŭ dziaržaŭny biudžet.

Na pieršym paviersie była zadumana VIP-zona adpačynku sa spa, saŭnaj, pryborami «štučnaje sonca», dušam uražańniaŭ i navat śniehahienierataram. Druhi pavierch adviedzieny pad pracoŭnyja pamiaškańni. Na trecim paviersie pradstaŭničyja pamiaškańni z darahimi vitražami, a taksama kabiniet zahadkavaha kiraŭnika z apartamientami. Narešcie na čaćviortym paviersie raźmiaščalisia kabiniety dla piersanału, u tym liku achoŭnika i asabistaha doktara. Najbolš źviartaŭ na siabie ŭvahu kabiniet, jaki byŭ abstalavany pa prykładzie kabinieta Łukašenki ŭ ciapierašniaj jahonaj rezidencyi ŭ Pałacy Niezaležnaści.

Pavialičyć

Uražvali i miery biaśpieki. Pry rekanstrukcyi była źniščana ŭsia histaryčnyja aharodža ŭzdoŭž vulic Janki Kupały, Pieršamajskaj i Čyrvonaarmiejskaj. Na jaje miescy źjaviłasia novaja — udvaja vyšejšaja. Tolki z boku vulicy Janki Kupały siońnia možna naličyć nie mienš za 7 kamier videanazirańnia. A jašče dva pasty achovy i kantrolna-prapuskny punkt z boku Čyrvonaarmiejskaj vulicy. Takija miery biaśpieki patrebnyja dla achovy tolki adnaho cieła ŭ Biełarusi.

Pavialičyć

Pa infarmacyi «Našaj Nivy», budynak byłoha adździaleńnia aftalmałohii Respublikanskaha kliničnaha miedycynskaha centra (heta značyć, prezidenckaj balnicy) — heta ŭ zadumie rezidencyja staršyni Usiebiełaruskaha narodnaha schodu. Takuju novuju pasadu Alaksandr Łukašenka prapisaŭ u Kanstytucyi ŭ 2022 hodzie. Uładalnik hetaj pasady maje paŭnamoctvy kantralavać prezidenta krainy, što dało padstavy mierkavać, što jana zadumanaja pad samoha Łukašenku na pieryjad, kali jon pastareje i zachoča pieradać uładu padkantrolnamu sabie pierajemniku.

Adnak tady Łukašenka pačaŭ apraŭdvacca, što ŭ krainie, maŭlaŭ, pačynajecca elektaralnaja kampanija (vybary ŭ parłamient), tamu varožyja siły aktyvizavalisia i sprabujuć ukusić u tym liku i jaho, choć jon, maŭlaŭ, u deputaty i nie idzie.

Pavialičyć

Pavodle viersii Łukašenki, stary budynak, jak jon śćviardžaje, «reabilitacyjnaha» adździaleńnia balnicy jahonaje Upraŭleńnie spravami adramantavała, i jon daručyŭ «na druhich pavierchach usie fondy, jakija my zakryli, sabačak lačyli, katoŭ, dabračynnyja i hetak dalej sabrać pad adzin dach». Rezidencyj, maŭlaŭ, u jaho i biez taho chapaje, i jamu biez roźnicy, dzie pracavać.

Sami pa sabie słovy Łukašenki, što ŭ budynak zasielać fondy, jakich bolš nie isnuje dziakujučy jahonaj palitycy, aksiumaran. Nijakija zakrytyja im fondy nie byli adnoŭlenyja, heta prosta niemahčyma ŭ siońniašniaj Biełarusi, a na ich miesca nie pryjšli inšyja.

U adkaz na rasśledavańnie prapahandysty stali prasoŭvać infarmacyju pra toje, što ŭ budynku na vulicy Čyrvonaarmiejskaj, 15 raźmiaściŭsia łukašenkaŭski «Fond Pieršaha», zarehistravany byccam by jašče 25 kastryčnika 2022. Pra jahonyja mety raspavioŭ i sam Łukašenka, patłumačyŭšy, što fond jašče nie dziejničaje i hrošaj pakul nie maje.

Ale paśla hetaj infarmacyjnaj kontrataki, jakaja adbyłasia ŭ pačatku kastryčnika 2023 hoda, fond z takoj nazvaj bolš ni razu nie zhadvaŭsia ŭ publičnaj prastory. Dabračynnaja arhanizacyja nie maje ni sajta, ni staronak u sacsietkach, ni kantaktaŭ, pa jakich ź joj možna źviazacca dla atrymańnia abiacanaj dapamohi.

