ZŠA rassakrecili novyja dakumienty pa prahramach CRU «pa kantroli nad rozumam», jakija ładzilisia padčas Chałodnaj vajny

23 śniežnia Archiŭ nacyjanalnaj biaśpieki ZŠA ŭ adpaviednaści z Zakonam ab svabodzie infarmacyi rassakreciŭ 20 dakumientaŭ, u jakich aśviatlajucca mietady prymianieńnia prahram Centralnaha raźviedvalnaha ŭpraŭleńnia ZŠA (CRU) pa kantroli nad čałaviečymi pavodzinami i śviadomaściu, jakija ładzilisia viedamstvam u 1950-ch i 1960-ch hadach.

Asablivaja ŭvaha ŭ dakumientach nadajecca prahramam CRU pad kodavymi nazvami MK-Ultra, Bluebird i Artichoke, meta jakich składałasia ŭ stvareńni idealnych supierahientaŭ z całkam prahramavanaj śviadomaściu, asobaj i pamiaćciu dla supraćstajańnia Savieckamu Sajuzu i Kitaju, a taksama ŭ raspracoŭcy ekśpierymientalnych mietodyk dopytaŭ ahientaŭ kamunistyčnych śpiecsłužbaŭ i ich pieravierboŭcy.

Jak adznačaje Archiŭ nacyjanalnaj biaśpieki ZŠA, u ramkach prahram «pa kantroli nad rozumam» CRU pravodziła «žudasnyja ekśpierymienty z vykarystańniem narkotykaŭ, hipnozu, izalacyi, sensarnaj depryvacyi, elektrašokavaj terapii i inšych ekstremalnych mietadaŭ na ludziach bieź ich zhody» (pieravažna nad hramadzianami ZŠA, jakija časta nie ŭśviedamlali, što byli častkaj ekśpierymientaŭ CRU).

U ekśpierymientach CRU ŭdzielničali i dzieci. 

Ekśpierymienty, źviazanyja z prahramami MK-Ultra, Bluebird i Artichoke, pravodzilisia ŭ roznych miescach, uklučajučy vajskovyja abjekty, univiersitety, špitali, turmy i sakretnyja abjekty CRU jak na terytoryi ZŠA, tak i ŭ inšych krainach (Vjetnam, Centralnaja i Paŭdniovaja Amieryka, Afhanistan, Irak, Huantanama, Japonija).

CRU aficyjna pryznała isnavańnie prahram MK-Ultra, Bluebird, Artichoke tolki ŭ 1970-ch hadach paśla ŭciečki infarmacyi ab prajektach u ŚMI i šerahu adpaviednych rasśledavańniaŭ i słuchańniaŭ u Kanhresie ZŠA. Adnak pierad vymušanym pad ciskam hramadskaści pryznańniem CRU źniščyła bolšuju častku dakumientaŭ pa prajektach.

Pavialičyć

Što napisana ŭ dakumientach

Daśledavańni CRU pa kantroli nad rozumam, pavodle dakumientaŭ, pačalisia ŭ 1949 hodzie, kali viedamstva prapanavała stvaryć śpiecyjalnyja hrupy, jakija b vykarystoŭvali hipnoz, narkotyki i palihrafy dla dopytaŭ i pravierki ŭłasnych supracoŭnikaŭ. Asobna adznačałasia nieabchodnaść «vyvučeńnia mietadaŭ kantrolu nad śviadomaściu, jakija vykarystoŭvalisia savieckimi śpiecsłužbami».

Heta stała asnovaj dla prajekta Bluebird, zapuščanaha ŭ 1950 hodzie, jaki staviŭ za metu stvareńnie kamand ź psichijatraŭ, technikaŭ palihrafa i hipnatyzioraŭ dla praviadzieńnia ekśpierymientaŭ i treninhaŭ z udziełam piersanała CRU i vyjaŭleńnia siarod jaho kamunistyčnych «zaprahramavanych» ahientaŭ. Ekśpierymienty ładzilisia jak na amierykanskich, tak i na zamiežnych abjektach CRU.

U 1951 hodzie na sakretnaj sustrečy pamiž pradstaŭnikami śpiecsłužbaŭ ZŠA, Vialikabrytanii i Kanady abmiarkoŭvalisia mietady ŭpłyvu na śviadomaść, prapahanda i psichałahičnaja vajna. Spačatku brytanski bok vykazvaŭ skieptycyzm adnosna mahčymaści manipulacyi śviadomaściu, «ale paźniej staŭ prychilnikam hetaj idei». Udzielniki pahadzilisia, što «daśledavańni ŭ hetaj halinie nieabchodnyja dla pieravahi ŭ Chałodnaj vajnie».

Infarmacyja z astatnich rassakrečanych dakumientaŭ vyhladaje tak.

