«My vas musim viarnuć na terytoryju Polščy». Andrej Mialeška raskazaŭ, jak jaho z dačkoj nie puścili ŭ Hruziju
Jak raskazaŭ Radyjo Svaboda Andrej Mialeška, jon ź niepaŭnaletniaj dačkoj prylacieli ŭ Kutaisi z Varšavy kala 1:30 nočy 16 vieraśnia. Razam ź inšymi stajali ŭ čarzie na pravierku dakumientaŭ. Addali pašparty.
«Vy pražyvali try hady na terytoryi Hruzii, čamu vy raniej hetaha nie zrabili?»
Jak raskazaŭ Svabodzie žurnalist Andrej Mialeška, jon ź niepaŭnaletniaj dačkoj prylacieli ŭ Kutaisi z Varšavy kala 1:30 nočy 16 vieraśnia. Razam ź inšymi stajali ŭ čarzie na pravierku dakumentaŭ. Addali pašparty.
«Dačce praštampavali. Addali joj pašpart. Biaruć moj. Palistaŭ-palistaŭ, op, zavis. Prychodzić niejkaja žančyna, zabiraje pašpart i niasie niekudy. Dumaju: «Takoje byvaje, na chvilin 20-30 zabiaruć, pryniasuć». Kaža: «U vas viza polskaja?» Adkazvaju: «Tak, u mianie viza polskaja»», — pierakazvaje padziei ŭ aeraporcie Mialeška.
Prykładna praz paŭhadziny pryjšoŭ supracoŭnik aeraportu i skazaŭ, što treba prajści ŭ asobny kabinet.
«Zavodziać u asobny kabinet — i ŭ hety momant u dački zabirajuć pašpart. Jana ŭvieś čas trymała pašpart u rukach. Praź niekalki chvilin addaje pašpart i źjaŭlajecca razdrukavanaja papierka ź piačatkami. Kažuć: «My vas musim viarnuć na terytoryju Polščy». Ja kažu: «Što adbyvajecca? Patłumačcie, kali łaska». Mnie kažuć: «Voś vam papiera. U papiery napisana»», — praciahvaje surazmoŭca.
Dakument byŭ napisany pa-hruzinsku i pa-anhielsku. Sa słovaŭ Mialeški, jamu tak i nie patłumačyli, čamu jaho nie puskajuć u krainu. Potym jon pračytaŭ, što pryčynaj zabarony na ŭjezd paznačyli «inšyja pryčyny». Što chavajecca za takoj farmuloŭkaj, nieviadoma.
Mialeška prasiŭ viarnuć pašparty, ale supracoŭnik aeraportu skazaŭ, što nia moža hetaha zrabić.
Biełarus vusna skazaŭ, što choča prasić pra mižnarodnuju abaronu. Na što ŭ jaho zapytalisia: «Vy pražyvali try hady na terytoryi Hruzii, čamu vy raniej hetaha nie zrabili?» Mialešku adkazali, što ŭ jaho niama mahčymaści ciapier prasić pra mižnarodnuju abaronu.
«Vy musicie čakać departacyi na terytoryju Polščy». Mialeška kaža, što supracoŭnik nazvaŭ praceduru mienavita «departacyjaj», a nie «zabaronaj na ŭjezd».
Ź im razmaŭlali try pradstaŭniki pamiežnaj słužby: čałaviek, jaki zabiraŭ pašparty na pašpartnym kantroli, chtości z načalnikaŭ i žančyna ŭ formie z nadpisam «palicyja».
«Pamiaškańnie luks, bo jość matracy»
Andreja razam z dačkoj-padletkam źmiaścili ŭ asobny pakoj. Z saboj jany majuć nievialiki bahaž. Pašpartoŭ u ich niama. U pakoi jość dvuchpaviarchovyja łožki z matracami. Paścielnaj bializny im nia vydali, ježy nie prapanavali.
«Pamiaškańnie luks, bo jość matracy», — sumna žartuje Andrej.
Pakoj, dzie znachodziacca Mialeški, na kluč nie zamykali. Jany mohuć vyjści ŭ susiedniaje pamiaškańnie.
