«Pierad vajnoj Charys zajaviła Zialenskamu, što na Kijeŭ pojduć 40 tysiač rasijskich sałdat ź Biełarusi»
Detali pieramoŭ ZŠA z Rasijaj i Ukrainaj napiaredadni i ŭ pačatku vajny apisvajucca ŭ knizie «Vajna» suśvietna viadomaha amierykanskaha žurnalista-rasśledavalnika Boba Vudvarda.
15 kastryčnika ŭ suśvietny prodaž vyjšła kniha «Vajna» amierykanskaha žurnalista i redaktara vydańnia The Washington Post Boba Vudvarda — aŭtara bestseleraŭ i dvojčy łaŭreata prestyžnaj Pulitceraŭskaj premii. Jon atrymaŭ viadomaść za aśviatleńnie Uoterhiejtskaha skandału, u vyniku jakoha pajšoŭ u adstaŭku prezident ZŠA Ryčard Niksan. Ličycca, što Vudvard maje ŭnikalny dostup da krynic u vyšejšych kołach amierykanskaha isteblišmientu.
U novaj knizie «Vajna», jakaja zasnavanaja na sotniach hadzin intervju z vysokapastaŭlenymi čynoŭnikami i źviestkach śpiecsłužbaŭ, raskryvajucca detali zakulisnaj palityki ŭrada ZŠA ŭ momanty mižnarodnych kryzisaŭ apošnich hadoŭ (niekatoryja vytrymki z knihi publikavalisia).
Asobny akcent u «Vajnie» robicca na niepubličnaj stratehii kamandy Džo Bajdena pa supraćstajańni Rasii na fonie vajny va Ukrainie. Voś što pra heta piša Vudvard.
«My nie pavinny pravakavać Kreml»
Daradcy Džo Bajdena razam z čynoŭnikami Biełaha doma, Pientahona i nacyjanalnych raźviedak ZŠA, jakija razmaŭlali z Bobam Vudvardam, zajavili, što vajna pamiž Rasijaj i Ukrainaj źjaŭlajecca «fundamientalnaj hałavałomkaj» dla Złučanych Štataŭ i śvietu, «jakaja stavić ich u tupik».
«Kali my nie dabjemsia pośpiechu ŭ vyhnańni Rasii z Ukrainy, my dazvolim Pucinu jak by paźbiehnuć adkaznaści. Kali my sapraŭdy dabjemsia pośpiechu ŭ vyhnańni Rasii z Ukrainy, my sutykniomsia ź vielmi vialikaj vierahodnaściu prymianieńnia jadziernaj zbroi, tamu što Pucin nie dazvolić siabie vycieśnić z Ukrainy. Takim čynam, my ŭ tupiku. Zanadta vialiki pośpiech Ukrainy — heta ryzyka jadziernaj vajny, zanadta mały pośpiech — heta svajho rodu taksama niepradkazalny vynik», — zajaviŭ Džo Bajden svajmu daradcu pa nacyjanalnaj biaśpiecy Džejku Salivanu ŭ kancy 2022 hoda, piša Bob Vudvard.
Pa infarmacyi žurnalista, jakuju pryvodzić vydańnie The Washington Post, administracyja Bajdena hanarycca tym, što nie dapuskaje ŭciahvańnia ZŠA ŭ pramy kanflikt z Rasijaj i nie dazvalaje svaim sajuźnikam mocna pravakavać Kreml, što, na dumku daradcaŭ Bajdena i jaho samoha, praduchilaje Treciuju suśvietnuju vajnu.
Vudvard dadaje, što Bajden u pryvatnym paradku vyklučyŭ mahčymaść jadziernaha adkazu ZŠA pa Rasii, kali b taja naniesła jadzierny ŭdar pa Ukrainie, kab zachavać biaśpieku amierykanskaj hramadskaści i nie dapuścić uzajemnaha jadziernaha źniščeńnia z Rasijaj. Pa słovach žurnalista, u Biełym domie ŭsio čaściej hučać parady reahavać na takija scenary «niajadziernym ci dypłamatyčnym šlacham».
Jašče pry administracyi Baraka Abamy ZŠA padčas vajskovych simulacyj aścierahalisia nanosić pramy jadzierny adkaz pa Rasii, navat kali jana naniesła b jadzierny ŭdar pa adnoj ź jeŭrapiejskich krain NATA. Tak, u adnoj ź simulacyj, u adkaz na jadzierny ŭdar Rasii pa adnoj z krain Bałtyi, čynoŭniki i hienierały ZŠA abmiežavalisia jadziernym udaram tolki pa Biełarusi, pieradaje The Washington Post.
«Na vas pojduć 40 tysiač rasijskich sałdat ź Biełarusi»
Pa acenkach amierykanskaj raźviedki, na žadańnie Pucina ŭvarvacca i zachapić Ukrainu asabliva paŭpłyvali vyvad vojskaŭ ZŠA z Afhanistana, jaki stvaryŭ u Kramli dumku, što ŭ vypadku eskałacyi ZŠA hetak ža śpiešna pakinuć i Ukrainu, i pandemija karanavirusa, jakaja «amal try hady trymała Pucina ŭ fizičnaj i mietafaryčnaj izalacyi ad rasijskaha hramadstva i jaho nastrojaŭ», piša Vudvard.