1. U 1951 hodzie prajekt Bluebird byŭ pieranazvany ŭ Artichoke i staŭ aktyŭna vyśviatlać, ci mahčyma miedykamientozna albo hipnatyčna prymusić čałavieka ździejśnić dziejańni suprać jaho voli, uklučajučy zabojstva. Ekśpierymienty ŭpieršyniu pašyrylisia na zamiežnych hramadzian, adnak adna sa słužbovych zapisak śviedčyć, što CRU nie chapała daśviedčanaha miedycynskaha piersanału dla praviadzieńnia paŭnavartasnych vyprabavańniaŭ, a «vykarystańnie ŁSD, hipnozu i inšych mietadaŭ nie pryniesła značnych vynikaŭ», choć «asobnyja ekśpierymienty ličylisia vielmi pierśpiektyŭnymi».
2. U słužbovaj zapiscy ad 1952 hoda, składzienaj na imia dyrektara CRU, adznačajecca «paśpiachovaje vykarystańnie mietadaŭ dopytu ŭ ramkach Artichoke u dačynieńni da ruskich ahientaŭ, jakija padazrajucca ŭ dvajnoj hulnie». U adnym z vypadkaŭ udałosia vyklikać «poŭnuju amnieziju praz hipnoz».
3. U 1953 hodzie prajekt Artichoke byŭ zamienieny jašče bolš viadomaj prahramaj CRU — MK-Ultra, jakaja vyjšła za miežy mietodyk dopytaŭ i pahłybiłasia ŭ daśledavańni kantrolu nad rozumam. Vykarystańnie ŁSD adyhrała centralnuju rolu ŭ hetych namahańniach, a ekśpierymienty z narkotykami i inšymi chimičnymi rečyvami ŭ ramkach MK-Ultra z 1953 hoda stali pravodzicca na bazie turmaŭ, špitaloŭ, univiersitetaŭ i inšych hramadskich abjektaŭ praz padstaŭnyja arhanizacyi.
4. Hałoŭnym pastaŭščykom ŁSD dla CRU stała bujnaja amierykanskaja farmaceŭtyčnaja kampanija Eli Lilly. Pry hetym pastaŭki rabilisia «ŭ jakaści padarunka».
5. Armiejski vučony ZŠA Frank Ołsan u 1953 hodzie pamior padčas adnaho z ŁSD ekśpierymientaŭ MK-Ultra, paśla čaho prahrama CRU była časova prypyniena, havorycca ŭ dakumientach. Tym nie mienš, ekśpierymienty z ŁSD praciahvalisia ŭ schavanych formach i peŭny pieryjad kuryravalisia ahientami CRU ŭ kiraŭnictvie Upraŭleńnia pa baraćbie z narkotykami ZŠA.

«Za dziesiać hadoŭ isnavańnia prahramy MK-Ultra byli vyprabavany šmat sposabaŭ kantrolu za pavodzinami čałavieka, u tym liku radyjacyja, elektrašok, roznyja vobłaści psichałohii, psichijatryi, sacyjałohii, a taksama antrapałohija, hrafałohija, chimičnyja rečyvy, vajenizavanyja pryłady i materyjały.

Paddoślednyja, jakija ničoha nie padazrajuć, adbirajucca z usich słajoŭ hramadstva. Efiektyŭnaść mietadaŭ na ludziach z usich sacyjalnych uzroŭniaŭ, vysokaha i nizkaha statusu, karennych amierykanskich i zamiežnych, maje vialikaje značeńnie.

Prahrama prytrymlivajecca fiłasofii minimalnaj dakumientacyi pracesaŭ i tolki dva čałavieki vałodali poŭnymi viedami pa sutnaści prajekta, ale heta byli vysokakvalifikavanyja, vysokamatyvavanyja i prafiesijna kampietentnyja asoby, jakija vydatna razumieli adčuvalny charaktar infarmacyi ab zdolnaści amierykanskaj vyviedki manipulavać pavodzinami ludziej», — havorycca ŭ 48-staronkavaj sakretnaj spravazdačy CRU za 1963 hod.

Za čas isnavańnia prahramy da jaje aficyjnaha vykryćcia, pavodle dakumientaŭ, CRU raspracoŭvała nastupnyja instrumienty kantrolu nad rozumam.

1. Rečyvy, jakija vyklikajuć niełahičnaje myśleńnie i impulsiŭnyja pavodziny.
2. Rečyvy, jakija pavyšajuć efiektyŭnaść razumovaj dziejnaści i ŭsprymańnia infarmacyi.
3. Rečyvy, jakija praduchilajuć ci źnižajuć upłyŭ ałkaholu.
4. Rečyvy, jakija ŭzmacniajuć uździejańnie ałkaholu.
5. Rečyvy, jakija vyklikajuć simptomy raspaŭsiudžanych zachvorvańniaŭ u časovaj i zvarotnaj formie (dla imitacyi).
6. Rečyvy, jakija sproščvajuć naviadzieńnie hipnozu.
7. Rečyvy, jakija ŭzmacniajuć ustojlivaść da katavańniaŭ i prymusu.
8. Mietodyki, jakija vyklikajuć amnieziju.
9. Mietodyki, jakija vyklikajuć šok i dezaryjentacyju.
10. Rečyvy, jakija vyklikajuć časovuju fizičnuju niemač (naprykład, paralič kaniečnaściaŭ).

Taksama ŭ dakumientach CRU zhadvajucca srodki, zdolnyja «źmianiać strukturu asoby, uzmacniać zaležnaść ad peŭnych dziejańniaŭ, vyklikać ejfaryju biez nastupstvaŭ, a taksama źnižać ambicyi i pracazdolnaść čałavieka».

• 0
• 1
• 0
• 0
• 4
• 1
• 0
• 0