«Ale jany čamuści pastavili palicejskuju mašynu na vychadzie z pamiaškańnia», — adznačaje Andrej.
Surazmoŭca pryznajecca, što jon nie čakaŭ, što takaja sytuacyja moža zdarycca. Jon vylataŭ u Eŭropu minuły raz hod tamu na kanferencyju ŭ Vilniu. Raniej, kali jon viartaŭsia ŭ Hruziju, zatrymka pry praviarańni dakumentaŭ była 15-20 chvilin. Ciapier pry vylecie Mialeški z Hruzii była zatrymka, jakuju abaznačyli jak «zavisła systema». Sioleta jon z dačkoj latali ŭ Polšču i Litvu na karotki adpačynak.
Žonka Andreja z druhim dziciem zastavałasia ŭ hety čas u Batumi. Rankam 16 vieraśnia jana vyjechała ŭ Kutaisi, kab ubačycca z dačkoj. Pamiž haradami 150 kilametraŭ.
Jak raskazaŭ Andrej, dačka pieražyvaje sytuacyju dosyć ciažka. U jaje atrymałasia pahavaryć z maci, tady dzicia krychu supakoiłasia i zasnuła.
Mialeška napisaŭ list ambudsmenu ŭ pravach čałavieka ŭ Hruzii.
Andrej Mialeška žyvie ŭ Batumi bolš za try hady, sa žniŭnia 2021 hodu. Dzieci vučacca onłajn u biełaruska-ŭkrainskaj škole. Žonka pracuje ŭ Batumi ŭ Mižnarodnym adukacyjnym centry.
«Hruzija ihnaruje zajavy na mižnarodnuju abaronu na miažy»
Jak raskazaŭ Svabodzie pravaabaronca Raman Kiślak, u takoj sytuacyi čałaviek moža prasić pra mižnarodnuju abaronu. Dla hetaha dastatkova zrabić zajavu supracoŭnikam aeraportu, navat kali zabrali pašparty, jak u vypadku ź Mialeškami. Zajava moža być u lubym vyhladzie, u tym liku vusnaja.
Adnak, adznačyŭ pravaabaronca, u Hruzii parušajuć hetaje zakanadaŭstva i nie prymajuć zajavy na mižnarodnuju abaronu na miažy. Čałaviek maje prasić pra abaronu sam, treciaja asoba nia moža padać takuju zajavu za jaho.
«My nazirajem vyciskańnie aktyŭnych siabroŭ biełaruskaj dyjaspary z Hruzii», — zaznačyŭ surazmoŭca.
Sam Raman Kiślak žyvie ŭ Hruzii. Jon padaŭ tam zajavu na mižnarodnuju abaronu 24 lipienia 2023 hodu. 7 žniŭnia 2024 hodu jamu admovili. Pryčynaj nazvali «pahrozu nacyjanalnaj biaśpiecy Hruzii». Ciapier jon abskardžvaje hetaje rašeńnie. Miarkuje, što na razhlad jahonaj sytuacyi mohuć pajści miesiacy abo navat hady. Kali admoŭnaje rašeńnie prymuć kančatkova, jaho mohuć departavać z Hruzii.
Pravaabaronca adznačyŭ, što viadoma pra piać vypadkaŭ admovy ŭ mižnarodnaj abaronie biełarusam za apošni čas. Heta najpierš aktyvisty biełaruskaj dyjaspary. Siarod viadomych asobaŭ — spartoŭka Maryna Zialonaja. U traŭni taksama stała viadoma, što biełarusku nie ŭpuścili ŭ Hruziju paśla «vizarana» ŭ Tureččynu. Jana niejki čas žyła na pamiežžy ŭ Tureččynie, ale ŭžo pierajechała ŭ Polšču.
Na siońnia nie viadoma ni pra adzin vypadak, kali biełarusu dali mižnarodnuju abaronu ŭ Hruzii.
Restaŭracyi ŭ Biełarusi zastałosia na try dni. Hałoŭnamu pradpryjemstvu krainy faktyčna padpisali śmiarotny prysud2
Kamientary