Byłaja zorka «Juvientusa» ŭ 2022-m praz vajnu vystupiŭ suprać matču z Rasijaj. A ciapier jon pierajšoŭ u maskoŭski CSKA
Kaliści Miralem Pjanič zapalvaŭ u čempijanacie Italii i jaho za 60 miljonaŭ jeŭra kuplała «Barsiełona», ale časy źmianilisia.
Baśnijski paŭabaronca Miralem Pjanič pierajšoŭ u maskoŭski CSKA. Jon padpisaŭ kantrakt na hod z mahčymaściu padaŭžeńnia jašče na hod.
Pjaniču 34 hady, jaho biez sumnievaŭ možna nazvać adnym ź lepšych, kali nie najlepšym, futbalistam u historyi Bośnii i Hiercahaviny. Jon raskryŭsia ŭ francuzskim «Lijonie», byŭ lidaram italjanskaj «Romy» i supierzorkaj «Juvientusa», ličyŭsia adnym ź lepšych płejmiejkieraŭ svajho pakaleńnia, uvachodziŭ u simvaličnuju zbornuju Lihi čempijonaŭ.
U 2020-m baśnijec pierajšoŭ z «Juvientusa» ŭ «Barsiełonu» za 60 młn jeŭra i hulca ŭ prydaču. Ale ŭ katałonskim kłubie spravy ŭ jaho nie pajšli. Potym byli turecki «Biešyktaš», čempijanat AAE.
A zaraz karjera Pjaniča vydała niečakany tvist.
Pryciahnuć Pjaniča ŭ CSKA mahli, mabyć, tolki hrošy — rasijskija kłuby adchilenyja ad udziełu ŭ jeŭrakubkach, i čempijanat Rasii, paśla pačatku vajny taksičny dla jeŭrapiejskich lehijanieraŭ, pieratvaryŭsia ŭ hetkuju reč u sabie. Kažuć, baśnijec zapytvaŭ u CSKA zarobak u 2 młn jeŭra ŭ hod, ale ŭ vyniku sumu skaracili ŭdvaja. Za hety miljon Pjaniču davodzicca jašče i prasić prabačeńnia ŭ rasijan.
Sprava ŭ tym, što ŭ vieraśni 2022 hoda adchilenaja ad turniraŭ zbornaja Rasii vyrašyła zhulać tavaryski matč z baśnijcami. Rasijanie paabiacali 200 tysiač jeŭra i apłatu ŭsich vydatkaŭ. Baśnijski futbolny sajuz navat spytaŭ dazvołu va UEFA, tam byli nie suprać. Ale suprać byli hulcy zbornaj.
Aktyŭna suprać sustrečy sa zbornaj krainy, jakaja zusim niadaŭna pačała poŭnamaštabnuju ahresiŭnuju vajnu, vystupiŭ jakraz Pjanič:
«Ja čuŭ ab rašeńni fiederacyi pravieści matč z rasiejcami. Kiraŭnictva ŭ kursie majoj pazicyi. Mnie telefanavali i pytalisia, što ja dumaju ab hulni. Ja skazaŭ toje, što dumaŭ, a potym byŭ ździŭleny inšym rašeńniem. Drennaje rašeńnie! U mianie niama słoŭ. Kali zbornaja pačynaje dobra hulać, zaŭsiody niešta idzie nie tak. U mianie niama słoŭ. Fiederacyja viedaje maju pazicyju. Ja prosta skažu, što heta niadobra».
Padtrymali jaho i inšyja lidary zbornaj. U vyniku matč pieranieśli, jon nie adbyŭsia da hetaha času.
Paśla taho, jak CSKA abjaviŭ ab padpisańni Pjaniča, u rasijskaj presie ŭźniaŭsia šum. I baśnijec vyrašyŭ vykazacca:
«Viedaju, što zaraz mnohija abmiarkoŭvajuć maje słovy dvuchhadovaj daŭniny, adnak ja nikoli ničoha nie kazaŭ suprać Rasii i rasijskaha futboła. Mnie škada, kali maja havorka kahości pakryŭdziła, tamu hatovy paprasić prabačeńnia. Biezumoŭna, zaraz nie samy lohki momant dla rasijskaha futboła ŭ suviazi z adchileńniem. I mnie škada, što tak adbyvajecca».
Siarod zatrymanych pa spravie pažaru ŭ viciebskim handlovym centry, vierahodna, jahony ŭładalnik2
Kamientary