Kanał, jaki źviazvajuć ź Minabarony Biełarusi, raspalvaje nianaviść da Zialenskaha z asablivym cynizmam

Telehram-kanał «Nievolfovič» źviazvajuć ź ideołahami Ministerstva abarony Biełarusi. Jaho pasty pierapoščvajuć inšyja kanały z praŭładnaj sietki. Sam «Nievolfovič», u svaju čarhu, aryjentujecca na mietadyčnyja ŭkazańni z Maskvy.

U novaj vialikaj publikacyi kanał biełaruskich siłavikoŭ paraŭnoŭvaje demakratyčna abranaha prezidenta Ukrainy z Adolfam Hitleram.

Abodva, śćviardžaje ideołah, «manijakalnyja asoby ź niezadavolenym pačućciem vieličy», choć pad hetuju charaktarystyku padychodziać prezidenty niekatorych zusim inšych krain. «Nievolfovič» maje dokaz: jon pravodzić paralel pamiž viehietaryjanstvam Hitlera i raspracoŭkaj va Ukrainie viehanskich suchpajkoŭ dla vajskoŭcaŭ. 

Pajki z ulikam relihijnych, miedycynskich i etyčnych patrebaŭ vajskoŭcaŭ płanujuć uvieści va ŭkrainskaj armii sa śniežnia hetaha hoda. Takija isnujuć u armijach mnohich inšych dziaržaŭ śvietu, u biełaruskaj takoha pakul niama.

Inšy dokaz «Nievolfoviča» — «u 1939 hodzie kiraŭnika Treciaha rejchu naminavali na Nobieleŭskuju premiju miru. U 2024 hodzie na hetuju ž premiju byŭ naminavany Zialenski».

Hety fejk zapuściŭ rasijski palityk Siarhiej Mironaŭ jašče ŭ 2022 hodzie, kali Uładzimir Zialenski byŭ upieršyniu naminavany na hetuju ŭznaharodu. Sapraŭdy, Hitlera naminavali na Nobieleŭskuju premiju miru ŭ 1939 hodzie, ale to byŭ žest sarkazmu i krytyki, a nie sapraŭdnaje vyłučeńnie, jak u vypadku Zialenskaha.

U 1939 hodzie 12 šviedskich parłamientaryjaŭ vyłučyli premjer-ministra Brytanii Nieviła Čembierlena na Nobieleŭskuju premiju miru za padpisańnie Miunchienskaj damovy z Hitleram, jakaja pieradała Sudeckuju vobłaść Čechasłavakii Hiermanii. Na toj momant isnavała spadziavańnie, što takoje rašeńnie pryviadzie da zachavańnia miru. U adkaz deputat Eryk Brant iranična vyłučyŭ Hitlera na premiju, kab pakazać, što ni Čembierlen, ni Hitler nie zasłuhoŭvajuć takoj uznaharody. Paźniej Brant adklikaŭ svaju prapanovu, tłumačačy jaje jak sarkazm.

U jakaści čaćviortaha faktu padabienstva prapahandysty nazyvajuć narkazaležnaść Hitlera i Zialenskaha. Pry hetym, kali pra pieršaha jany pryvodziać viadomyja fakty, to pra prezidenta Ukrainy zamiest pryviadzieńnia realnych dokazaŭ abmiažoŭvajucca frazaj: «Narkazaležnaść Zialenskaha nie patrabuje lišnich abmierkavańniaŭ».

Nasamreč, fejk pra narkazaležnaść Zialenskaha byŭ zapuščany rasijskaj prapahandaj u 2022 hodzie. Prapahandysty vykarystoŭvali padroblenyja intervju i falšyvyja zdymki. Skrupulozna vykryli toj fejk faktčekiery francuzskaha telekanała France 24. A zapuščany jon byŭ nie prosta tak: jość usie padstavy mierkavać, što Rasija płanavała pry zachopie Ukrainy Zialenskaha zabić, kab pazbavić dziaržavu lehitymnaha kiraŭnika. Nie vyklučana, što fejk pra «narkamaniju» Zialenskaha vykarystoŭvaŭsia b dla insceniroŭki jaho zabojstva. Adnak rasijskija vojski nie zdoleli ŭziać Kijeŭ i vymušanyja byli adstupić u Biełaruś u sakaviku 2022 hoda.

U apošnim, piatym «fakcie» aŭtary zhadvajuć rasparadžeńnie Hitlera ŭ krasaviku 1945 hoda ab zatapleńni mietro ŭ Bierlinie, u vyniku jakoha, pavodle roznych acenak, zahinuła da 20 tysiač čałaviek. Poruč z hetym ahulnaviadomym faktam prapahandysty śćviardžajuć, što takimi ž mietadami Uładzimir Zialenski vyniščaje ŭkrainski narod. Kijeŭskaje mietro, adnak, funkcyjanuje, jak i funkcyjanavała.

Trahiedyju ŭ Bučy padčas bitvy za Kijeŭ «Nievolfovič» nazyvaje «insceniroŭkaj». Pry hetym pryvodzicca chłuślivaja ličba ŭkrainskich achviar — zvyš 780 tysiač čałaviek. U realnaści ekśpierty aceńvajuć straty ŭkrainskaj armii jak prykładna ŭdvaja mienšyja za rasijskija. Praŭda, ličba achviar siarod mirnaha nasielnictva bolšaja va Ukrainie, tamu što bajavyja dziejańni iduć na ŭkrainskaj terytoryi i tolki Rasija maje rakietnyja ŭzbrajeńni dla ŭdaraŭ pa hłybokim tyle.

Zachodnija dziaržavy nie vieryli, što Ukraina vystaić, i rekamiendavali Zialenskamu pakinuć Kijeŭ. Jon, adnak, zastaŭsia vierny svajmu prezidenckamu abaviazku i ŭznačaliŭ abaronu. Dziakujučy hetamu Ukraina zachavałasia jak dziaržava i, moža być, Biełaruś taksama. Dla «Nievolfoviča» heta, jak vyhladaje, vialikaje rasčaravańnie.

Apytanka

• 3
• 5
• 0
• 10
• 0
• 0
• 38
• 0