Rasija vynošvaje płany zachopu krain Bałtyi, častki Finlandyi i Narviehii. NATA źmianiaje płany procidziejańnia joj

Žurnalist finskaha vydańnia Iltalehti parazmaŭlaŭ z krynicami ŭ NATA a taksama aznajomiŭsia sa źmiestam abarončaha dakłada ŭrada Finlandyi, u jakim aceńvajucca pahrozy biaśpiecy krainy i prapanoŭvajucca abarončyja stratehii.

Aŭtary dakłada nie vyklučajuć mahčymaści ahresii Rasii suprać Finlandyi, paŭnočnych terytoryj Narviehii i krain Bałtyi.

«Vajna va Ukrainie pakazała, što Rasija hatovaja pajści na značnuju ryzyku niezaležna ad strat. (…) Va Ukrainie Rasija prademanstravała svaju hatoŭnaść vykarystoŭvać šyrokamaštabnuju vajennuju siłu nie tolki suprać vajennych abjektaŭ, ale i suprać žyćciova važnych abjektaŭ hramadzianskaj infrastruktury, a taksama suprać mirnaha nasielnictva, kab dasiahnuć svaich palityčnych met», — cytuje vydańnie źmiest dakłada.

Napad na Narviehiju i Finlandyju

Krynicy vydańnia ŭ NATA paviedamili, što Rasija pravodziła vajennyja vučeńni, u chodzie jakich madelavała ataku na Finlandyju i inšyja krainy ŭschodniaha fłanhu NATA.

Pa słovach krynic, u ramkach vučeńniaŭ razhladaŭsia scenaryj, u jakim niekalki vajskovych hrupovak Rasii adnačasova atakujuć hetyja krainy.

U pryvatnaści, 14-ja armiejski korpus Rasii, raźmieščany ŭ paŭnočnaj častcy krainy, moža pačać nastup z Murmanska adnačasova z mora, z sušy i z pavietra, nakiroŭvajučysia da narviežskaha ŭźbiarežža.

Pavialičyć

U Łapłandyi, na poŭnačy Finlandyi, rasijanie mohuć vysadzić desantnyja vojski, kab chutka zachapić stratehična važnyja abjekty, takija jak aeraport Ivała. Taksama, jak paviedamlaje krynica, u nastupie prymuć udzieł rakietnyja vojski, raźmieščanyja na Kolskim paŭvostravie, jakija mohuć nanieści ŭdary pa klučavych abjektach u Finlandyi.

Rasija pasprabuje stvaryć bufiernuju zonu na poŭnačy Łapłandyi i ŭ paŭnočnym rehijonie Narviehii Finmark. Heta pieraniasie bajavyja dziejańni na terytoryju krain NATA i źviaža tut siły sajuźnikaŭ.

Na poŭdni rasijskija rakietnyja vojski buduć nacelenyja na paŭdniovaje ŭźbiarežža Finlandyi i paŭdniova-ŭschodniuju častku krainy. Adkaznaść za hetyja dziejańni budzie nieści 44-y armiejski korpus Rasii.

Jak adznačajuć krynicy ŭ NATA, asnoŭnaj metaj napadu nie abaviazkova budzie praryŭ uhłyb Finlandyi. Rasijanie skancentrujucca na zachopie paŭnočnaha ŭźbiarežža Finskaha zaliva i paŭdniova-ŭschodniaj Finlandyi. Takim čynam jany adciahnuć asnoŭnyja siły Finlandyi, a taksama ŭskładniać padtrymku abarony Estonii z terytoryi Finlandyi.

Pa acenkach krynic, Rasija budzie imknucca da miežaŭ, jakija byli vyznačany Abaskim mirnym traktatam 1743 hoda, jaki vyznačyŭ miažu pamiž Rasijaj i Šviecyjaj pa race Kiumien (ciapier Kiumi-Joki, Finlandyja). Na poŭnačy metaj napadu moh by stać praliŭ Pumalansalmi.

Asnoŭny ŭdar pa krainach Bałtyi

«U rasijskaj kancepcyi biaśpieki prasočvajecca imknieńnie da stratehičnaj hłybini i sproba stvareńnia adzinaj zony kantrolu ŭ Jeŭropie, jakaja raspaścirajecca ad Arktyki praz Bałtyjskaje i Čornaje mora da Mižziemnaha mora», — cytuje vydańnie abarončy dakład urada Finlandyi.

Zhodna z acenkaj pahroz NATA, asnoŭnaj metaj ataki rasijan byli b krainy Bałtyi. Pad pahrozaj akazalisia b Estonija, Łatvija i Litva, a taksama paŭdniova-ŭschodniaja Finlandyja.