«Padčas pandemii jon akružyŭ siabie nievialikim kołam davieranych asob z padobnymi nacyjanalistyčnymi i impieryjalistyčnymi pohladami, samymi blizkimi ź jakich byli jaho «asabisty bankir» Juryj Kavalčuk, braty-miljardery Rotenbierhi i mitrapalit Cichan. Pucin pravioŭ šmat času ŭ izalacyi, prosta kapajučysia ŭ archivach, dastajučy adtul roznyja rečy i vyvučajučy staražytnyja mapy.
Salivan čuŭ, što padčas adnoj z telefonnych razmoŭ z tahačasnaj kanclerkaj Hiermanii Anhiełaj Mierkiel Pucin skazaŭ: «Vy nie pavierycie, što ja znajšoŭ u rasijskich archivach!» Zachop Ukrainy staŭ dla jaho lichamankavaj maraj i sa skančeńniem jahonaj kavidnaj izalacyi hetaja lichamanka nikudy nie padziełasia», — raskazvaje Vudvard u knizie «Vajna».
Kali amierykanskaja raźviedka pryjšła da vysnovy, što ŭvarvańnie Rasii va Ukrainu niepaźbiežnaje, administracyja Bajdena adpraviła na sustreču z prezidentam Ukrainy Uładzimiram Zialenskim spačatku dyrektara CRU Uiljama Biernsa, a potym vice-prezidenta ZŠA Kamału Charys.
«Bierns u studzieni 2022-ha papiaredziŭ Zialenskaha, što Rasija źbirajecca jaho zabić i pastavić va Ukrainie prarasijski ŭrad, źniščyŭšy papiaredni.
Miesiacam paźniej Charys zajaviła Zialenskamu, što na Kijeŭ pojduć kala 40 tysiač rasijskich sałdat ź Biełarusi i prapanavała jamu evakujavacca z Ukrainy abo raspracavać płan na vypadak jaho zabićcia rasijskimi ahientami. Zialenski admoviŭsia ad evakuacyi i adznačyŭ, što zastaniecca zmahacca ŭ Kijevie», — cytuje vytrymki z knihi Vudvarda telekanał Fox News.
Potym uvosień, kali Rasija sutyknułasia ź vielizarnymi vajskovymi stratami na pole boju i surjozna zadumałasia pra ŭžyvańnie taktyčnaj jadziernaj zbroi, Bajden zahadaŭ tahačasnamu hałoŭnakamandujučamu armii ZŠA Marku Mili patelefanavać načalniku Hienštaba Rasii Valeryju Hierasimavu i vyśvietlić umovy, pry jakich Rasija harantavana zapuścić jadziernyja rakiety.
Dyjałoh pamiž dvuma hienierałami adbyŭsia ŭ kastryčniku 2022 hoda i, pavodle Vudvarda, byŭ taki:
Mili: Hienierał Hierasimaŭ, niekatoryja z vašych čynoŭnikaŭ kažuć pra vykarystańnie jadziernaj zbroi. Heta pryciahvaje ŭvahu mnohich ludziej, tamu mnie treba, kab vy skazali: pry jakich umovach vy vykarystajecie jadziernuju zbroju?
Hierasimaŭ: Vy ŭžo viedajecie, pry jakich umovach, tamu što ŭ vas jość naša daktryna.
Mili: U mianie niama jaje na rukach. Mnie treba, kab vy skazali dakładna, pry jakich umovach vy vykarystajecie zbroju.
Hierasimaŭ: Pieršaja — kali na Rasiju budzie ździejśnieny napad, jaki pahražaje stabilnaści režymu. Druhaja — kali zamiežnaja dziaržava napadzie na Rasiju z vykarystańniem zbroi masavaha źniščeńnia, to-bok chimičnaj, bijałahičnaj abo jadziernaj. Treciaja — kali Rasija sutykniecca z katastrafičnymi stratami na poli boju.
«Heta dobra, bo nivodnaja z hetych umoŭ nie budzie vykanana, tamu ja dumaju, što vy nie budziecie vykarystoŭvać jadziernuju zbroju. Nichto nie źbirajecca atakavać vas zbrojaj masavaha źniščeńnia i nichto nie źbirajecca mianiać režym. Dumaju, vy nie paniasiecie katastrafičnyja straty i, naprykład, nie stracicie tam usiu svaju armiju», — pryvodzić Vudvard adkaz Marka Mili na ŭmovy Hierasimava.
Dla bolšaj upeŭnienaści ŭ tym, što Rasija nie pojdzie na jadziernuju eskałacyju va Ukrainie, administracyja Bajdena źviarnułasia da kitajskaha lidara Si Czińpina, jaki dapamoh ZŠA adhavaryć Pucina, adznačaje Vudvard.
«Naša Niva» — bastyjon biełaruščyny
PADTRYMAĆ
Kamientary