«U jaho jość dosyć zrazumiełyja prabiełaruskija pohlady na situacyju».
Padčas efiru na «Jeŭraradyjo» z kiraŭnikom Ahienctva jeŭraatłantyčnaha supracoŭnictva Valeram Kavaleŭskim abmiarkoŭvałasia siarod inšaha pytańnie nacyjanalnaha prymireńnia. U Kavaleŭskaha spytali, ci staŭ byŭ jon vieści pieramovy z Viktaram Łukašenkam, ź jakim vučyŭsia na adnym kursie.
Na dumku palityka, u takim varyjancie jość «niebłahi patencyjał» dziakujučy historyi adnosin pamiž imi i najaŭnaści peŭnaha ŭzajemnaha davieru. Da taho ž, i bijahrafii ŭ ich padobnyja.
«My abodva vychodzim ź vioski, ź vielmi ścipłych, pryziemlenych umovaŭ žyćcia na pačatkovym etapie stanaŭleńnia. My abodva pryjechali ŭ Minsk jak studenty novaha adździaleńnia mižnarodnych adnosin u Biełdziaržuniviersitecie. I my abodva prachodzili etap adaptacyi da haradskich umoŭ, dzie nam treba było ŭzajemadziejničać, a časam kankuryravać z adnakurśnikami, jakija byli značna bolš upeŭnienymi i padrychtavanymi».
Kavaleŭski adznačaje, što ad mahčymaści pieramovaŭ ź Viktaram Łukašenkam jon by nie admoviŭsia. Palityk śćviardžaje, što z ułasnaha dośviedu kamunikacyi sa starejšym synam dyktatara bačyć, što ŭ «jaho jość dosyć zrazumiełyja prabiełaruskija pohlady na situacyju».
Kavaleŭski zaŭvažyŭ, što «ŭpeŭnieny ŭ tym, što jość ahulnyja kaštoŭnaści». «I niezaležnaść Biełarusi — toje, što abjadnoŭvaje absalutnuju bolšaść biełarusaŭ, niezaležna ad taho, pa jaki bok barykad jany znachodziacca».
Były dypłamat miarkuje, što Viktar Łukašenka — toj pradstaŭnik sistemy, ź jakim možna razmaŭlać i šukać kampramisy:
«Budzie kampramis. I nam nie atrymajecca ź pieršaha kroku adbudavać krainu, jakaja budzie absalutna demakratyčnaj, z tryvałaj niezaležnaściu i suvierenitetam, absalutna prajeŭrapiejskaj, jakaja adrazu pačnie ruchacca ŭ toj kirunak. I ŭsie ludzi adrazu zdymuć svaje akulary i skažuć: «My braty i siostry, i ŭ nas niama pretenzij adno da adnaho».
Budzie vielmi składany šlach. Da jaho treba być padrychtavanym chacia b mientalna, razumieć, što hetyja składanaści buduć. Kali heta budzie Viktar Łukašenka, to heta nie samy kiepski varyjant dla viadzieńnia pieramovaŭ».
Pra toje, ci treba jeŭrapiejskim pasłam viartacca ŭ Minsk
Valer Kavaleŭski ŭ efiry padtrymaŭ taksama ideju viartańnia zachodnich dypłamataŭ u Biełaruś. Jon ličyć, što heta maje značeńnie dla zachavańnia suvierenitetu i niezaležnaści našaj dziaržavy.
Pavodle Kavaleŭskaha, u 2024 hodzie varta zadacca pytańniem, ci nie vyčarpaŭ siabie hety krok — adklikańnie jeŭrapiejskich dypłamataŭ u 2020-2021 hadach.
«Ja dumaju, što z punktu hledžańnia biełarusaŭ, jakija žyvuć u Biełarusi, žyvuć u Minsku, usio ž taki było b spakajniej bačyć, što pobač pracujuć ambasadary — vysokapastaŭlenyja pradstaŭniki krain, jakija padtrymlivajuć niezaležnuju, suvierennuju, demakratyčnuju, jeŭrapiejskuju Biełaruś. Kab nie tolki Rasija i Iran kiravali ŭ Minsku, pravodziačy svaje temy, svaje naratyvy i realizoŭvali svaje intaresy, ale kab tam byli i tyja krainy, jakija sapraŭdy dbajuć pra Biełaruś jak pra niezaležnuju krainu».
Jak dypłamat u minułym, Kavaleŭski nahadaŭ, što prysutnaść ambasadaraŭ vielmi važnaja dla zboru infarmacyi, sustrečaŭ na vysokim uzroŭni, kab davodzić svaju pazicyju. Pašyreńnie konsulskaha štatu ŭpłyvaje na mabilnaść biełarusaŭ.
«Treba tut bačyć i inšyja formy: heta i sustrečy z hramadzianskaj supolnaściu, heta sustrečy sa svajakami, z rodnymi, ź siemjami palityčnych źniavolenych, ci z byłymi palitźniavolenymi. Heta taksama i sustrečy z aficyjnymi asobami dziela taho, kab davodzić svaju infarmacyju, rabić demaršy, pratesty, zadavać pytańni, udakładniać — i źbirać infarmacyju pra toje, što robicca ŭ Biełarusi, i hetuju infarmacyju tranślavać u svaje stalicy dziela taho, kab upłyvać na palityku pa Biełarusi».
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary
Nie, ideja, kaniečnie ž, maje prava na isnavańnie, ale nia bolš za toje, bo treba być realistam, treba abapiracca na realnaść i na dośvied sučasnaha stanu. Nia bačna, kab Kavaleŭski prymaŭ heta da viedama j trymaŭ u rozumie.