Žurnalisty źviartajuć uvahu na toje, što 19 śniežnia Uładzimir Pucin u svajoj štohadovaj pramoj linii zajaviŭ, što «ŭ Rasii dastatkova sił i srodkaŭ dla viartańnia ŭsich svaich histaryčnych terytoryj».

U minułym Pucin kazaŭ, što jaho ideałam była Rasijskaja impieryja XVIII stahodździ. Krynicy ŭ NATA kažuć, što słovy Pucina treba ŭsprymać litaralna.

Pavialičyć

Pa infarmacyi krynic NATA, 6-ja armija Rasii pasprabuje prarvać abaronu ŭ Estonii i Łatvii, vykarystoŭvajučy masavyja tankavyja, artyleryjskija i rakietnyja ŭdary. Hałoŭnaj jaje metaj stała b avałodańnie stalicami — Talinam i Ryhaj.

U Litvu rasijanie ŭvarvucca praź Biełaruś. Stratehičnaj metaj źjaŭlajecca zachop tak zvanaha Suvałkskaha kalidora. Kali apieracyja budzie paśpiachovaj, siły NATA, jakija dziejničajuć u Prybałtycy, apynucca ŭ niebiaśpiecy akružeńnia.

Kab uskładnić situacyju, Rasija moža pasprabavać adciahnuć uvahu i asłabić abaronu, atakavaŭšy paŭdniovaje ŭźbiarežža Finlandyi.

Rasija moža vykarystać svaje rakietnyja vojski, raźmieščanyja ŭ Kalininhradzie, i Bałtyjski fłot, kab atakavać Hotłand, šviedski vostraŭ u Bałtyjskim mory. Jaho zachop uskładniŭ by zabieśpiačeńnie suchaputnych vojsk NATA, jakija dziejničajuć u krainach Bałtyi, pakolki hety vostraŭ źjaŭlajecca klučavym łahistyčnym vuzłom dla transparciroŭki i zabieśpiačeńnia vojskaŭ.

Novaja abarončaja stratehija NATA

Jak adznačajuć aŭtary artykuła, infarmacyja, pradstaŭlenaja krynicami, nie pierabolšańnie i nie nahniatańnie, a zasnoŭvajecca na źviestkach raźviedki ab stratehičnych metach Rasii i struktury jaje vojska.

Asnoŭnyja siły suchaputnych vojsk Rasii ciapier zadziejničanyja va Ukrainie, adnak krynicy paviedamlajuć, što Maskva zdolnaja sabrać hrupoŭku ź minimum 600 000 sałdat i na miežy krain Bałtyi i Finlandyi.

Krynicy ŭ NATA paviedamlajuć, što ŭ Rasii ŭžo jość płany pavialičyć kolkaść svaich vojsk na miažy Finlandyi i Estonii z uzroŭniu bryhady da dyvizii. Hety prahnoz adpaviadaje acenkam, pryviedzienym u finskim abaronnym dakładzie. U im adznačajecca, što Rasija ŭzmacniaje svaju vajskovuju prysutnaść na paŭnočna-zachodnim napramku i aktyŭna raźvivaje svaju dziejnaść u hetych rehijonach.

U artykule źviartajecca ŭvaha na novyja stratehičnyja płany NATA pa abaronie, jakija adaptavanyja z ulikam sučasnych pahroz, asabliva ŭ kantekście kanfliktu va Ukrainie.

U minułym NATA dapuskała časovuju akupacyju praciŭnikam terytoryi i nastupnaje jaje «advajavańnie».

Ciapier ža aljans admoviŭsia ad hetaj stratehii. Novy padychod zaklučajecca ŭ tym, kab nie dapuścić navat najmienšaha prasoŭvańnia rasijskich vojsk u krainy NATA. U vypadku napadu ŭdary buduć nanosicca ŭhłyb terytoryi Rasii, kab jašče na rańnich stadyjach kanfliktu asłabić jaje siły.

Ekśpierty źviartajuć uvahu na toje, što Rasija moža praciahvać ataki na terytoryju NATA na praciahu doŭhaha času, što stvoryć nieabchodnaść dla krain aljansu vieści praciahłyja bajavyja dziejańni. Mahčymaja padtrymka Rasii z boku Kitaja robić situacyju bolš niebiaśpiečnaj i ciažkapradkazalnaj.

«Aljans pavinien być zdolny da bujnamaštabnaj vysokaintensiŭnaj vajny va ŭsich apieratyŭnych umovach suprać mocnaj u vajennych adnosinach dziaržavy, jakaja vałodaje jadziernaj zbrojaj», — padkreślivajecca ŭ abarončym dakładzie ŭrada Finlandyi.

• 23
• 3
• 10
• 4
• 3
• 2
• 8
• 0