Biełarusu, jaki chacieŭ padarvać rasijskaha vajskoŭca ŭ Krymie, prysudzili 14 hadoŭ źniavoleńnia
Na minułym tydni Džankojski rajonny sud akupavanaha Kryma prysudziŭ hramadzianinu Ukrainy i Biełarusi Viačasłavu Piskunovu 14 hadoŭ kałonii strohaha režymu i vialiki štraf — bolš za 6000 dalaraŭ. Mužčynu abvinavacili ŭ niaŭdałaj sprobie padarvać rasijskaha vajskoŭca va ŭłasnym aŭtamabili, piša «Jeŭraradyjo».
Pra zatrymańnie Piskunova stała viadoma hod tamu, u kastryčniku 2023 hoda.
61-hadovaha mužčynu zatrymali ŭ Sievastopali. Jak piša «Kommiersant», jaho padazravali ŭ arhanizacyi zamachu na techniku hrupy rehłamientu i ramontu technična-ekspłuatacyjnaj vajskovaj častki VKS u Džankoi.
Paviedamlajecca, byccam na dopycie Piskunoŭ pryznaŭsia, što jaho zavierbavali supracoŭniki Słužby biaśpieki Ukrainy. Jon nibyta sabraŭ vybuchovaje prystasavańnie mahutnaściu da 0,5 kh traciłu i pastaviŭ jaho pad Chevrolet Aveo vajskoŭca. Vybuch adbyŭsia, kali ŭ mašynie nikoha nie było. U domie niepadalok na pieršym paviersie ad vybuchu vybiła šyby.
Rasijskija siłaviki zajavili, byccam padčas pieratrusu znajšli ŭ Piskunova zbroju i bojeprypasy: elektradetanatary, dvuchkiłahramovy zarad na asnovie hieksahienu, nahan, samarobny pistalet-kulamiot i paŭtary sotni roznych patronaŭ.
Taksama paviedamlajecca, što padčas śledstva Piskunoŭ zajaviŭ, nibyta SBU daručyła jamu padarvać čyhunku ŭ rajonie Miekienzijevych hor pad Sievastopalem. Zrabić heta jon nie paśpieŭ.
Na sudzie Piskunoŭ pryznaŭ vinu i zajaviŭ, što kuratary nibyta SBU pahražali žyćciu i zdaroŭju jaho dziaciej, jakija znachodziacca za miažoj.
Kubrakoŭ davodziŭ, što milicyjant Zhirski nie datyčny da bandy nalotčykaŭ. Ciapier taho sudziać — pahražaje da 20 hadoŭ3
Kamientary