Pavialičyć

U mai 2024 hoda byŭ zaćvierdžany novy ziamielny ŭčastak, jaki pašyryŭ miežy rezidencyi: jon achapiŭ nie tolki terytoryju byłoj lečkamisii, ale i tak zvany dom Ofli pa vulicy Janki Kupały, 5. Pavodle infarmacyi «Biełpoła», u hetym budynku raźmiaščałasia apieratyŭna-techničnaja słužba Apieratyŭna-analityčnaha centra pry prezidencie.

Zvyčajna dla zručnaści haspadarańnia roznyja dziaržaŭnyja ŭstanovy, raźmieščanyja ŭ asobnych budynkach, majuć i asobnyja ziamielnyja ŭčastki. Vyklučeńnie składajuć vypadki, kali niekalki ŭstanoŭ zajmajuć adzin budynak. Chutčej za ŭsio, siońnia abodva budynki ŭ miežach ziamielnaha ŭčastka zajmaje adna i taja ž ustanova.

Z momantu zaviaršeńnia rekanstrukcyi ŭžo minuŭ hod. Siońnia nivodnaja arhanizacyja, kali nie ličyć pustyški pad nazvaj «Fond Pieršaha», nie zarehistravana pa adrasie vuł. Čyrvonaarmiejskaja, 15.

Pavialičyć

Taksama ŭ jakaści svajho hety adras aficyjna nie paznačała anijakaja dziaržaŭnaja ŭstanova. Z Usiebiełaruskim narodnym schodam, jaki pazicyjanujecca jak najvyšejšy pradstaŭničy orhan narodaŭładździa, hetamu samamu narodu nijak nie źviazacca — u jaho niama ni adrasa, ni elektronnaj pošty. U sistemie «obraŝienija.bieł» jon nie zarehistravany, a sajt vsebel.by, zapuščany ŭ kancy 2020 hoda, pierastaŭ adkryvacca ŭ pieršaj pałovie 2021 hoda. 

Kali UNS isnuje nie tolki na papiery, to prynamsi namieśnik staršyni schodu, pasadu jakoha zajmaje Alaksandr Kosiniec, i jahony sakrataryjat musiać dzieści ŭvieś čas pracavać pamiž pasiadžeńniami, nie vyklučana, što jakraz u novaj rezidencyi. 

Pavialičyć

24 krasavika 2024 hoda Łukašenka byŭ vybrany staršynioj Usiebiełaruskaha narodnaha schodu. Ale pakolki hetuju pasadu jon sumiaščaje z pasadaj prezidenta, nieabchodnaści ŭ asobnaj rezidencyi dla staršyni UNS pakul niama. Zusim nie vypadkova, što ŭ rekanstrujavany budynak u centry stalicy dahetul nie zajechali nie tolki «kociki i sabački», ale i jakaja-niebudź dziaržaŭnaja ŭstanova. Pusty budynak čakaje, kali ŭ jaho zajedzie sapraŭdny haspadar. 

Pavialičyć

Užo ŭ nastupnym 2025 hodzie, najbolš vierahodna, što 23 lutaha, u Biełarusi adbuducca čarhovyja prezidenckija vybary.

Z ulikam pustujučaj rezidencyi i niadaŭniaha ŭviadzieńnia ŭ Kryminalny kodeks novaha artykuła, jaki praduhledžvaje da 8 hadoŭ źniavoleńnia za pahrozy byłomu prezidentu i členam jaho siamji, tearetyčna možna vysoŭvać prahnoz, što Łukašenka moh by nie iści na vybary, pakinuć pasadu prezidenta i zastacca tolki staršynioj UNS. Adnak nijakich surjoznych śviedčańniaŭ na karyść hetaj viersii niama.

Zrešty, Łukašenka ničoha nie hublaje i ad varyjantu, kali jahonaja novaja rezidencyja jašče niekalki hadoŭ prastaić zakansiervavanaj, pakul jon jašče budzie siadzieć na dvuch kresłach.

Alaksandr Łukašenka. Fota: Mikhail Metzel Sputnik Kremlin Pool Photo via AP

• 0
• 0
• 3
• 6
• 0
• 0
• 14
• 0